Te pu o te mau faufaa mau

E HAAPUERAA ture iho â ta te totaiete taata tataitahi. E farii ratou aore ra eita, te hinaaro mau nei te mau taata atoa ia arataihia ratou e te hoê puai no rapae mai e te teitei aˈe hoi. Ma te hinaaro ratou aore ra eita, te fariu tia nei ratou i nia i taua puai ra, ia nehenehe ratou e haamori ia ˈna aore ra e tavini ia ˈna. O te mahana paha taua puai ra, te avae, te hoê fetia, te hoê mouˈa, te hoê anavai pape, te hoê animala, te hoê taata aore ra te hoê faanahonahoraa. I te tahi taime, e fariu tia ratou i nia i te hoê haapueraa ture morare e vai ra i roto i te hoê o te mau buka moˈa e rave rahi o tera aore ra tera nunaa. Taua hinaaro ra e itehia i roto i te taata, te itehia ra ïa i roto i te mau nunaa atoa.

Ia au i te taata ra o C. Jung, taote hiˈopoa i te pae no te feruriraa e tei tui hoi te roo, “ua riro te haapaoraa ei huru no roto roa mai i te taata e e itehia i roto i te roaraa o te aamu taata nei”. Ua faahiti atoa o Fred Hoyle, te hoê taata aivanaa tuiroo atoa, i te parau no te “haapueraa ture morare e vai ra i roto i te mau totaiete taata atoa”, ma te parau atoa e “e ere roa ˈtu i te mea fifi ia haaputuputu mai i te mau mea atoa ei haapapuraa e e nehenehe te pae morare o te taata e upootia i nia i te mau faahemaraa atoa [e te mau hamani-ino-raa] e tutonu tamau ra e haamou roa ia ˈna”.

Te farii ra te buka moˈa tuiroo roa ˈˈe e tei parare roa ˈˈe, oia hoi te Bibilia, i te vairaa mai taua pae morare ra e vai ra i roto i te taata nei. Teie hoi te taiohia i roto i te Roma 2:14, 15: “Te Etene hoi aita a ratou ture ra, ia rave noa ratou i ta te ture ra, ore noa ˈtu â ta ratou ture, o ratou iho â ta ratou ture: ua faaite hua hoi ratou i ta te ture i papaihia i roto i to ratou ra aau, te faaite ra hoi to ratou aau, e to ratou manaˈo te pari ra, e te faatia ra, ratou ratou iho.”

Ia au i te taata ra o Fred Hoyle, te haapiiraa tumu ore e haapii ra e mea tupu noa mai te mau mea atoa o “te hoê ïa uputa e matara ra i mua i te mau huru haerea atoa”. Te na ô râ oia e: “Inaha, ua riro roa to ˈu manaˈo i te tiaturiraa ra e ua tuu roa te oreraa e tiaturi i te tahi noa ˈˈe huru morare i fariihia e te tahi mau taata tei faahua parau e ua faahaamaramaramahia ratou i muri aˈe i te piaraahia te buka ra No hea mai te mau huru atoa, i te huitaata nei i roto i te hoê eˈa e aratai tia mau ia ˈna i te haamouraa. Ua tuuhia hoi te topita atomi o te haavaraa hopea. (...) E rave rahi teie e ite nei e te vai ra te hoê ohipa aita roa ˈtu e tano i roto i te totaiete; teie râ hoi, te haamâuˈa nei taua mau taata ra i to ratou taime e i to ratou itoito no te aro i te mea faufaa ore.”

E Maramarama to muri mai i te tumu iho o te ora

I muri aˈe, ma te taa maitai, te haapapu ra o Fred Hoyle e aita roa ˈˈe hoê noa ˈˈe ohipa e faaite ra e mea tupu noa mai te ora i nia i te fenua nei. “Te mau mea tano ore i ravehia e te haapaoraa”, ta ˈna ïa i parau, ua aratai ïa te reira i te mau aivanaa ia faarue roa i te manaˈo no te hoê puai poiete, te manaˈo ra râ oia e ua poietehia te ora e te hoê puai maramarama i te tahi vahi i roto i te ao nei. Ia au i taua taata ra, te mea i ore i nehenehe e tupu i nia i te fenua nei, ua tupu ïa i roto i te reva. Noa ˈtu e eaha, te tuu ra oia ei manaˈo tumu, te ohiparaa mai te hoê puai maramarama. No te huru fifi roa ia tuatapapa i te mea ora haihai roa ˈˈe, e tia ˈi ia tatou ia titau i te maramarama no te faataa mai i to ˈna faraa mai, noa ˈtu â ïa e eita ta Hoyle Tane e nehenehe e parau e taua maramarama ra, o te Atua ïa.

Area te tahi pae ra, “teie e ite atoa nei e te vai ra te hoê mea tano ore i roto i te totaiete”, te faaite nei ratou i te parau no nia i te Atua. Te hoê o ratou, o te taote rapaau i te mau maˈi i te pae feruriraa, o C. Jung ïa, tei faahitihia aˈenei. “Te taata aita i ati maite atu i te Atua, ta ˈna ïa i parau, eita ta ˈna e nehenehe e ore e topa i roto i te mau faaheporaa materia e morare a to teie nei ao. No te reira ra, mea hinaaro ïa na ˈna ia ite e ua hau aˈe oia i te tahi pae, ia noaa ia ˈna i te haapapuraa no roto roa ia ˈna iho aita anaˈe te reira ra, e moe roa ïa oia i roto i te rahi o te mau ohipa.”

