To ˈu fifi rahi roa ˈˈe: o te teoteo ïa

MEA fifi roa ia oaoa mai te peu e e taata huma oe. E riro te rahiraa o te mau taata i roohia i te hoê hapepa i te pae tino, i te hepohepo roa i te tahi mau taime. I roto i taua mau taime ra, e pinepine ïa ratou i te aniani e: “No te aha o vau?”

Mai te reira atoa to ˈu huru. I te mea e ua roohia vau i te hoê hapepa rahi i te pae tino nei mai to ˈu fanauraahia mai â, eita vau e nehenehe e haere, e tia i nia e e faaohipa atoa i to ˈu nau rima. Oia mau, ua taui roa teie ati i to ˈu nei huru. Te haamanaˈo râ vau i to ˈu pohehae e to ˈu inoino rahi, a vai tamarii noa ˈi au e a ite ai au i te tahi pae i te hororaa e te ouˈaraa.

E haere na vau i roto i te hoê fare pure tapiri i ǒ ˈu nei, no te taparu ia tauturu mai te Atua ia ˈu. Ma te aau tae, e faahiti na vau e 20 aore ra e 30 taime i te pure ra “Padre Nuestro” (“To matou metua”) e oia atoa te “Ave Maria” (“Ia ora na, e Maria e”), i te na ôraa atoa ˈtu ma te taparu e te aau mehara e, “E te Fatu e, a faaora mai ia ˈu!”. E opua na vau i mua i te Atua e rave i te tahi mau ohipa faahiahia roa mai te peu e e faaora mai o ˈna ia ˈu.

Te mau hotu o te teoteo

Ua fanauhia vau i Grenade, te hoê oire nehenehe roa i te pae apatoa no Paniora, i raro noa mai i te mau mouˈa teitei o te Sierra Nevada. I to ˈu vai-tamarii-raa ra, no to ˈu hapepa, faaohipa aˈera vau i te tahi mau aravihi e inaha, i te hituraa o to ˈu matahiti, ua hau aˈe to ˈu ite i te fare haapiiraa i to te mau tamarii o to ˈu faito matahiti. I taua tau ra, e amuimui na vau i roto i te tahi atu mau tamarii ma te hauti atu na muri iho ia ratou e mea ite roa vau i te faatere i to ˈu parahiraa nainai. Ua haapii atoa vau nafea ia peni e ia papai e to ˈu avae aui ma te tapea i te penitara e te mau manimani.

I te hoê mahana, ua nenei te hoê vea no taua oire ra, i te hoê tumu parau no nia ia ˈu e te tahi mau hohoˈa e faaite ra ia ˈu e papai ra e to ˈu avae. Taa ê atu i te faahiahia o te taata no to ˈu nei huru, maoti taua mau parau ra i noaa mai ai ia ˈu i te tahi moni e te mau aniraa no te reva na te ara. Na teie mau mea i faarahi roa ˈtu â i to ˈu manaˈo faatiatia ia ˈu iho. Haamata ˈtura te teoteo i te ohipa mai i nia ia ˈu.

Te mau faahopearaa o te hoê faataa-ê-raa i faahepohia mai

I muri iho, aita ˈtura vau i haere faahou i te haapiiraa. A paari noa ˈi au, eita ta to ˈu metua vahine e nehenehe faahou e amo ia ˈu i rotopu i te fare haapiiraa e to matou vahi faaearaa i te tahua matamua o te fare. Mai te 13raa o to ˈu matahiti, ua tamau noa ˈˈera vau i ta ˈu tau haapiiraa na roto i te mau rata. Mea ohie roa na ˈu ia haapii e e haere noa na vau i mua, tera râ, ua mauiui roa vau na roto i taua faataa-ê-raa i faahepohia maira. E faaite noa na vau i te mata ataata e te manaˈo mahorahora maitai, teie râ, ua haamata aˈera vau i te feruri i nia i to ˈu nei huru e te mau fifi ta ˈu e farerei atu a muri aˈe.

