Eita anei te pâpa e hape?

‘TE HAAPIIRAA e itea ˈi te upootiaraa te haapaoraa katolika i nia i te parau no te faatitiaifaroraa i te mau haapiiraa faaroo ma te faahepo te manaˈo.’ Mea na reira, i te matahiti 1870, te vea jésuite ra La Civiltà Cattolica fariiraa i te pûpûraahia i te haapiiraa no nia i te aueueraa te pâpa e te apooraa matamua a te mau epikopo i tupu i Vaticana.

I roto i te huru paraparau faaroo a te katolika, te parau ra “tooma” [haapiiraa] o te mau haapiiraa “eita e nehenehe e patoi”. I te matahiti 1870 ra, ua faataahia mai te parau no te oreraa te pâpa e hape e ua fariihia e te apooraa a te mau epikopo mai teie te huru:

“E tooma hoi teie i faaitehia mai e te Atua, oia hoi ia faahiti te Pâpa roma ra i te parau ra ex cathedra, oia hoi, mai te peu e i roto i to ˈna toroa orometua e taote no te mau kerisetiano atoa, e no to ˈna mana teitei roa ia au i to ˈna tiaraa aposetolo, ia parau oia e e tia te hoê haapiiraa no nia i te faaroo aore ra i te mau peu ia haapaohia e te Ekalesia i roto i te ao nei, oia hoi, maoti te tauturu a te Atua i tǎpǔhia mai ia ˈna na roto i te taata maitai ra o Petero, e fanaˈo oia i taua huru aueue ore ra ta te Faaora i hinaaro e horoa mai no ta ˈna Ekalesia ia faataa mai oia i te parau no te hoê haapiiraa no nia i te faaroo aore ra no nia i te mau peu; e oia hoi, eita teie huru faataaraa a te Pâpa roma ra e nehenehe e tauihia, e noa ˈtu te vai ra te parau faatia a te Ekalesia”.

Te hoê ravea tano maitai

Ma te fifi hoi te auraa o teie parau ia taahia e te taata a tahi ra a taio ai, ua faarirohia atoa hoi taua parau nei ei parau papu ore e te taata ra o August Hasler, te hoê taata helemani tei tuatapapa i te parau no nia i te Atua e tei pohe i teie mahana. E faahiti na o ˈna i te parau no te “papu-ore-raa” e te “ereraahia i te maramarama” o te parau ra ex cathedra, ma te faataa mai e “eita e nehenehe e taa eaha te mau opuaraa te tia ia faarirohia ei mau opuaraa aueue ore”. Te tahi atoa taata tuatapapa i te parau no nia i te Atua, o Heinrich Fries, teie e parau nei e e ere roa ˈtu taua faataaraa parau ra i te mea “papu”, area o Joseph Ratzinger ra, te parau ra ïa oia e ua faatupu taua tumu parau nei i te tahi “manaˈo aimârô”.

Ia au i te taata ra o August Hasler, maoti “te papu-ore-raa o te mau manaˈo” e nehenehe ïa e faaohipa i taua tooma ra i roto i te hoê huru faaohiparaa aano, no te faarahi atu â i te mana o te pâpa, aore ra no te horoa mai i te tahi maa tatararaa iti, ia nehenehe tatou e parau e ua faahitihia te mau haapiiraa hape i mutaa ihora i rapaeau mai i taua “mana” faahua aueue ore ra. Oia hoi, e ravea maitai roa te reira e ore ai e noaa i te faahapahia.

Te auraa o te parau ra “hapa ore” eita roa ˈtu ïa te pâpa, noa ˈtu e e nehenehe oia e roohia i te hape mai te mau taata atoa, e hape noa ˈˈe, ia faahiti oia i te parau ex cathedra — i roto i to ˈna tiaraa orometua no te Ekalesia katolika — ia faataa mai o ˈna i te mau tumu parau no nia i te faaroo e no nia i te morare.

Eaha râ ïa te manaˈo o te mau katolika i taua haapiiraa ra?

[Hohoˈa i te api 4]

Ua haamau te pâpa Pie IX i te tooma no nia i te oreraa te pâpa e hape i te matahiti 1870 ra.

[Faaiteraa i te tumu]

Culver Pictures