No te haava ra o Francis Murphy, te hoê peretiteni no te haavaraa hororaa, te taata o teie nei tau “aita o ˈna i ite i te auraa hohonu mau o to ˈna oraraa e aita to ˈna manaˈo e papu maitai ra e e auraa mau anei to te oraraa. Noa ˈtu eaha te mau tumu morare ta ˈna e titau ra, ua tiavaru o ˈna i te Atua mai roto atu i to ˈna oraraa, i ta ˈna piha ohipa, e i to ˈna utuafare. Aita ˈtura ïa ta ˈna e aveia i te pae no te morare”. Te horoa atoa maira te ao i te pae no te taaroraa i te tahi manaˈo mai te reira te huru. No nia i te raveraa te tahi feia faaetaeta tino i te raau faaitoito, teie ta Howard Cosell i parau: “I te pae no te morare, aita faahou e aveia papu maitai i te Fenua Marite (...) e to tatou huru oraraa taatoa teie e fifi nei.”

Ia au i te vahine papai vea ra, o Georgie Anne Geyer, “mai te peu e eita o ˈna e tiaturi i te Atua, eita hoê noa ˈˈe pǔpǔ aore ra nunaa e nehenehe e riro ei pǔpǔ morare, no te mea e oioi roa te mau mea atoa i te faahoˈihia i nia i te manaˈo ra ‘o vau’, e o te ‘vau’ anaˈe ra, aita ïa to ˈna hoê noa ˈˈe auraa. (...) I te taime te parau ra ‘vau’ e riro ai ei aratai i te mau mea atoa — ma te ore hoi e tâuˈa i te Atua, i te haapaoraa, te utuafare fetii e te mau ture i fariihia i te pae no te huru tivila — te mau fifi e tupu ai”.

Ua parau o Aleksandr Soljenitsyne e, mai te peu e e anihia mai o ˈna ia faataa na roto i te tahi noa parau eaha te tapao matamua o teie senekele e XX, e parau ïa o ˈna e “ua moehia te Atua i te taata”. Te na ô râ oia e: “Ua hutihia teie senekele e XX i roto i te tiaturiraa e aita e Atua e i roto atoa i te haamouraa ia ˈna iho. (...) Noa ˈtu eaha te ohipa e ravehia no te tatara mai i teie nei ao i to ˈna huru fifi mau i teie mahana, eita roa ˈtu ïa e manuïa, mai te peu râ e hoˈi faahou mai tatou ma te tatarahapa i pihai iho i te Poiete atoa, e manuïa ïa. Mai te peu eita ra, eita roa ˈtu ïa tatou e ite faahou i te uputa e matara ˈtu ai i rapae e e faufaa ore hoi ta tatou maimiraa i taua uputa ra.”

E 6000 matahiti te maororaa, ua pee noa te taata i to ˈna haerea ma te haamau oia iho i te mau ture no nia i te maitai e te ino. I teie nei, te hinaaro ra te mau manaˈo apî e ia rave noa te taata tataitahi mai ta ˈna e hinaaro, i te mea hoi e ua ore te parau no nia i te maitai e te ino. E te faahaamanaˈo maira hoi te tuatapaparaa i te mau faahopearaa iino mau e iteahia no roto mai i taua na huru e piti nei, ma te horoa mai i te haapapuraa e e ere tei te taata te aratairaa i to ˈna haerea. “E mea tia ïa i to ˈna manaˈo, o te hopea râ o taua eˈa ra, o te pohe ïa.” (Maseli 14:12; Ieremia 10:23). Na te Atua ra o Iehova i poiete i te taata, e ua ite maitai o ˈna i to ˈna huru. Ua horoa atoa mai oia i te aveia e faaite mai ia ˈna i te eˈa e oaoa ˈi oia: “E lamepa ta oe parau i to ˈu nei avae, e tiarama no to ˈu nei mau eˈa.” (Salamo 119:105). Te faaite maira ta ˈna Parau, te Bibilia, eaha te mau mea faufaa roa ˈˈe e faaoaoa i te taata. Na te tabula ïa i pihai noa mai e faataa poto mai eaha te tia ia rave e eaha te ore e tia ia rave.

[Tumu parau tarenihia i te api 25]

Te mau faufaa te tia ia faaturahia

▸ A here ia Iehova ma to mafatu atoa, e ma to aau atoa, ma to nephe atoa e ma to puai atoa.

▸ A here i to taata-tupu mai ia outou iho na.

▸ Ia na reira outou ia vetahi pae mai ta outou e hinaaro ia na reira mai ratou ia outou.

▸ A pee i te hiˈoraa o Iesu.

▸ Ia faaore na outou i ta vetahi ê ra hara mai ta outou e hinaaro ia faaore mai ratou i ta outou.

▸ A faatura ˈtu i to outou metua tane e to outou metua vahine.

▸ A faatura ˈtu ia vetahi ê.

▸ Ia ore na outou e taiva i roto i te mau ohipa atoa ta outou e rave.

▸ Ia hau na outou e te taatoaraa.

▸ A faaohipa i te mǎrû, te hamani maitai e te hitahita ore.

▸ Eiaha na outou e faahoˈi atu i te ino ma te ino.

▸ Ia faaitoito na outou i te rave ia upootia te maitai i nia i te ino.

▸ Eiaha e haamori i te mau atua haavare.

▸ Eiaha e tuturi i mua i te mau hohoˈa.

▸ Eiaha e taparahi i te taata.

▸ Eiaha e eiâ.

▸ Eiaha e pari haavare noa.

▸ Eiaha e faahiti faufaa ore noa i te iˈoa o te Atua.

▸ Eiaha e nounou ta vetahi ê ra taoˈa.

▸ Eiaha e vaiiho i te mahana ia mairi i nia i to outou riri.