Te hopea o te haaviiviiraa

“EITA e nehenehe e ape i teie faaotiraa: e ere roa ˈtu te mau mea e haaati ra ia tatou i te mea papu mai te manaˈo-noa-hia ra.” Mai te peu e ua riro teie mau parau a G. Taylor, taata papai i te hoê buka tuiroo roa, ei mau parau mau i te matahiti 1970 ra, ua hau atu ïa i te tano i teie nei mahana. I mua i te mau fifi e patoi nei i te faaoreraa i te haaviiviiraa, te iti noa ˈtura te mana a te taata nei. Ma te papu maitai, te hinaaro mau ra oia i te tauturu a te Atua.

I to te Atua poieteraa i te mau taata, ua horoa ˈtu oia na ratou i te hoê hopoia oia hoi te atuaturaa i te fenua nei (Genese 1:28; 2:15). Maoti râ hoi i te na reira, no to ratou poiri aore ra to ratou teoteo, ua haaviivii ihora ratou ia ˈna. Ua tǎpǔ mai râ te Poiete e ‘e haamou oia i te feia e faaino nei i te fenua nei’. I muri aˈe te Basileia o te Atua e haamou ai i te feia haaviivii, e nehenehe atura ïa te mau tumu o te haaviiviiraa e faaore-roa-hia. — Apokalupo 11:18.

Ma te faaite mai e mea nafea te haaviiviiraa ia faaorehia, te parau nei te Isaia 11:9 e: “E ore ratou e hauti, e ore e rave ino, i to ˈu atoa nei mouˈa moˈa, te na reira maira Iehova; e î hoi te fenua i te ite ia Iehova.” Ma te papu maitai, e haapii te Poiete i te mau taata i te mau mea atoa te tia ia ite no nia i te fenua e te natura no te atuatu i te reira ma te here e no te ore e faaino atoa ˈtu.

E faahoˈi faahou te Atua i te mau taata i nia i te faito taata tia roa, inaha mai te reira hoi to ˈna poieteraa i na taata matamua. I te mea hoi e e feruriraa tia roa to ratou, tei î i te ite mau e tei tuuhia ˈtu i roto i te hoê huru manaˈo hapa ore, eita ˈtura ïa te taata e hape faahou. Eita ratou e riro faahou ei mau taata huenane noa, e eita atoa to ratou puai e taotiahia mai teie e itehia nei. E faaatea ê atu te paruru a te Atua i te mau tumu atoa e nehenehe e faatupu mai i te ati, e oia atoa, e haavî-maitai-hia te mau puai o te natura. — Hiˈo Mareko 4:39.

E turai atoa “te ite ia Iehova” i te mau taata ia anaanatae i to ratou taata-tupu ma te here, ia faatura i te mau mea i poietehia e te Atua e ia faaite i te hoê aau mehara no ˈna, na te reira hoi e tapea ia ratou eiaha ia haaviivii i te fenua ma te opua mau. Inaha, ua ohipa aˈena teie ite i nia i te tahi mau taata tei haapae i te “taata tahito e ta ˈna atoa ra mau [peu]” e te faaitoito nei ratou i te ora ia au maite i te mau faaueraa tumu kerisetiano, mai teie: “E aroha ˈtu oe i to taata-tupu mai to aroha ia oe iho na.” Aore ra: “Ei parahiraa nounou taoˈa ore to outou.” E oia atoa: “Eiaha roa ei taata e imi i to ˈna anaˈe iho maitai, e imi râ te taata atoa i te maitai o vetahi ê atoa.” — Kolosa 3:9, 10; Mareko 12:31; Hebera 13:5; Korinetia 1, 10:24.

Te ati pohe tei tapeahia!

Aitâ tatou i faahiti atura i te parau no nia i te tumu hoê roa o te haaviiviiraa. Taua puai taparahi taata itea-ore-hia ra, o te Diabolo ïa o Satani, te enemi rahi o te Atua (Ioane 8:44; Hebera 2:14). No to ˈna feruriraa ino mau, te faatupu nei oia e rave rahi mau ravea ia ore te Atua ia faaturahia e no te faaino i ta ˈna mau mea i poiete. E ore roa te hoê fenua viivii e te reporepo e faahanahana i te Poiete, tei hamani ia ˈna ia vai mâ noa oia e te unauna atoa hoi; eita te mau taata, i poietehia ia au i te hohoˈa o te Atua, e faahanahana ra ia ˈna ia vaiiho noa ratou i te Diabolo ia haavare ia ratou na roto i te aratairaa ia ratou ia rave i to ˈna hinaaro (Ephesia 2:2). A ora noa ˈi o Satani, e tamau noa atoa te aroraa i te haaviiviiraa i te otohe i muri. Tera râ, eita te reira e tamau noa.

