Te hoê ohipa hamani ino—No te aha?

UA HAAMATA te sataniraa, aore ra te haamoriraa i te Diabolo, i te omuaraa o te huitaata nei. I te ǒ i Edene ra, ma te tapuni ia ˈna, ua aratai o Satani i te tane e te vahine matamua ia faarue i te Poiete, o Iehova (Genese 3:1-6; Apokalupo 12:9). No te ohipa o ta raua i rave, e haamanaˈo-noa-hia o Adamu raua o Eva mai na taata matamua i pee ia Satani.

I roto i te mau tausani matahiti, ua rau te mau huru hairiiri o te sataniraa: te peu hiˈohiˈo, te tahutahu ereere, te pifao, e te vai aturâ. Ma te haavare râ, ua huna noa na ta ˈna mau pǐpǐ i te iˈoa o Satani e te vai-mau-raa o ta ˈna haamoriraa.

Mai te omuaraa o te senekele XX, ua itehia te hoê anaanatae apî no te haamoriraa ia Satani, e inaha, i teie mahana, ua parare roa ïa oia na te ao atoa nei. Ua fa maira te sataniraa i roto i te faaroo ma te puai manaˈo-ore-hia. Ma te faaite roa mai i to ˈna huru e ma te tatara i te hohoˈa tura maitai e huna ra i to ˈna huru mau, ua turai o Satani i te taata ia haamori ia ˈna na roto i te ravea hamani ino roa ˈˈe.

Te hoê o te mau metua o te sataniraa o teie nei tau, o te taata beretane ïa o Aleister Crowley. I te matahiti 1905, i Los Angeles, ua faanaho oia i te hoê pǔpǔ haamori ia Satani tei topahia i te iˈoa ra “Ordo Templi Orientis” e ua fariihia ˈtura oia mai te taata aratai o te hoê haamoriraa e rahi noa ˈtura. I roto i ta ˈna Buka o te ture (beretane), teie te parau faaroo apî a Crowley: “A rave mai ta outou e hinaaro: tera hoi te ture mau.” Ia au i teie manaˈo, ua faaitoito oia e ia ofatihia te mau huru ture atoa i te pae morare e te mau faaueraa tumu bibilia atoa i matauhia, ma te faateitei i te ohipa taparahi taata, te haavîraa puai, te haruraa i te vahine e te mau tusia taata.

No nia i te mau tusia taata, ua papai o Crowley e: “Te haamâha nei te tusia taata i te rahiraa o te mau hinaaro; ua riro te hoê tamarii tamaroa hapa ore e te maramarama roa ei tusia maitatai roa ˈˈe.” Ua faahiahia roa o Crowley i te parauraa e o ˈna te “taata ohipa iino roa ˈˈe o te ao nei”. I muri aˈe i to ˈna tapearaahia i roto i te hoê fare rapaauraa i te feia upoo ino, ua parauhia e ua pohe oia i te fenua Beretane, i roto i te hoê fare nainai, i muri aˈe i to ˈna raveraa i te raau taero.

Teie râ hoi, aita te haapiiraa a Crowley — “e rave mai ta oe e hinaaro” na nia i te iˈoa o te haapaoraa — i pohe atoa na muri ia ˈna. Inaha, teie ta te hoê taata hiˈopoa i parau: “Te vai noa nei te mana o Aleister Crowley i nia i te [oire no Los Angeles], teie râ, mea haihai roa ta ˈna mau ohipa hairiiri i rave ia faaauhia i te mau ohipa e ravehia nei e te feia haamori ia Satani no teie tau.”

Te auraroraa i te Diabolo

Te tiaturi nei te mau taata haamori ia Satani e na to ratou fatu e faatere nei i te ao nei. Hau atu, ia au i ta Robert Barry i papai i roto i te National Sheriff, “i te hopea o teie nei ao, e upootia mai te mau nuu a Lucifer i nia i te mau nuu a te Atua e a te Mesia, e e riro mai ratou ei mau fatu no te mau raˈi. No reira, te horeo nei te feia haamori ia Satani e auraro atu i te Diabolo ia turu mai oia ia ratou, eiaha noa i roto i teie nei ao, i roto atoa râ i te ao no a muri aˈe”.

Te parauhia ra e te tiaturi nei te tahi atu feia haamori ia Satani e, “te apiti nei te Mesia e o Satani no te faatupu i te hopea o teie nei ao”. Ia au i te haapiiraa a te tahi atu Ekalesia a Satani, o Satani “te taata rave ohipa” a te Mesia. No reira, mai ta Maury Terry i papai i roto i ta ˈna buka Te ino rahi roa ˈˈe (beretane), “te haamoriraa ia Satani o te haamori-atoa-raa ïa i te Mesia. Te taparahiraa i te taata na nia i te iˈoa o Satani, oia ïa te taparahiraa no te Mesia, e inaha, te raveraa ïa i te ohipa i faauehia mai e te Atua”.

Ua faahiti o Aleister Crowley i “te parau faaino, te ohipa taparahi taata, te haruraa i te vahine, te orureraa hau e te mau mea iino atoa”, ei haapiiraa e ei peu faaroo na ˈna. Hau atu, teie te parau o ta te hoê raatira no te faaroo a Satani i parau i te hoê mahana: “E TIA IA OUTOU IA TAPARAHI I TE TAATA!” Tera mau hoi ta te feia haamori i te Diabolo i rave tamau noa.

Teie te faataaraa i horoahia no nia i to ratou haerea hamani ino: “E ravehia te ohipa haruraa i te vahine no te hamani ino i te hoê paretenia, e auraa taa ê hoi to teie ohipa no te feia haamori ia Satani. Ua riro te tutuiraa i te auahi ei taipe no te aroraa rahi, aore ra no Aramagedo. Area te mau taparahiraa taata ra, e ravea ïa te reira no te faatupu i te arepurepu e no te pee maite i te tohu a Daniela e na ô ra e: ‘Area te feia ino ra, e rave ïa ratou i te ohipa ino.’”

