Te hoê haamǎtaˈuraa riaria mau

Ua rahi roa te sataniraa, oia hoi te haamoriraa i te Diabolo. To ˈna mau tapao: te tusia animala e te tusia taata, te mau hamani-ino-raa i te pae taatiraa e te mau huru ohipa taparahi taata atoa. Eaha te mau tiaturiraa a te feia haamori ia Satani? No te aha teie anaanatae rahi no teie haapaoraa? Te pahono nei o “A ara mai na!” i teie mau uiraa e te faaite tahaa nei e o vai râ to muri mai i teie haapaoraa riaria mau ra.

UA OTI roa anei outou i te riaria ia manaˈo outou i te mau taata e auau atura i te tahi atu taata e i muri iho, mai te mau puaa taehae ra te huru, a taparahi atu ai ia ratou no te inu i to ratou toto e no te amu i to ratou mafatu e te tahi atu pae o to ratou tino, e te reira, na nia i te iˈoa o te haapaoraa?

E mehameha roa anei outou ia feruri outou e te vai ra te tahi mau metua tane e te mau metua vahine e pûpû atu nei i ta ratou mau tamarii ia taotohia ratou e ia hamani-ino-hia e a taparahi-pohe-hia ˈtu ai i nia i te fata i mua i te tahi atu mau taata?

E faufau roa anei outou ia manaˈo outou e te taati ra vetahi mau tane e te mau tino pohe i roto i te mau vahi vairaa taata pohe no te haamauruuru i te hoê varua o ta ratou e faariro ra ei atua no ratou?

E ere anei i te mea mehameha ia taio outou e ua taparahi vetahi mau tamarii apî i to ratou mau metua ma te aroha ore e a tâpû atu ai ia ratou, ia oaoa te Diabolo?

Eita paha outou e tiaturi e e nehenehe ta te tahi mau taata e haere e ǒ i te mau apoo tanuraa maˈi no te eiâ i te mau upoo e te mau manimani rima, o ta ratou e faaohipa i roto i te mau oroa faaroo?

Eaha to outou manaˈo no nia i te hoê haapaoraa e titau ra i te mau potii 13 e tae atu i te 25 matahiti ia fanau i te tamarii e faatusiahia i muri iho?

‘Auê ïa manaˈo apî to te feia taviri hohoˈa e!’ o ta outou paha ïa e parau ia taio outou i teie mau papai. ‘E haavare anaˈe hoi te reira.’ Mea papu mau anei râ?

Inaha, e parau mau anaˈe te mau mea atoa o ta outou i taio iho nei. Aita teie mau parau i papaihia e te hoê taata taviri hohoˈa. Oia mau, ua tupu paha teie mau ohipa i roto i to outou iho oire. E noa ˈtu e aitâ teie ohipa i tupu atura i ǒ outou, mea riaria roa ia manaˈo e e tupu a muri aˈe.

Te haapaoraa e rave ra i te mau oroa i reira e faatusiahia ˈi te mau animala aore ra te mau taata, e hamani-ino-hia ˈi te mau tamarii, e haruhia ˈi te mau potii apî, e faatupuhia te mau ohipa taiata e te tahi atu mau peu mai teie te huru, e parauhia ïa oia te sataniraa aore ra te haamoriraa a te Diabolo. No te faufau rahi o taua mau ohipa ra o te ore roa ˈtu e tano i te mau huru otia atoa, e rave rahi mau taata, te feia toroa teitei aore ra te taata haehaa roa, o te ore roa ˈtu e tiaturi e te na reira nei vetahi pae no te auraro i ta ratou haamoriraa.

Tau matahiti i teie, mea iti roa te feia haamori ia Satani; i teie nei râ, ua riro teie pǔpǔ ei ati pohe o te rahi noa ˈtura. Ia au i te hoê mutoi no San Francisco, “te sataniraa, o te haapaoraa ïa o te mau matahiti 80”. Teie ta hoê taata tuatapapa i te ohipa taparahi taata i Auteralia i parau: “I Auteralia, ua riro te sataniraa ei tuhaa no te faanahoraa o te ohipa taparahi taata. I to ˈu manaˈoraa, e 20 000 rahiraa taata to roto i te pǔpǔ tumu e rave nei i te haamoriraa ia Satani e te tahi mau oroa taiata e oia atoa te mau tusia animala e peneiaˈe atoa paha te mau tusia taata. Te tiaturi nei au e te rave atoa ra teie pǔpǔ i te mau tamarii e ua ô atoa ˈtu oia i roto i te ao o te raau taero e te ohipa heruraa i te mau vahi tanuraa maˈi.”

Ua faanahohia te feia haamori ia Satani na roto i te mau pǔpǔ e 9 e tae atu i te 13 melo — e hau atu i te tahi mau taime. Ia au i te feia mana marite, ua maraa te rahiraa o taua mau pǔpǔ nei i te fenua Marite mai fatata i te 10 000 i te matahiti 1946 ra e tae roa ˈtu i te 48 000 i te matahiti 1976 ra, e i te matahiti 1985, ua taeahia ïa i te 135 000. Aita râ e taahia ra e ehia pǔpǔ o te ore e faaohipa i te haavîraa puai e o te faataa ê maira i te mau pǔpǔ hamani ino. I roto i te vea no te 7 no mati 1986, ua faaite te National Catholic Reporter e “te vai ra e 150 pǔpǔ puai” i El Paso (Fenua Marite) “e 2 000 feia haamori ia Satani no te mau faito matahiti atoa”. Ia au i te Bulletin, te hoê vea a te mau mutoi no Pennsylvanie, “te parare roa nei te sataniraa i te fenua Marite. Aita te hoê mahana e mairi e eita e faaroohia i te parau no te mau ohipa iino i ravehia e te mau taata haamori ia Satani”.

