SIDA—Mau ati apî?

PENEIAˈE, te vai ra i roto i te ao nei 10 aore ra 20 mau milioni mau taata e tirotiro o te SIDA to roto ia ratou. I Colombie beretane, te hoê tuhaa fenua no Canada, te vai ra 10 000 e tae atu i te 20 000 mau taata tei peehia i te SIDA e te haapeapea nei te mau hui mana no te pae o te oraora-maitai-raa ia parare rahi noa ˈtu teie maˈi. No reira, ua nenei te tia o te hau no te pae o te Oraora-maitai-raa i te hoê vea, e ia au i ta ˈna parau, te faaite ra oia i “te mau haamaramaramaraa hopea nei no nia i te SIDA”.

Te faaara faahou nei teie vea eiaha ia taoto atu i te mau taata tei peehia i te tirotiro o te SIDA e eiaha atoa ia rave i te patia tei faaohipa-aˈena-hia e te hoê taata maˈi. Tera râ, tei roto te virus i te toto, e e nehenehe atoa tatou e roohia i te ati na roto i te tahi atu â mau mauhaa tei faaohipahia no te patia i te iri. Te faahiti ra teie vea i te mau nira patia uaua, te mau nira patia taria aore ra te mau nira nanaˈoraa iri. Te na ô faahou ra te vea e: “E mea atâata atoa ia rave i te hoê â tipi hahu taa, te hoê â purumu niho e te hoê taata tei peehia i te SIDA.”