Te papai mai nei te feia taio

SIDA

Na nia i to ˈu toroa taote, te turu nei au i te mau haamaramaramaraa ta outou e horoa ra no nia i te SIDA i roto i ta outou vea (8 no me 1988). Ua haamau vau i te Pu [marite] i te pae no te tâpûraa e te rapaauraa i te taata ma te ore e faaohipa i te pâmuraa toto. I te mea e te pûpû atu nei matou i te taata i te hoê huru rapaauraa o te ape i te ati o te SIDA, mea faufaa roa ïa teie mau tumu parau no ˈu iho nei, no ta ˈu mau rave ohipa e no te feia ta matou e rapaau ra. Te hinaaro nei au e horoa i teie vea na to ˈu mau hoa ohipa atoa; e nehenehe anei ta outou e hapono mai hoê hanere rahiraa vea?

F. G., raatira no te piha rapaauraa a O. R., Fenua Marite

Te papai atu nei au i teie nei parau iti no te haamauruuru ia outou no te mau tumu parau no nia i te SIDA tei tuati maite i te ite aravihi, e tei neneihia i roto i te A ara mai na!. Ua itea mai ia ˈu i teie nei vea i nia i te purumu e ua î roa hoi i te repo. Aitâ vau i haapii aˈenei i teie mau huru parau no nia i te SIDA e to ˈna parareraa. Aita i maoro roa aˈenei, e piti taime to ˈu pâmuraahia i te toto, e maitai pai e aita te tirotiro o te SIDA e “taoto” noa ra i roto i te tahi mau tuhaa o to ˈu nei tino.

G. T., Etats-Unis

Ua anaanatae roa vau i teie nei tumu parau (noa ˈtu te mau parau atoa ta ˈu i taio e i faaroo aˈenei no nia i taua tumu parau ra). Teie râ te tahi manaˈo to ˈu. Te parau nei outou e “te tapea-maite-raa (...) i te hoê haerea e au i te mau faaueraa tumu i haamauhia e te Poiete”, e riro ïa te reira i te paruru ia tatou i te SIDA. Teie râ, i roto i te mau parau apî a te afata teata, ua faaroo vau e i te mau vahi i reira ua navai maitai te rahiraa huiraatira e te rahiraa o te feia i roohia i te SIDA, e “nehenehe” te tirotiro e ô atu i roto i te hoê taata na roto i te arai o te naonao. No reira, EITA roa ˈtu e tia ia manaˈo vetahi mau taata e ua paruruhia ratou i te hoê maˈi e parare noa ra na roto i te totaiete taata inaha, tei roto atoa hoi ratou i teie totaiete nei. E teie te manaˈo hopea, te ravea hoê roa e paruruhia ˈi tatou i te SIDA oia ïa ia pee TE TAATOARAA O TE TAATA “i te mau faaueraa tumu i haamauhia e te Poiete”.

D. S., Etats-Unis

Aita roa ˈtu matou e faahapa ra i te manaˈo o D. S. Aita matou i hinaaro e parau e ia pee tatou i te mau faaueraa a te Poiete, eita roa ˈtu ïa tatou e roohia i te SIDA i teie nei iho. Te haapapu nei râ matou e ua riro teie haerea ei ravea papu roa ˈˈe no te ape i taua maˈi ra. — Te feia nenei.