Te mau pure no te hau — O vai te faaroo mai i te reira?

TE aha ra te hoê tavana indien no Marite tei taupoohia e te hoê taupoo huruhuru e te hoê perebitero no te Ekalesia orthodoxe heleni i nia i te hoê â tahua? No te aha te dalaï-lama bouddhiste e parahi ai i pihai iho i te arii-epikopo no Cantorbéry? Eaha râ te auraa e vai ra i rotopu i te hoê orometua ati Iuda e te hoê arii-epikopo rusia orthodoxe? E no te aha te pâpa Ioane-Paulo II, te upoo faatere o te Ekalesia katolika, e faatere ai i te hoê tairururaa mai teie te huru?

Aita i maoro aˈenei, eita roa ˈtu e manaˈohia e e amui atu te pâpa i roto i te mau upoo faatere haapaoraa no te tahi atu mau haapaoraa no te pure. Teie râ, i te hopea o te avae atopa 1986, i roto i te oire no Italia ra o Assise, ua faaoti te pâpa e ratou atoa ra, i te hoê “mahana pureraa o te ao taatoa nei no te hau”. Ua taai oia i teie ohipa i te Matahiti o te ao taatoa nei no te hau i opuahia e te mau Hau amui no te matahiti 1986.

E rave rahi mau pure no te hau tei faaotihia i taua mahana ra i Assise. O vai râ tei faaroo mai i te reira? Te Atua toru tahi o te amuiraa faaroo kerisetiano? Te Atua o te mau ati Iuda? O Allah, te Atua o te mau mahometa? Te Grand-Pouce e te Patiri haruru o te mau animistes? Ua faaroo noa mai anei te hoê o taua mau atua ra i teie mau pure? I muri aˈe i te reira, te ite ra ïa tatou e e mea papu maitai te mau pahonoraa i teie mau uiraa.

Te mau pure i faaotihia

Ua riro te mau pure a te mau upoo faatere haapaoraa ei taime faahiahia roa ˈˈe o te mahana pureraa o te ao taatoa nei tei tupu i Assise, te hoê oire no ropu i Italia, i te 27 no atopa i mairi aˈenei. Ua hamanihia te hoê tahua rahi e, i muri roa, ua papaihia te parau ra “HAU” na roto 14 reo. Hau atu i te 60 upoo faatere haapaoraa o te mau haapaoraa rahi tei parahi haati aˈe, na te hiti i te pâpa i nia i taua tahua ra. E, te tahi i muri i te tahi, ua haere atura ratou i nia i te hoê tahua iti no te pure. Ua taviri te mau pû afata teata i teie oroˈa e, te parauhia ra e ua mataitaihia te reira e na 500 milioni taata na te ao taatoa nei.

O te mau bouddhistes tei pure na mua. Ua taparu ratou i “te hoê oaoaraa rahi roa”. I muri aˈe, ua tiaoro te mau hindous i “te hau no te mau taata atoa”. Ua parau te mau mahometa i roto i ta ratou pure e: “E arue anaˈe i te Atua, te Fatu o te mau ao atoa!”

“A horoa mai na i te hau”, ta te mau animistes no Afirika ïa i ani atu i to ratou mau atua. “Te pûpû nei matou i te paipu na te ‘Varua Rahi’, na te Fenua Metua”, ta te mau Amérindiens ïa i parau ma te pupuhi i te paipu no te hau. Ua ani te mau ati Iuda e: “A horoa mai na i te hau i te fenua nei.”

Ua tiaoro te mau tia katolika, anglican, luthérien e orthodoxe heleni i teie titauraa: “Na roto i te hau e te tahoêraa, e tiaoro anaˈe i to tatou Fatu ra i te Atua.” Ua pure atoa te mau tia sikhs, zoroastriens, shintoïstes e jaïns, no te hau i roto i te ao taatoa nei.

Te hoê farereiraa tei tui te roo

Mai ta te mau vea i tapao, a tahi ra te mau upoo faatere haapaoraa o te mau haapaoraa rahi e farerei ai i te hoê â vahi no te pure. No reira taua apooraa ra i parauhia ˈi te hoê “tupuraa i roto i te aamu o te taata nei”.

Ua hiˈo te tahi pae i taua apooraa ra mai te hoê tupuraa o te hoê parau tohu a te Bibilia. No te mea hoi tei nia o Assise i te hoê mouˈa, ia au ia ratou ra, ua riro te reira ei mouˈa taipe mai tei faahitihia i roto i te Mika pene 4, irava 2. Ia au i te hoê parau faataa, ua riro te farereiraa i Assise ei “tairururaa ta te peropheta Mika i tohu a 2 700 matahiti i teie nei, na roto i teie nei mau parau: ‘E riro ia tae i te mau mahana hopea ra, e faateiteihia ˈi te mouˈa ra o te fare o Iehova i nia i te tupuai mouˈa (...). E rave rahi te fenua e haere, a parau ai e, E haere mai, e haere tatou i nia i te mouˈa o Iehova (...); e na ˈna e haapii mai ia tatou i ta ˈna haapaoraa.’”

I to ˈna ra pae, ua faahiti te vea ra Il Sabato i teie parau anaanatae mau: “A tahi ra te hoê ohipa mai teie te huru a tupu ai mai te tau o te pare o Babela mai â. I taua tau ra, ua haapurarahia te mau taata no to ratou hinaaro e tapae atu i nia i te raˈi. I teie nei mahana, ua tahoêhia ratou e te mau manaˈo hohonu i te pae faaroo o tei faariro ia ratou ei feia apo i te taoˈa horoa a te Atua, oia hoi te hau.”

Te tahi mau uiraa hohonu mau

Ma te papu maitai, e faahopearaa rahi roa to te farereiraa i Assise. Teie râ, te faatupu ra te reira i te mau uiraa tano maitai mai tei uihia e te vea ra La Nazione: “Ua taeahia anei te tapao a teie poroi? Ua haaputapû anei te reira i te mafatu o te afa milia feia mataitai i te afata teata tei faaroo atu i te reira? Ua faaaueue anei te reira i te tiaraa aueue ore o te feia o te faaoti e te faatere tia ˈtu aore ra eita, i te mau tupuraa e te tapao o te ao nei?”

Te uiui nei te feia feruri maite i teie atu â mau uiraa hohonu mau: E farii anei te Atua i te mau pure atoa, noa ˈtu eaha te haamoriraa e haamorihia e te feia e faaoti ra i te reira? E nehenehe noa anei e pure no te hoê mea ma te ore roa ˈtu e hiˈopoa i te manaˈo o te Atua no nia i te reira? Ua turai anei teie farereiraa i te mau taata ia riro ei feia rave i te hau? Eaha ta te aamu o te taata nei e haapii mai nei ia tatou no nia i teie tuhaa? E, na nia ˈˈe, eaha ta te mau Papai e parau ra no nia i te huru e haamauhia ˈi te hau i roto i te ao taatoa nei?

E tia atoa ia ui i teie atu â uiraa: Aita anei te farereiraa i rotopu i te mau haapaoraa i Assise, i riro ei taime faahiahia mau no te patu faahou â i te pare o Babela no te tau apî nei?