Te peu hiˈo fetia e te tohuraa: E mau ravea papu anei no te hiˈo atea?

TE PEU HIˈO FETIA

E tuhaa te peu hiˈo fetia no te peu hiˈohiˈo, niuhia i nia i te tiaturiraa e ohipa te mau fetia, te avaˈe e te mau paraneta i nia i te oraraa o te mau taata. Te haapapu ra te feia hiˈo fetia e ohipa te huru o teie mau taoˈa i te raˈi i te mahana fanauraa o te hoê taata i nia i to ˈna huru e to ˈna a muri aˈe.

I teie mahana, e ite-pinepine-hia te mau peu hiˈo fetia noa ˈtu no ǒ roa mai te reira i te tau o Babulonia i tahito ra. Ia au i te hoê titorotororaa ravehia i te Hau Amui no Marite i 2012, ua parau hoê taata i nia i te toru e au te peu hiˈo fetia i te ihi. No 10 taata i nia i te hanere, e ihi roa ïa te reira. Tera iho â anei? Aita roa ˈtu. Teie te tahi mau tumu.

• Aita te mau paraneta e fetia e ohipa ra i nia i te mau taata mai ta te feia hiˈo fetia e faataa ra.

• Pinepine e faaitehia te mau tohuraa ia nehenehe te reira e tuea i te huru tupuraa o te mau taata atoa.

• Ua niuhia te mau peu hiˈo fetia i nia i te tiaturiraa tahito e ohu te mau paraneta e ati aˈe te fenua. Tera râ, te ohu ra te mau paraneta e ati aˈe te mahana.

• E rave rau faaiteraa ta te feia hiˈo fetia i parau no nia i te hoê â taata e aita te reira i tuea.

• Ua tatuhaa te feia hiˈo fetia i te mau taata na roto 12 tuhaa aore ra tapao tohuraa ia au i to ratou mahana fanauraa. Ua horoa ratou i te iˈoa o te mau haapueraa fetia i tera e tera mau tapao. Tera râ, a mairi ai te tau, e taui te fenua i to ˈna vairaa i roto i te reva. Ua taui atoa ïa te taime e tae ai te hihi mahana na roto i te mau haapueraa fetia. No reira, aita te mau mahana taaihia i tera e tera mau tapao tohuraa e tuati faahou ra i te iˈoa o te mau haapueraa fetia horoahia.

Ua parauhia e faaite te mau tapao tohuraa eaha te huru o te hoê taata. Tera râ, mea ê te huru o te tahi e te tahi noa ˈtu ua fanauhia raua i te hoê â mahana. Aita roa ˈtu te mahana fanauraa e faaite ra i te huru o te hoê taata. Aita te feia hiˈo fetia e ite ra i te hoê taata ia au i to ˈna huru mau, ia au râ e rave rau manaˈo papu ore. Aita anei ratou e faatupu ra i te hoê manaˈo oti noa?

TE TOHURAA

Mai te tau mai â, te haere ra te taata e farerei i te feia hiˈohiˈo. Ua imi vetahi taata hiˈohiˈo i te mau pahonoraa ma te faaohipa i te aau o te hoê animara e taata aore ra ma te hiˈo e nafea te hoê moa e amu ra i ta ˈna mau huero. Ua niu te tahi atu i ta ratou mau tohuraa i nia i te huru o te rauere ti aore ra te huero taofe. I teie mahana, te faaohipa ra ratou i te pere, te pôro manamana, te tiupa e te tahi atu â mau ravea no te ite i te a muri aˈe o te hoê taata. Mea papu anei te tohuraa no te ite eaha te tupu? E ere roa ˈtu. E faataa anaˈe i te reira.

A feruri na i nia i te tanoraa mau o te tohuraa. E rave rau ravea ta te tahi e te tahi taata hiˈohiˈo e faaohipa ra. Pinepine ta ratou mau tohuraa i te patoi i te tahi e te tahi. Noa ˈtu e faaohipa te feia hiˈohiˈo hoê â ravea tohuraa, mea ê ta te tahi pahonoraa i ta te tahi atu. Ei hiˈoraa, mai te peu e tuu te hoê taata hoê â uiraa no nia i te a muri aˈe i e piti taata hiˈohiˈo o te faaohipa ra hoê â pere, papu maitai e horoahia mai hoê â pahonoraa, e ere anei? Pinepine râ e ere tera te tupu.

Te feaa nei te taata e mea tano anei te mau ravea ta te feia hiˈohiˈo e faaohipa ra aore ra ta ratou e hinaaro mau. No vetahi, e mau taoˈa anaˈe te pere aore ra te pôro manamana e aita te feia hiˈohiˈo e hiˈopoa ra i teie mau taoˈa. Te hiˈo nei râ ratou i te huru o te taata no te horoa i te pahonoraa. Ei hiˈoraa, e ui te hoê taata hiˈohiˈo aravihi e rave rahi uiraa. E haapao maite oia i ta te taata e parau aore ra i to ˈna huru. E mau haapapuraa hoi te reira no nia i te taata. I muri iho, e pahono te taata hiˈohiˈo ma te faahua ite i te oraraa e tupuraa o te taata. Aita râ te taata i tâuˈa aˈe e na ˈna iho i horoa i tera mau haapapuraa. Tiaturi atura oia i te taata hiˈohiˈo e aufau atura ia ˈna e rave rahi moni.

TA TE BIBILIA E PARAU RA

E faaite te mau peu hiˈohiˈo fetia e tohuraa e ua opua-aˈena-hia to tatou a muri aˈe. Tera iho â anei? Te parau ra te Bibilia e tiamâraa to tatou no te faaoti eaha ta tatou e tiaturi aore ra e hinaaro e rave. E ohipa ïa ta tatou mau faaotiraa i nia i to tatou a muri aˈe.—Iosua 24:15.

Te patoi ra te feia haamori i te Atua i te mau peu hiˈohiˈo e tohuraa. Teie te tahi atu tumu: te patoi ra te Atua i te mau peu hiˈohiˈo atoa. I roto i te Bibilia, te na-ô-hia ra: “Eiaha roa te hoê i roto ia outou . . . ei pifao, e te hiˈo ata, e tei imi i te tapao, e te hiˈohiˈo, e te hebere, e te feia imi i te varua ino, e te taura, e te feia uiui i tei pohe ra. O te feia atoa hoi i rave i te reira ra mau peu, e feia faufau ïa na Iehova, e no te reira ra mau mea faufau i tiavaru ai to Atua ra o Iehovaa ia ratou i mua ia oe ra.”—Deuteronomi 18:10-12.