Satani—O vai mau na oia!

UA PARARE roa te parau no nia ia Satani na te ao atoa nei i teie mahana. Ua faahitihia to ˈna parau na roto i te mau vea tamahana e te mau papai iti faaroo. Ua tuatapapa-atoa-hia te parau no te sataniraa na roto i te afata radio e te afata teata.

Ua papaihia te iˈoa ra “Satani” na te mau vahi atoa: na nia i te mau parahiraa, na nia i te mau eˈaturu, te mau pǎpai o te mau fare teitei e te mau fare toa i faaruehia, na nia i te mau hiˈo o te mau fare toa. Ua riro roa te hutiraa te haapaoraa a Satani i te manaˈo o te taata e te rahiraa o te mau taata e hutihia nei — te feia apî iho â râ — ei fifi no te totaiete.

Teie râ, noa ˈtu te rahiraa parau e faahitihia ra no nia i to ˈna iˈoa, te feaa nei te manaˈo o te taata no te faataa e o vai mau ra o Satani. Te manaˈo nei e rave rahi mau taata, e oia atoa ta ˈna mau pǐpǐ itoito roa ˈˈe, e e miterio te parau no Satani. Ia au i te hoê orometua tuatapapa i te pae faaroo, “ua rau te huru o te mau manaˈo no nia ia Satani. Te vai ra te feia e tiaturi nei e e taata mau iho â o Satani, e te feia e manaˈo nei e e taata taipe noa oia e aita ratou e tâuˈa ra ia ˈna”.

I roto i te hoê rururaa baptiste a te feia tuatapapa i te parau no nia i te Atua, ua riri roa ˈˈera te feia i amui mai i to te hoê taata haapii faaroo, parauraa e e ere o Satani i te enemi tahito roa ˈˈe o te Atua, o To ˈna râ ‘tavini’. E rave rahi mau rata tei faataehia e te mau taata tei taniuniu atu i te taiete neneiraa a taua Ekalesia nei, no te faahapa i teie faataaraa parau. “Te fariiraa e e tavini o Satani na te Atua, o te faariroraa ïa i te Atua ei enemi no tatou nei”, o ta te hoê orometua baptiste tumu ïa i parau ma te peapea mau. Teie râ, ua patoi atu te tahi atu orometua baptiste, e orometua tuatapapa haapaoraa atoa, i te na ôraa e “aita” te mau melo o te apooraa baptiste “i maiti no te faataa i te tiaraa i haamanahia a te Ekalesia baptiste” no nia i te parau ra e o vai mau ra o Satani.

Inaha, aita te mau melo o te mau Ekalesia e rave rahi i ite e eaha mau na te mea o ta ratou haapaoraa e haapii ra no nia ia Satani. Teie ta te hoê papai vea i parau: “I te mea e mea iti roa te mau Ekalesia o tei faaite papu mai i to ratou manaˈo no nia ia Satani, mai te huru ra e tei te taata tataitahi atura ïa te pahonoraa i teie uiraa.” Te haapii nei vetahi e te Diabolo, o te ino ïa e vai ra i roto i te natura taata nei. No reira, te parau ra o A. Ellison, orometua presbytérien, e aita o Iesu i tamatahia i roto i te medebera na te tahi varua ino, ua tamatahia râ o ˈna na roto i to ˈna iho teoteo.

E maere anei tatou i te mea e te feaa nei te manaˈo o te feia faaroo inaha, aita ta ratou iho mau faatere faaroo i ite e o vai ra o Satani?

O vai mau na oia?

