1914—Te hoê tauiraa i roto i te aamu

E 75 MATAHITI i teie nei, ua haapohe aˈera te hoê ofai pupuhi i te taata huiarii ra o François-Ferdinand, e arii ra i Auteteria e i Hongrie. Te poheraa taua taata nei, te tumu ïa no te tahi mau ohipa i tupu, i te 28 no tiurai 1914, o te tuu roa i te ao nei i roto i te Tamaˈi rahi Matamua.

Aita te mau papai parau e tae noa ˈtu i te mau taata tuatapapa aamu i faaea i te faaite mai i taua tamaˈi riaria ra e te matahiti i tupu ai mai te hoê tauiraa, te hoê reni faataa-ê-raa i roto i te Aamu. Ua riro mau â nei te matahiti 1914 ei matahiti tapaohia no te huitaata nei?

E tapea mai na tatou i te mau parau ta John Wilson i papai no nia i taua tumu parau nei i roto i te Globe and Mail, te hoê vea teie e piahia i te mau mahana atoa i Canada e na ô ra e: “E tuhaa faufaa roa to te Tamaˈi rahi Matamua i roto i te aamu no teie nei tau.” Noa ˈtu â ïa e te tahi noa tau apoo tei heruhia e tei tupuhia i te aihere, no roto mai i taua tamaˈi rahi i tupu i roto i te ao nei, e tae noa ˈtu hoi te tahi mau mauhaa tamaˈi tutae-auri-hia, te tahi mau fare aore ra tii i patuhia ei haamanaˈoraa e te tahi mau menema, te faataa maira o Wilson Tane e aita roa ˈtu te tau i tatara noa ˈˈe i te mea ra e ua riro te matahiti 1914 ei tauiraa i roto i te Aamu.

Te na ô râ oia e: “Te manaˈo ra no te tau roa mai o te arii vahine ra o Victoria i Beretane i nia i te haere-noa-raa i te maitairaa, ua ore ïa a pohe ai 10 milioni taata i te pohe riaria mau. No roto roa mai te manaˈo feaa e itehia nei i to tatou nei tau i te faufaa ore e te vari o te mau aroraa i tupu i Vimy e i roto i te mau Flandres [i te pae Apatoerau no Farani e te fenua Peretita]. E ohie roa tatou i te faahohoˈa ia tatou i te mau potii rii peepee mau o te mau matahiti 20 aore ra i te feia faaapu tei topatari i te mau matahiti 30 ra maoti hoi [i te mau] taata patu i te mau hau emepera aore ra i te mau taata e anaanatae ra i te parau no te mau peu aore ra no te naturaraa taata na mua ˈtu i te matahiti 1914 ra. Ua riro mau te Tamaˈi Rahi ei tauiraa, (...) e te mau tau na mua ˈtu no roto ïa i te hoê tau tahito ta tatou e ore roa ˈtu i ite e teie e tahe nei i roto i te Aamu.”

Na te mau ohipa râ i tupu mai te matahiti 1914 maira e haapapu e ua riro mau taua matahiti ra ei tauiraa i roto i te Aamu. Maoti hoi i te riro, mai tei parauhia na, “ei tamaˈi e faaore roa i te mau tamaˈi atoa”, ua tatara te Tamaˈi rahi Matamua i te uputa no te hoê huru aroraa apî. Inaha, ua faatupu hoi oia i te Piti o te Tamaˈi rahi, e e riro te matahiti 1989 i te tapao i te pae ahururaa o te matahiti o taua tamaˈi ra. Inaha, e 50 matahiti i teie nei, i te 1 no setepa 1939, ua haaati aˈera te fenua Helemani i te fenua Polonia: ua haamata hoi te Piti o te Tamaˈi rahi. Ia taiohia i te 55 milioni taata ta ˈna i haapohe, ua hau aˈe ïa taua tamaˈi nei i te Tamaˈi rahi Matamua e ua faatupu hoi i roto i te feruriraa i te tahi mau haamǎtaˈuraa apî e te riaria mau hoi. Aita atoa hoi taua tamaˈi ra i faaore i te mau tamaˈi. Oia mau, mai te matahiti 1945 maira, 150 mau tamaˈi i tupu, e tei haapohe fatata e 20 milioni taata.

I te matahiti 1914 ra, ua ô mai te huitaata nei i roto i te hoê tau riaria mau. Ua papai mai te taata papai buka tei faahitihia o M. Wilson, e: “E feruri noa tatou ia manaˈo tatou e i muri aˈe i te tamaˈi riaria mau i roto i te mau apoo, ua haapeapea te totaiete taata i muri aˈe i te tamaˈi no te tanu i te feia pohe i anai-maitai-hia e a patu atu ai te tahi mau tii aore ra mau fare haamanaˈoraa ia ratou, inaha, te ora nei tatou i raro aˈe i te haamǎtaˈuraa o te hoê haamouraa rahi ta te mau faehau i haru ia Vimy i ore roa ˈtu i manaˈo. Mai te peu e tupu noa ˈtu te toru o te tamaˈi rahi, na vai ïa e faatia i te mau fare aore ra te mau tii e haapaohia no te feia pohepohe?”

Na mua roa ˈtu i te matahiti 1914 ra, ua faaite aˈena te Feia haapii Bibilia, matauhia i teie nei i raro aˈe i te iˈoa o te mau Ite o Iehova, e e riro taua matahiti ra ei tipuuraa i roto i te aamu o te huitaata nei. Ia au i te tuatapaparaa bibilia no nia i te tau, ta tatou hoi e nehenehe e tiaturi, i te matahiti 1914 ra te amuiraa taatoa nei i te ôraa i roto i te hoê tuhaa apî, te hoê tau hopea ta te mau Papai e parau ra e “[te mau tau hopea]”. — Timoteo 2, 3:1-5; Mataio 24:1-14.

Teie râ, ia au i te Bibilia, ua hau atu “[te mau tau hopea]” i te hoê anotau ahoaho mau; ei mau mahana tiaturiraa atoa hoi te reira. Maoti i te vaiiho i te taata ia haamou roa ia ˈna iho i roto i te hoê tamaˈi rahi hopea, te tǎpǔ maira te Atua e e ohipa mai oia e e aro oia i te feia atoa e faaî nei i te fenua nei i te haavîraa puai. E haamou-roa-hia te mau mauhaa tamaˈi i reira e a muri noa ˈtu. Eita te huiraatira taatoa nei e haapii faahou i te tamaˈi, i te hau râ (Isaia 2:2-4; Luka 21:28; Apokalupo 16:14). Auê hoi ïa tauiraa e! Papu maitai e e riro mau â te reira ei tauiraa rahi i roto i te Aamu.