I te matahiti 1971 ra, na roto i te hoê tataˈuraa, ua noaa maira ia ˈu te hoê tino moni o te tauturu ia ˈu ia haere i te haapiiraa i Madrid no te hoê matahiti, i roto i te hoê pû tautururaa i te feia huma e haapaohia ra e te mau paretenia. I reira to ˈu haapiiraa i te patapata i te matini ma te tapea i te hoê penitara i roto i to ˈu vaha, e ohipa faufaa roa hoi te reira no ˈu. Oia mau, e titauhia matou ia apiti atu i roto i te mau ohipa faaroo i te mau hebedoma atoa. Te mau sabati atoa i te hora 7, e haere ïa matou i te pureraa. I to ˈu manaˈoraa, mea faufaa ore roa teie peu, ua tamau noa râ vau i te haere i te mau oroa pureraa no te faatiaraa i te manaˈo o te mau paretenia, o te aupuru maitai ra hoi ia ˈu.

Hoê matahiti to ˈu faaearaa i Madrid, hoˈi mai nei au i Grenade. E au ra vau i te mau auri i roto i to ˈu piha, aita aˈera vau e hinaaro faahou te hoê taata ia haere noa mai e farerei ia ˈu. Ua faaohipa aˈera vau i te rahiraa o to ˈu taime no te taio i te mau buka aamu e te mau huru buka atoa. Ua rave atoa mai au i te mau peu apî o taua tau ra, mai te vaiiho-noa-raa i to ˈu huruhuru taa e te rouru roa atoa. Aita râ i itea mai ia ˈu i te oaoa.

Te hoê tapao

E pinepine te faaea-noa-raa o vau anaˈe iho e te manaˈo haafaufaa ore, i te haaparuparu roa i to ˈu manaˈo. I reira ïa vau e pure ai i te Atua, ma te ani atu ia ˈna ia faaite mai i te tahi tapao no te haapapu e te vai mau ra oia e te haapeapea maira oia no ˈu.

Ua itea mai iho â ia ˈu i te tahi tapao, e ere râ hoi te tapao o ta ˈu e tiai ra. Ua tupu teie ohipa i te hopea o te matahiti 1973. Ua tia maira te hoê Ite o Iehova i to ˈu uputa e, i te mea e ua haere to ˈu metua vahine e hoohoo haere, farii maira vau ia ˈna e ua faaroo atoa ˈtura. I te otiraa te aparauraa, ua faaau maira oia i te buka ra Te parau mau e aratai i te ora mure ore ra. Farii aˈera vau i taua buka nei, inaha, i taua tau ra, ua ineine noa vau i te taio i te mau huru papai atoa. E i taua avatea ra iho, ua oti ia ˈu i te taio i taua buka nei. Ua maere roa aˈera vau i te parau i papaihia i roto, i te mau opaniraa iho â râ no roto mai i te mau Papai: te faaohiparaa i te mau hohoˈa faaroo no te haamori i te Atua e te haapao-ore-raa i te pae no te faaohiparaa i te toto. — Exodo 20:4, 5; Ohipa 15:28, 29.

Ua hoˈi faahou maira te Ite i te hebedoma i muri iho. Ua faaite maira oia i ta te Bibilia e parau ra, area o vau ra, ua faaite atura vau ia ˈna e nafea vau ia tutui i te avaava e to ˈu avae. Ua ani maira oia ia ˈu e haapii i te Bibilia ma te tamoni ore, e ono avae te maoro. Farii oioi atura vau, aita râ vau i taa i reira e tera te tapao ta ˈu i ani noa na i te Atua.

Ua haapii oioi noa ˈtura vau i te mau parau no nia i te Bibilia. Teie râ, e ere roa ˈtu i te mea ohie ia taui i to ˈu oraraa ia au i to te hoê pǐpǐ mau a te Mesia. Na to ˈu hoi huru taata i haafifi rahi roa ˈˈe ia ˈu.