Area ra, mea papu maitai te mau Papai e aita roa ˈtu ratou e vaiiho nei i te taata ia feaa noa i nia i te parau no Satani. Ua poiete te Atua Mana hope ra e rave rahi mau taata tino varua e noho ra e o ˈna iho i roto i te mau raˈi e e tavini ra ia ˈna. Te faaite ra te Bibilia e, i to te Atua ‘haamauraa [aore ra poieteraa] i te tumu o te fenua nei’ ei nohoraa no te taata nei, “ua pii noa te mau tamarii atoa a te Atua [te mau melahi] i te oaoa”. (Ioba 38:4, 7.) I muri iho, ua ofati aˈera te hoê o taua mau melahi nei i te ture a to ˈna Poiete, ma te patoi uˈana ˈtu ia ˈna e te riroraa mai ei enemi no ˈna.

Te taata patoi matamua, aore ra Satani (oia hoi te auraa “Patoi”), o ˈna ïa tei faaohipa i te ophi no te turai ia Eva ia ofati i te ture a te Atua (Genese 3:1-6). Tera te tumu oia e parau-atoa-hia ˈi te “ophi tahito”. (Apokalupo 12:9.) Ua parau o Iesu iho no nia ia Satani e: “E taparahi taata oia mai te matamua mai â: aore oia i haapao i te parau mau, no te mea aore e parau mau i roto ia ˈna.” (Ioane 8:44; Ioane 1, 3:8). Na roto i teie mau parau, te faaite ra o Iesu e, i mutaa ihora, e melahi fariihia o ˈna e te Atua, ua patoi râ oia i te Atua ra o Iehova i muri iho.

Noa ˈtu e te parau ra vetahi pae e te Diabolo o te ino ïa, ia hiˈohia te mau huru e te mau ohipa ta te Bibilia e faataa ra no nia ia Satani, mea papu atura ïa e e taata mau oia. Te faaite ra te Bibilia e e taata tino varua o Satani o te ore e itehia e te taata nei, e te tutava nei oia i te haafariu ê i te huitaata nei i te Poiete. I to Iesu tamataraahia i roto i te medebera, eita e nehenehe e parau e ua tamatahia o ˈna e te ino, aore ra na roto “i to ˈna iho teoteo”, no te mea aita e ino aore ra e teoteo i roto ia ˈna. Te parau ra hoi te Bibilia no nia ia Iesu e “o tei maitai roa ra, e te rave ore i te ino, e te viivii ore, e te taa ê hoi i te feia rave hara ra”. — Hebera 7:26; Luka 4:1-13.

Te hiaai i te mana

Na te aha hoi i turai ia Satani ia patoi atu i te Atua? Na to ˈna ïa hiaai i te mana, to ˈna hinaaro e faatere i te taata, te riroraa ei atua no ratou, oia hoi ia haamorihia oia (Korinetia 2, 4:4). Te mana e te tiamâraa, o ta Satani ïa i faaau atu ia Adamu raua o Eva: e ‘riro raua mai te Atua ra te huru’, e na raua iho e ite i te maitai e te ino, te mea tano e te mea hape (Genese 3:5). Te mana e te tiamâraa, o ta Satani ïa e faaau faahou ra i te feia e haamori ra ia ˈna.

Oia mau, teie ta te hoê taurearea haamori ia Satani, o Sean, i parau i muri aˈe i to ˈna haapoheraa i to ˈna mau metua e te tahi atu taata: “Ua tiamâ mai au. E nehenehe ta ˈu e taparahi i te taata ma te ore e tatarahapa.” I te tahi atu taime, ua papai oia i teie mau parau e to ˈna toto: “Te patoi atu nei au i te Atua, te patoi atu nei au i te Mesia, o Satani anaˈe ta ˈu e tavini. (...) Iaorana oe, e Satani.”

Ua faˈi o Randy Shores, te hoê taurearea tei apiti atu i mutaa ihora i roto i te hoê Ekalesia a Satani, e “mea faahiahia roa teie mana rahi”. Te na ô ra oia e ‘o te mana te arainu: te mana o te parururaa mai te pǔpǔ ia oe, te mau oroa, te miterio e te pifao no te hamani ino i te taata’.