Ia tuatapapa maite tatou i te mau tiaturiraa a te feia haamori ia Satani, e ite ïa tatou e te manaˈo ra vetahi e e tia ia haamori ia Adolf Hitler. Mai ta te hoê taata papai buka i papai, “te manaˈo nei ratou e e haamataraa noa te haamouraa i ravehia e Hitler, e te hinaaro nei ratou ia vai ineine noa no te mahana rahi”.

No te aha hoi ratou e hinaaro ai e faahanahana ia Hitler? Te faataa ra te papai vea ra o Maury Terry e, ua taaihia te hoê o te mau tumu i “te hoê tabula numera i reira te reta tataitahi o te piapa e tuea ˈi i te hoê numera. Ia au i teie tabula, te A e 100 ïa, e te Z, e 125 ïa. Ia amuihia te mau numera atoa e tuea ra i te mau reta o te iˈoa ra Hitler (oia hoi 107, 108, 119, 111, 104, 117), e itehia mai ïa te numera 666, oia hoi te numera o te puaa rahi i faataahia i roto i te buka bibilia o te Apokalupo. Te numera o te diabolo”.

Te taa ˈtura ïa ia tatou e no te aha râ e itehia ˈi teie numera 666 na te mau vahi atoa, na nia i te mau pǎpai o te mau fare i reira te mau pǔpǔ a Satani e putuputu ai aore ra na nia i te purumu. E papaihia te mau reta HT e HH no Hitler, e te auraa o te mau reta ra SS mai te mau uira ra te huru, o “te puai ïa, mai te raˈi mai e tae roa ˈtu i te poauahi”. Te faaohipa atoa ra te feia haamori ia Satani i te satauro gammée. Ia au i te hoê taata haamori ia Satani, “e mau tapao anaˈe ïa teie no te puaa — Satani-Hitler — o ta ratou e tavini ra”.

Te mau putuputuraa hamani ino

Ua tapaohia e e putuputu te mau pǔpǔ e piti ahuru taime i te matahiti i te mau oroa taa ê e tupu i te hoê â taime, i roto i te rahiraa o te mau tupuraa, e te mau oroa a te amuiraa faaroo kerisetiano. Ua tano maitai te reira i te haerea o te pǔpǔ, e hinaaro nei e faaino i te mau mea atoa e faarirohia ra ei mea maitai aore ra ei mea moˈa. E oroa faufaa roa o Halloween (te mahana na mua noa ˈˈe i te oroa no te mau Peata) na te feia haamori ia Satani. E tupu te mau pureraa ereere, aore ra sabati, i te mau vahi moe, o te taui haere noa. “Hou te hoê pureraa e haamata ˈi, o ta Maury Terry ïa e papai ra, e rave-ino-hia te hoê paretenia [potii apî], e ravehia te tusia auahi [tutuiraa i te auahi] aore ra te oroa taparahiraa i te hoê taata aore ra te hoê animala, ia papu maitai e e mauruuru o Satani.”

Mea pinepine roa te mau tusia uri e te piafare. Ei hiˈoraa, i roto i te hoê vahi i pihai iho ia New York, ua itehia mai e 85 tino pohe o te mau uri helemani e te mau dobermans i tâpûhia, i roto i te hoê matahiti, e ua parauhia e na te mau taata haamori ia Satani i rave i teie ohipa. I roto i taua mau pureraa ereere ra, mea pinepine te taata i te amu i te mau vahi o te tino pohe e tiaturihia e e mana tahutahu to ratou. E opere-atoa-hia te toto e inuhia i roto i te mau auˈa ario i eiâhia i roto i te mau fare pure — ei faahanahanaraa ia Satani. O te tusia taata iho â ïa te taoˈa pûpû faahiahia roa ˈˈe, te tusia faufaa roa ˈˈe i mua i te aro o te Diabolo e na roto i teie ravea e titauhia ˈi to ˈna turu.

O vai mau râ o Satani? Te vai mau ra anei oia? Aore ra e taata haavare noa anei oia no roto mai i te feruriraa o te hoê taata maamaa?

[Tumu parau tarenihia/Hohoˈa i te api 7]

Te mau tusia ia noaa te haamaitairaa a te Diabolo

I te avae eperera i mairi aˈenei, ua itea mai te hoê ohipa mehameha o tei faariaria roa i te taata. I Texas, i pihai noa iho i te oire otia ra no Matamoros, ua itehia mai te mau ivi o tau ahuru ma piti mau tane e mau vahine tei taparahihia i roto i te mau pureraa ereere. Teie te faataaraa a te vea ra Time:

“Ia mauruuru te diabolo ia ratou, ua haapihaa te feia taparahi taata i te roro e te mafatu o te feia ta ratou i taparahi, ma te anoi atoa ˈtu i te pape i tunuhia e te mau ivi rima e te mau ivi avae, e te mau upoo animala. No te taehae o taua feia haamori i te diabolo ra, fatata e maha mahana to na taote toopiti (...) raveraa i te ohipa no te hiˈopoaraa i te mau tino.”

Ua tiaturi te feia haamori i te Diabolo e ia pûpû atu ratou i te mau tusia taata na to ratou atua, e paruru mai oia ia ratou. Ia au i te hoê raatira mutoi, ua faatae te feia taparahi taata i te tahi mau pure i te Diabolo “ia ore ratou e roaahia i te mutoi, ia ore ratou e pohe i te ofai pupuhi e ia monihia ratou”.