Te haamaruaraa tamarii: O vai te tano?

E PITI nau taote taa ê teie e parau nei ia outou e hoê noa manuïaraa i nia i te tausani to ta outou aiû no te ora mai. Mai te peu noa ˈtu e e fanauhia oia e e mea ora oia, e mau hapape ino roa to ˈna e e nehenehe oia e pohe tau mahana noa i muri aˈe. Eaha ïa ta outou e faaoti? Te tamataraa i te tapea noa ˈtu i teie aiû? E aore ra te haamaruaraa ˈtu ia ˈna?

E tupuraa varavara roa te reira, ta outou paha ïa e manaˈo. Oia mau, e nehenehe râ te reira e farereihia, mai tei farereihia i Lonedona. Auaa râ hoi, ua turu te pupu utuutu maˈi i te mau metua i to raua faaotiraa eiaha ia haamarua i te tamarii. “Aita roa ˈtu mâua i parauhia ia farii i te haamaruaraa tamarii”, ta te metua tane ïa e faataa maira. E tamaiti iti ta teie na taata i teie nei, ua fanauhia mai oia aita hoê aˈe hapepa.

“Parau mau roa, te oaoa nei matou”, ta te hoê ïa taote no te fare maˈi ra i parau. E ua parau faahou aˈera oia e: “Te mea fifi, i te pae hiˈopoaraa tino, oia hoi eita e nehenehe e papu i nia i te faito hoê hanere i nia i te hanere.” Oia mau, teie râ, ia hape te hoê taote (aore ra te mau metua), o te hoê noa te reira o te mau tupuraa o te maitiraa e faatupuhia e te haamaruaraa tamarii i to tatou nei mahana.

Te turu nei te tahi e te patoi nei te tahi

Te faatupu nei te mau manaˈo i te pae rapaauraa e te pae morale horoahia no te turu e aore ra no te patoi i te haamaruaraa tamarii, i te mau mârôraa parau. I na pae e piti, te faateitei nei te tahi mau pupu puai i te mau reo haavare ore o te tia ia faaroo ma te haapao maitai e te manaˈo maitai. E mea pinepine roa te tauaparauraa i te riro mai ei tatamaˈiraa. O vai te tano?

Papu maitai, ua rave te mau metua i faahitihia i nia ˈˈe i te faaotiraa maitai. Teie râ, ahani pai e ua tano te hiˈopoaraa a te mau taote? I reira ra, e mea tia anei te haamaruaraa tamarii?

Mai te peu e au ia outou e e mea fifi roa e eita roa ˈtu e nehenehe e pahono i teie uiraa, ia ite outou e e ere outou anaˈe. Teie râ, mai ta tatou e ite mai, e nehenehe e haapao i te tahi mau manaˈo tumu. Na mua ˈˈe râ, e hiˈopoa anaˈe i te faito i te ao taatoa nei o te fifi o te haamaruaraa tamarii.

[Tumu parau tarenihia i te api 19]

I te mau matahiti atoa, e mau milioni vahine hapû te farerei nei i teie uiraa mauiui mau: ‘E tapea anei au i ta ˈu aiû aore ra e haamarua anei au ia ˈna?’

Eaha te mau manaˈo e faahitihia e teie nei uiraa na te ao taatoa nei? Eaha te faahopearaa o te hoê haamaruaraa tamarii i te pae o te mau manaˈo hohonu? E nehenehe anei e horoa i te hoê manaˈo i te pae morale no nia i teie tumu parau?