E rave rahi mau taata haamori ia Satani e tiaturi nei e e horoa mai to ratou fatu i te tahi mana na ratou ia auraro atu ratou ia ˈna. No vetahi pae, e riro teie mana mai te ravea no te haapohe i te taata ma te ore ratou e haavahia. Te faaite maira te mau ohipa i itehia mai no nia i te mau ohipa taparahi taata a te feia haamori ia Satani e, te tiaturi nei teie mau taata e ia taparahi ratou i te taata, e mauruuru ïa te Diabolo ia ratou. No reira, e tia ia haapao maitai i teie haamǎtaˈuraa e rahi noa ˈtura, oia hoi te haamoriraa a Satani.

Eiaha e vare

Eiaha e moehia ia outou e e taata mau o Satani; e ere o ˈna i te taata haavare. Mea au roa na ˈna ia faaino i te Atua e Ta ˈna Parau, te Bibilia, e ia faatopa i te rahiraa o te taata i roto i ta ˈna mau herepata pohe. Teie râ, ua faanaho ê na Iehova i te mau ravea no te tapea ia ˈna, inaha, ua farii oia e ia tiavaruhia oia mai te mau raˈi mai e ia tapeahia oia na te hiti o te fenua nei, e eita e ore e tera te tumu i puai faahou ai te sataniraa. — Apokalupo 12:7-12.

E te mau metua, a ara maitai! I roto i te rahiraa o te mau tupuraa, ua itehia e ua apee atu te mau tamarii i te sataniraa no te mea aita to ratou mau metua i faaite i te here e te aroha o ta ratou e titau ra. Ua riro hoi te mau tamarii e manaˈo ra e aita ratou e tâuˈahia ra, ei mau tamarii o tei topa ohie noa i roto i te herepata o te feia e huti nei i te taata i roto i te sataniraa.

Auaa râ hoi, ua fatata roa te taime e ore ai te mana o Satani. Ua fatata roa o ˈna e to ˈna mau taata i te ite i te pau rahi o te aratai roa ˈtu i to ratou haamouraa. E faaohipa te Atua teitei ra o Iehova, ta Satani e ta ta ˈna mau demoni i faatihaehae atu ma te teoteo rahi, i ta ˈna Arii-Aito, o Iesu Mesia, no te haamou i taua mau varua iino ra (Ioane 1, 3:8; Apokalupo 20:1-3, 10). A tiai noa ˈtu ai i taua taime ra, a patoi atu ia Satani e a imi i te parururaa i roto i te faanahonahoraa hamani maitai a te feia haamori i te Atua mau ra, o Iehova!

[Tumu parau tarenihia i te api 9]

Ihea e itea ˈi i te parururaa mau?

I roto i te hoê rata i faataehia ˈtu i te Times Herald Record no Middletown (Fenua Marite), ua faataa mai te hoê taata e mea nafea to ˈna ôraa ˈtu i roto i te mau ohipa tahutahu. Ua hutihia to ˈna manaˈo na roto i te mau papai o na taote toopiti e faaau ra i te hoê ravea ia noaa mai te mana. “Ua faaohipa oioi atura vau i te mau faaueraa, o ta ˈna ïa e faatia ra. E te mea i noaa mai ia ˈu ra, e mau po riaria anaˈe ïa e ono hebedoma noa ˈtu.

“Auaa râ hoi, o ta ˈna ïa e parau faahou ra, ua faaitoito mai e piti Ite no Iehova ia ˈu ia pure ia Iehova, e ua na reira vau i te mau po atoa i te taime a haamata ˈi te tahi mau manaˈo huru ê roa i te tupu mai i roto ia ˈu nei.” Eaha ïa te mau faahopearaa i itea mai?

“I te po mehameha hopea, o ta ˈna ïa i parau, ua ite atura vau e ua faarue te mea e tapea ra ia ˈu i to ˈna haavî. (...) I muri iho, aita vau i haapeapea-faahou-hia mai teie te huru.” Ua parau taua taata nei e ua taa ia ˈna e “e faautua te Atua i te feia e rave nei i te mau ohipa tahutahu (Deuteronomi 18:10-13)”. — 27 no febuare 1988.

