Te tuatapaparaa no nia i te ino mai ia Augustin e tae atu ia Calvin
I ROTO i ta ˈna buka Te oire o te Atua, ua haapapu o Augustin, taata tuatapapa i te parau no nia i te Atua no te senekele V ra, e o te taata te tumu o te ino e ere râ te Atua. Ua papai oia e: “Oia mau, ua poiete te Atua i te taata ma te tia; o te Atua te tumu no te natura eiaha râ no te ino; ma te opua mau, na te taata iho i haaviivii ia ˈna iho, ua haavahia oia ma te parau-tia, mea na roto i te toto to te taata horoaraa ˈtu i te viivii e te utua e vai ra i roto ia ˈna. (...) Inaha, e mea na roto i te faaohipa-tano-ore-raa i te tiamâraa te haamataraa mai te tau o te mau ati.”
E nehenehe paha teie faaohipa-tano-ore-raa i te tiamâraa e faataa i te mau ati e rave rahi, aore ra i te rahiraa o te mau ati, e haapeapea ra i te tahi mau taata; teie râ, e nehenehe anei e faahiti i teie tumu i roto i te mau ati mai to San Ramón? Eita anei te mau ati e rave rahi e tupu mai, noa ˈtu e aita te taata e hinaaro i te reira? E noa ˈtu e e maiti te taata i te rave i te ino ma te opua mau, no te aha ïa te hoê Atua aroha e vaiiho noa ˈi i te reira ia rahi noa?
Mai ia Augustin, te manaˈo ra o Jean Calvin, taata porotetani tuatapapa i te parau no nia i te Atua, e taata farani hoi oia no te senekele XVI ra, e ua “faataa-ê-na-hia te tahi mau taata [e te Atua] ia riro ei mau tamarii na ˈna e e feia tufaa i te Basileia o te raˈi”. Teie râ, ua haere roa ˈtu â o Calvin i mua i te parauraa e ua faataa atoa te Atua i te mau taata ia “faautuahia”, ia pûpûhia ˈtu ratou i te utua no te haamauiuiraa mure ore.
Mea riaria mau â te mau faahopearaa o teie haapiiraa. Inaha, eita anei ïa e manaˈohia e tei rotopu te hoê taata e roohia i te hoê ati, i te feia i faautuahia no te haamauiuiraa mure ore? Hau atu â, eita anei ïa te Atua e riro ei tumu no te mau ohipa e ravehia ra e te feia ta ˈna i faataa? Noa ˈtu e ua papai o Calvin e “te rave ra [te taata] i te hara ma te ru na roto i to ˈna iho hinaaro, e ia au i to ˈna iho huru”, te faariro ra oia, ma te ite papu i te reira aore ra eita, i roto i te tahi atu â o ta ˈna mau parau, i te Atua ei Poiete i te hara. — Haapiiraa kerisetiano poto noa, Jean Calvin.
Teie râ, mea papu eita roa ˈtu e nehenehe e taaihia te mau manaˈo no nia i te tiamâraa e no nia i te haapiiraa e ua faataahia te ora o te hoê taata. No te huna i teie taa-ê-raa e haafifi ra, ua parau noa ˈtura o Calvin e “eita roa ˈtu te poiri o to tatou feruriraa e nehenehe e farii i te hoê maramarama rahi mai teie, eita atoa hoi to tatou nainai e nehenehe e taa ˈtu i te hoê paari rahi mai teie”.
[Hohoˈa i te api 6]
Augustin
Jean Calvin