“E teoteo ra tei te ite”

Na te aamu i muri nei e haapapu maitai i to ˈu huru feruriraa i taua tau ra. E ono atura avae to ˈu haapiiraa i te Bibilia, haere mai nei te hoê tiaau haaati a te mau Ite o Iehova e farerei ia ˈu e ua ani maira oia e te haere ra anei au i mua. “Oia mau, ta ˈu ïa i pahono atu. E 500 irava bibilia tei mau aau ia ˈu.” “E pae hanere irava bibilia?” ta ˈna ïa i parau mai ma te tiaturi ore. “E, e 500. A hiˈo na, ua papai pauroa vau i taua mau irava ra i roto i teie buka”, ta ˈu ïa i pahono atu ma te teoteo.

No to ˈna hinaaro e ite e e parau mau anei ta ˈu, ua tamata aˈera oia i te Maseli 18:1. I reira iho â vau i te faahitiraa ˈtu i te mau parau atoa o taua irava nei: “O tei faataa ê ia ˈna ihora, te imi ra ïa i to ˈna ihora hinaaro; e mârô ai oia i te imi i te mau paari atoa ra.” Ani maira oia e: “Te faaohipa ra anei oe i teie nei irava? Te amui tamau ra anei oe e te mau melo o te amuiraa?” Te na reira ra hoi au, no te mea ua rave te mau taeae i te tahi mau faanahoraa ia nehenehe vau e tae atu i te mau putuputuraa.

I muri aˈe e piti aore ra e toru mau uiraa, taa aˈera i teie taeae i haere mai e farerei ia ˈu e, ua mau maitai ia ˈu teie mau irava atoa. Ua ite atoa râ o ˈna e mea faufaa aˈe na ˈu ia noaa i te ite no nia i te Bibilia maoti i te faaohipa i taua ite nei. Ua faahaamanaˈo maira oia i te irava o te Korinetia 1, 8:1 e na ô ra e: “E teoteo ra tei te ite, area te aroha e faarahi ïa i te maitai.” Ua tauturu aˈera oia ia ˈu ia taa e mea faufaa roa ia taui i to ˈu huru.

I roto i te roaraa o te tau, faaea ˈtura vau i te puhipuhi i te avaava, haamaitai atoa ˈtura vau i to ˈu huru rapaeau e ua haapae atoa ˈtura i te taio i te mau buka au ore. Bapetizo aˈera vau i te avae tiunu 1975, 18 avae i muri aˈe i to ˈu farerei-matamua-raa i te mau Ite o Iehova.

Te upootiaraa i nia i to ˈu teoteo

Teie râ, aitâ vau i manuïa ˈtura i te faaore i to ˈu huru teoteo. I te mea e e nehenehe ta ˈu e haapii e toru aore ra e maha hora i te mahana, aita i maoro, ua noaa maira ia ˈu i te hoê ite papu no nia i te Bibilia, o ta ˈu hoi i hinaaro e faaite oioi noa ia vetahi ê. Aita i maoro, haere mai nei te mau Ite no ta ˈu amuiraa e farerei ia ˈu no te ui mai i te tahi mau uiraa no nia i te Bibilia e no te faaite atoa mai i to ratou iho mau fifi. Ua oaoa roa ïa vau i te faaohiparaa i to ˈu aravihi no te tautururaa ia vetahi ê, teie râ, i te tahi mau taime, e riro na taua mau ohipa ra i te faarahi atu â i to ˈu teoteo.

Ua ore rii mǎrû noa ˈˈera to ˈu manaˈo faatiatia ia ˈu iho. I te mau taime atoa vau e ite ai i te teoteo i te tupuraa mai, e pure ïa vau ia Iehova e tauturu mai ia ˈu. Ua ani iho â râ vau ia ˈna ia tauturu mai oia ia faatupu vau i te mau manaˈo maitatai: oia hoi te faaohiparaa i to ˈu ite no te maitai o to ˈu mau taata-tupu, eiaha râ no te faahanahana ia ˈu iho.