Te na ô ra te irava a te mau Papai i faahitihia e: “Eiaha roa te hoê i roto ia outou (...) ei pifao, e te hiˈo ata, e tei imi i te tapao, e te hiˈohiˈo, e te hebere, e te feia imi i te varua ino, e te taura, e te feia uiui i tei pohe ra. O te feia atoa hoi i rave i te reira ra mau peu, e feia faufau ïa na Iehova.”

[Tumu parau tarenihia i te api 10]

E te mau metua, a ara maitai!

No te mea mea puai roa te mana o te sataniraa i nia i te feia apî, e tia i te mau metua ia ite oioi noa i roto i ta ratou mau tamarii i te tapao no to ratou anaanatae no taua ohipa nei. Teie te mau aˈoraa ta Evon Peterson, taata aravihi i te pae no te mau haamoriraa a Satani, e horoa ra:

“E hinaaro ratou (te mau taurearea) e ia tiaturihia ratou (...), ia tâuˈahia ratou (...), ia haapaohia to ratou manaˈo. Mea aravihi roa te feia haamori ia Satani no te faaroo i te taata. Mai te peu e eita te mau metua to pihai iho i ta ratou mau tamarii, area te feia haamori ia Satani ra, tei reira ïa ratou.”

Teie te faaararaa a Angelo Pierri, taata aˈo i roto i te New Jersey (Fenua Marite): “E manaˈo paha outou e e peu noa teie, inaha, tera mau ta te feia haamori ia Satani e hinaaro ra ia manaˈo outou. Aita ratou e titau ra e ia faahitihia to ratou parau aore ra ia faaite-roa-hia ta ratou mau ohipa.”

Mea faufaa roa ia haapao maitai te mau metua i te huru upaupa e faaroohia ra e ta ratou tamaiti aore ra ta ratou tamahine. Ua î roa hoi te upaupa rock heavy metal i te mau poroi e te mau taipe a Satani. “Ua ino roa hoi teie huru upaupa na roto i te mau titauraa e taparahi i te taata e te haavîraa puai, o ta Evon Peterson ïa e faataa ra. Te pahono ra oia i te hinaaro o te mau tamarii ia faaite i to ratou huru hamani ino.”

I te matahiti i mairi aˈenei, i roto i te New Jersey, ua taparahi pohe roa te hoê tamaroa 14 matahiti i to ˈna metua vahine e te tipi, e i muri iho, ua haapohe atoa oia ia ˈna iho. Ua î roa te mau pǎpai o to ˈna piha i te mau hohoˈa o te feia hauti upaupa rock heavy metal. Ma te oto rahi, teie te tiaororaa a te metua tane o taua tamaroa nei: “A parau atu i te mau metua ia haapao maitai i te huru upaupa ta ta ratou mau tamarii e faaroo ra.” Ua faaite o ˈna e i roto i te hebedoma taatoa na mua ˈtu i te ati, aita ta ˈna tamaiti i faaea i te himene i te hoê himene rock e na ô ra e “e toto e a taparahi i to metua vahine”.

Papu maitai, ua riro mau â te sataniraa ei haamǎtaˈuraa e rahi noa ˈtura e ei ati pohe. Te mea matamua te tia ia rave no te parururaa ia ˈna iho, o te iteraa ïa e eaha râ teie ohipa, e i muri iho, a patoi roa ˈtu. Aita te Bibilia i faarahi roa i ta ˈna parau ia faaite oia e e tia ia tatou ia aro atu i “te mau varua iino i te reva nei”. (Ephesia 6:12.) Te vai mau ra o Satani e ta ˈna mau demoni, e na ratou e turai ra i te taata ia rave i taua mau peu diabolo atoa ra.