Te mau mahana hopea—Te mau haapapuraa

“Aita i faaroohia te taˈi ǒě e aita e taata e taˈi ra noa ˈtu e e hia rahiraa taata e pohe ra no te mea te tiai paatoa ra ratou i te pohe. (...) Te parau ra e te tiaturi ra te mau taata e: ‘O te hopea teie o te ao nei.’” — O te faataaraa ïa a te taata papai Italia no nia i te mau pau i faatupuhia e te maˈi pee o te XIVraa o te senekele.

I MUTAA ihora, ua tiaturi hape noa vetahi mau taata aau tae mau, e te ora ra ratou i te mau mahana hopea. Mai tei faaitehia i roto i te tupuraa i nia nei ua faarirohia te maˈi pee ei tapao no te hopea o te ao nei. Ua manaˈohia e ua haapohe te reira hoê i nia i te toru o te huiraatira no Europa. Aita râ te hopea i tae mai. Aita i tae atura i te taime i reira te Atua e ohipa mai ai.

Nafea tatou e papu ai e ua tano te mau Ite a Iehova i to ratou pororaa e ua fatata te hopea o te amuiraa o te ao nei e ua fatata te Basileia o te Atua i te faatere mai i nia i te fenua taatoa nei? Te ravea hoê roa, maori ra ïa o te hiˈopoaraa i ta ratou parau e ua tano anei i te mau parau tohu a te Bibilia. Eaha te mau parau tohu o te faataa papu ra i te mau tupuraa o tei riro ei tapaˈo no te mau mahana hopea?

Tamaˈi, oˈe e te maˈi pee

Tei roto ïa te tahi o te mau hiˈoraa papu maitai o taua mau parau tohu ra i te orama tuiroo no nia i tei parahi i nia iho i te mau puaahorofenua o te Apokalupo 6:1-8. Teie ïa:

“Ua reva ˈtura te hoê puaahorofenua uteute: e e mana tei horoahia mai no tei parahi i nia ihora, ia faaore oia i te hau i te ao nei, e ia taparahi te taata ia ratou iho.” A tapao na, e iriti tei parahi i nia iho i te puaahorofenua i te hau i te fenua nei, eiaha râ i te tahi noa mau nunaa. E taahia ïa e te faahohoˈa ra oia i te hoê tau tamaˈi e te taparahiraa taata rahi i te ao taatoa nei. Ua itehia anei te reira i te XXraa o te senekele?

“E puaahorofenua ereere; e e faito tei te rima o te parahi i nia ihora.” Ua riro te reira ei faahohoˈaraa tano no nia i te ati poia, te itiraa mai te maa e te oˈe. Te itehia ra anei te reira i teie mahana?

“E puaahorofenua maheahea: e to ˈna iˈoa to tei parahi i nia ihora, o Pohe ïa, e o Hade tei pee i muri aˈe ia ˈna. E e mana tei horoahia mai no raua ia taparahi oia i te maha o te tufaa o to te ao nei i te ˈoˈe, e te maˈi, e te oˈe, e te puaa taehae o te fenua nei.” Teie te hoê faataaraa no nia i te pohe manaˈo-ore-hia, faatupuhia e te tamaˈi, te oˈe, te maˈi pee, te animala taehae, o tei haapohe oioi nei te taata e tei faaî i te apoo (Hade). Aita anei te mau ahuru milioni taata teie e pohe taue noa nei?

I te hoê â taime e teie mau orama, e ite-atoa-hia ra te mau tupuraa ta Iesu i tohu: “E tia mai hoi te tahi nunaa e aro i te tahi nunaa, e te tahi basileia e aro mai i te tahi basileia; e tupu hoi te maˈi maue [pee], e te oˈe, e te aueueraa fenua, i tera vahi, i tera vahi. (...) E tia mai hoi te peropheta haavare e rave rahi, e e rahi te feia vare ia ratou. E no te mea te rahi ra te ino, e toetoe atura te here mau o te taata e rave rahi.” (V.C.J.S.). Ua faaite atoa mai oia i te ohipa o te tupu i te ao taatoa nei, oia hoi te pororaa i te “parau apî maitai o te basileia”, hou a tae mai ai te hopea.

Ua faataa atoa te aposetolo Paulo i te huru o te taata i te mau mahana hopea, inaha teie hoi ta ˈna i parau: “E riro te taata nei ei miimii, e nounou moni, (...) e faaroo ore i te metua, e mauruuru ore, (...) e te hinaaro i te mau mea e navenave ai ra aore hinaaro i te Atua; e hohoˈa paieti hoi to ratou, o te puai râ o te reira ra, ua hunahia ïa ia ratou.”a

A haamanaˈo atoa e te faataa ra Iesu i te tau ino roa ˈˈe o te aamu o te taata nei, oia hoi e tupu taua mau mea atoa ra i roto i te hoê noa ui. Aita râ te parau tohu e haapapu nei e e tupu rahi roa teie mau mea aore ra e mea ino roa ˈˈe te reira i tei tupu aˈenei i roto i te mau ui i mahemo.

Ua ite anei outou i taua mau mea ra e taua mau tupuraa ra i te XXraa o te senekele, e mai te matahiti 1914 mai iho â râ? Te ite noa anei outou i te reira i teie matahiti 1988? Ei haamanaˈoraa, e hiˈopoa faahou na tatou vetahi mau ohipa taa ê o tei haafifi, e te haafifi noa nei â i te huitaata nei e i muri iho e pahono atu ai tatou i te uiraa: Te faaite ra anei ratou e ua fatata te taime i reira te Atua e to ˈna Basileia e ohipa mai ai? — Luka 21:29-33.

[Nota i raro i te api]

[Hohoˈa i te api 4]

I raro aˈe i teie tii taata haamanaˈoraa i te Tamaˈi Matamua o te ao nei, te vai ra teie mau parau (na roto i te reo beretane): “Ei haamanaˈoraa mure ore i te feia pohe hanahana no te oire no Evesham [Beretane] tei pohe no te aiˈa i te Tamaˈi Rahi.”