Te teoteo nei te sataniraa no te mea ua ô atoa ˈtu vetahi mau taata e faaturahia nei i roto i teie haapaoraa — te mau taote, te mau paruru, te feia maona, te mau mutoi, te feia tiaraa i roto i te faaroo, te mau perepitero, te mau vahine e te mau faehau. Te imi-atoa-hia ra te taata i roto i te mau fare haapiiraa tuarua e te mau fare haapiiraa tuatoru. Ua manuïa taua mau ohipa nei e na te mau vahi e rave rahi, e mau taurearea anaˈe ïa to roto i te mau pǔpǔ.

Ua faahiti te New Zealand Herald o te 26 no atete 1988 i te parau no te mau “taurearea e 14 matahiti i hutihia i roto i te ao o te sataniraa”. Teie ta te hoê tia mana no Canada i parau: “Hoê â inoraa te mau tamarii (...) e rave nei i te sataniraa i te tahi noa taime e te mau taata a Satani itoito roa.”

I Canada, ua parau te hoê taata tiai i te hoê fare tapearaa i reira mea rahi roa te mau taurearea e: “Ua maere roa vau i te iteraa i teie rahiraa taurearea apî e haamori nei ia Satani. E nanaˈo ratou i te mau tapao a Satani i nia i to ratou tino e e rave ratou i te tahi mau oroa; mea puai roa to ratou tiaturiraa i te diabolo.”

Ua haapapu te hoê potii 18 matahiti tei tapeahia i te fare auri e mea rahi roa te mau vahine e faaô nei ia ratou i roto i te haamoriraa a te Diabolo. Ua faˈi te hoê taurearea no Canada, no Alberta, e no roto oia i te hoê Ekalesia a Satani e 400 melo. “E tia ia tâuˈa ˈtu i te mau taurearea e haamori nei i te diabolo”, o ta te hoê taata tuatapapa i te mau ohipa taparahi taata no Canada ïa i parau.

E faaô atu te taata tataitahi ia ˈna i roto i te pǔpǔ no to ˈna oraraa taatoa ma te horeo e ore e faaite i te parau. “Ia ite ratou i te mau ohipa taparahi taata a te pǔpǔ, eita te mau melo e faatia-faahou-hia ia faarue i te pǔpǔ, o ta te National Sheriff ïa i papai. Te taata e ofati noa ˈtu i te ture o te vai-mâmu-noa-raa, e nehenehe ïa o ˈna e to ˈna utuafare iho e hamani-ino-hia.” Ia au i te hoê tia mana no Chicago, “ua haamatarohia [ratou] ia ore ratou e paraparau. E ia paraparau noa ˈtu ratou, ua haamatarohia ïa ratou no te haapohe ia ratou”.

Te tamata nei te mau melo o te mau pǔpǔ a Satani i te huna i to ratou iˈoa ia ore ratou ia itehia e te mau mutoi. Ia au i te hoê vea, “te tiaturi nei ratou e eita o Satani e haamauruuru mai ia ratou no ta ratou mau ohipa iino mai te peu e e itehia to ratou iˈoa e e horohia ratou i mua i te tiribuna”. Mea varavara roa ia itehia mai i te haapapuraa e na ratou i rave i te tahi ohipa iino. I te tahi noa matahiti i teie nei to te mau mutoi maimi haamataraa i te ite i te tahi tuatiraa i rotopu i te tahi mau tapao i vaiihohia i nia i te vahi i taparahihia ˈi te taata e te mau pǔpǔ diabolo. Ei hiˈoraa, ua itehia mai vetahi mau api miomio o te Bibilia ua papaihia te mau satauro i nia iho e te tutae, aore ra te numera 666 i papaihia e te toto o te taata i taparahihia.

No te aha râ e ravehia ˈi te mau ohipa hamani ino na nia i te iˈoa o te haapaoraa? E faaitehia ˈtu vetahi mau tumu riaria roa i roto i te tumu parau i muri nei.

[Tumu parau tarenihia i te api 3]

Mea fifi roa ia tiaturi, e parau mau râ!

Teie tei taiohia i roto i te “Bulletin”, vea a te pu ohipa no te mau taata i moe a te Hau no Pennsylvanie (Fenua Marite): “Peneiaˈe paha, mea fifi roa na te mau mutoi maimi ia tiaturi i te mau faatiaraa parau riaria e faataa ra i te mau ohipa taparahi taata e ravehia na te mau taata e oomo nei i te ahu perepitero e tei faanehenehe ia ratou i te mau taipe a te Diabolo.”

Ia au noa râ i teie vea, “aita te hoê mahana e mairi e eita e faaroohia i te parau no te mau ohipa hamani ino i ravehia e te feia haamori ia Satani. Na te mau vahi atoa, te faataehia ˈtu nei i te mau mutoi te mau parau faaite no te mau taata i taparahihia, te mau vahine i haruhia, te mau taata i haapohe ia ratou, te mau tamarii i hamani-ino-hia, te mau taata e te mau animala i tâpûpûhia, e ua taaihia teie mau ohipa atoa e te haamoriraa ia Satani”.