Teie ta te Atua i tǎpǔ mai: “Ite atura vau i te hoê melahi i te pouraa mai mai te raˈi mai (...). Ua haru ihora oia i te teni ra, i taua ophi tahito ra, oia hoi te Diabolo ra, o Satani, ua ruuruu ihora ia ˈna e ia hoê tausani i te matahiti (...) ia ore oia ia haavare faahou i te mau fenua, e ia hope roa taua na matahiti hoê tausani ra.” (Apokalupo 20:1-3). Teie melahi, o te Fatu ïa o Iesu Mesia, o te ruuruu ia Satani e o te faatiamâ mai i te ao taatoa nei i to ˈna mana hoê tausani matahiti te maoro. Te tumu hoê roa e haafifi nei i te haamauraa o te hoê ao viivii ore, ua iritihia ïa.

I roto i te Faatereraa hoê tausani matahiti a te Mesia, e nehenehe ïa ta te Fenua e faaore mǎrû i te mau faainoraa o te viiviiraa. E ohie noa te Basileia o te Atua i te tâtaˈi i te mau ino tei farereihia e a ˈna. A tiai noa ˈi tatou i te reira, e faaite tatou i to tatou paari na roto i te paruru-maitai-raa ia tatou i te mau faahopearaa ino mau o te haaviiviiraa. Parau mau, ua taotiahia tatou i roto i taua tuhaa ra. Ei hiˈoraa, e ere i te mea ohie ia pee i te aˈoraa a Tom Lehrer, tei parau na ma te hoata e eiaha e inu i te pape e eiaha e huti i te mataˈi. E nehenehe râ e rave i te tahi mau ravea (hiˈo i te tabula i te api 9).

A faaohipa noa ˈi tatou i taua mau ravea ra, e haamanaˈo ïa tatou e te paruru maitai roa ˈˈe no te patoi i te mau faainoraa o te haaviiviiraa, te tuuraa ïa i to tatou tiaturiraa i roto i te Basileia o te Atua. O ˈna anaˈe te nehenehe e faaore roa i teie fifi. I te matahiti i mairi aˈenei, ua faatere te mau Ite o Iehova i te mau hebedoma atoa, hau atu i te toru mirioni haapiiraa bibilia e te mau taata e hinaaro ra e ite i te mau huru e titauhia ra e te Atua no te ora i roto i te ao apî viivii ore ta ˈna e haamau atu. E hinaaro anei outou e fanaˈo i te hoê haapiiraa bibilia tamoni ore?

Mea oaoa mau â ia ite e e fatata roa te aroraa i te haaviiviiraa — teie ati pohe — i te faaea. Eita ïa tatou e roo-faahou-hia i to ˈna mau ino. Teie na taparahi taata toopiti, oia hoi te viiviiraa e to ˈna tumu hoê roa, te Diabolo ra o Satani, e haamou-roa-hia ïa raua.

[Tumu parau tarenihia i te api 9]

Nafea ia paruru ia tatou i te haaviiviiraa

◼ A haapao maitai ia outou iho, a rave i te tahi ohipa faaetaetaraa tino e a faafaaea atoa.

◼ Eiaha e puhipuhi i te avaava, eiaha e inu hua i te ava e e rave rahi roa i te raau, e a haapae i te mau peu atoa o te haaparuparu i te mau ravea parururaa o te tino.

◼ Eiaha e târaˈi rahi roa i te mahana.

◼ Mai te peu e, i roto i to outou fenua, e nehenehe te pape robine e viivii, a tamau i te tahi titia.

◼ Mai te peu e e nehenehe ta outou e na reira, eiaha e amu i te maa tei tuuhia te mau raau chimiques i roto.

◼ Eiaha e rave faufaa ore noa i te raau, no te mea e nehenehe atoa ratou e faatupu mai i te tahi mau huru au ore.

◼ A faatura i te mau ture no te arai i te viiviiraa.

[Hohoˈa i te api 10]

Eita roa ˈtu te ao apî nehenehe roa ta te Atua e haamau e roohia i te viivii e eita noa to ˈna nehenehe e riro ei moemoeâ.