Te hoê tumu e itea mai ai te oaoaraa mau

Ua riro te faaiteraa i to ˈu tiaturiraa i te mau taata atoa o ta ˈu e farerei, ei tumu e itea mai ai ia ˈu i te oaoaraa mau. Te paraparauraa ˈtu ia vetahi ê no nia i te mau mea o ta ˈu i haapii, eita noa te reira e faaoaoa ia ˈu iho, e turai atoa râ te reira ia ˈu, ia faaite i te mau mea o ta ˈu e tapea noa ra i roto ia ˈu nei e e tauturu atoa na te reira ia ˈu ia faaite i to ˈu manaˈo ia vetahi ê, e ia tauturu atoa i te tahi mau taata. No reira, ua oaoa roa ˈˈera vau i te tautururaa ˈtu i te hoê taata paari hoê â to mâua mau fifi.

I to ˈu farerei-matamua-raa ia ˈna, te tauaparau ra vau e e piti na taata i nia i te purumu. A paraparau noa ˈi vau, ite atura vau i taua taata ra i te haereraa e to ˈna nau turu tootoo, e i te tahi taime, e haere mai na oia na pihai iho ia matou. I te mau taime atoa, e faaea rii oia maa taime iti, e au ra e te hinaaro ra oia e faaroo i ta matou parau. I te pae hopea, tia mai nei oia i mua ia ˈu e ua ani maira: “E parau mau anei ta oe e parau ra no nia i te hoê diluvi rahi?” Ua pahono atura vau e e, e ua faataa ˈtura vau ia ˈna i te auraa o te diluvi no to tatou nei anotau. I muri aˈe, haamata ˈtura mâua i te haapii i te Bibilia.

Noa ˈtu to ˈna paari e to ˈna mau fifi i te pae tino nei, ua haere noa na oia i mua e ua faaohipa atoa oia i te mau faaueraa a te Bibilia. Ua bapetizo aˈera oia i te 80raa o to ˈna matahiti. Area ta ˈna vahine ra, tei faaooo na hoi ia ˈna i te haamataraa, ua bapetizo atoa ˈtura oia i te 85raa o to ˈna matahiti.

Te neheneheraa e tauturu i te feia huma aore ra te feia e hinaaro nei i te tahi atu mau mea, na te reira e tauturu ia ˈu ia haamoe i to ˈu fifi. Ua tauturu vau hoê ahuru feia ia ite i te parau mau e vai ra i roto i te Parau a te Atua. Ua riro mau â ïa te reira ei faaitoitoraa ia ˈu nei.

Ua upootia vau i nia i to ˈu teoteo

Te mea faufaa roa ˈˈe tei itea mai ia ˈu oia ïa, e ere roa ˈtu te hoê hapepa i te pae tino nei, i te hoê fifi rarahi roa o te tapea i te hoê taata ia haere na nia i te eˈa o te oaoa. Maoti te ite no nia i te Poiete, mea papu aˈe to ˈu manaˈo e e nehenehe ta ˈu e faaruru i to ˈu mau fifi, e oia atoa hoi te teoteo. Te faaitoito nei au i te ora mai te tahi atu mau taata. I teie nei, te oaoa nei au i te mea e na ˈu iho e haapao i to ˈu mau hinaaro i te pae faanavairaa faufaa. Mea au roa na ˈu ta ˈu hopoia matahiapo i roto i ta matou amuiraa e te tamata nei au i te apiti atu i roto i te pororaa i te parau apî maitai ma te itoito (Mareko 13:10). Ma te papu maitai, na te tauturu ta ˈu e pûpû atu nei na vetahi ê, e faaoaoa roa nei ia ˈu. Ua haapii atoa vau i te imi i te hanahana o te Atua, eiaha râ to ˈu iho nei.— Luka 17:10. — Faatiahia mai e José Martín Pérez.

[Hohoˈa i te api 17]

Te poro nei au na te mau aroâ ma te tauturuhia mai e te hoê Ite.