Nafea ia faaruru i teie oraraa horohoro noa

E HAAMAUˈA te hoê metua tane i ta ˈna mau hopea hebedoma atoa na roto i te mataitairaa i te mau tataˈuraa tue popo i roto te afata teata, e i muri aˈe, e amuamu oia no te mea aita e taime to ˈna no te afai i ta ˈna mau tamarii e haamataitai i te aua animala. I te mau hebedoma atoa, eita te hoê vahine e faaea noa ra i te fare, e mairi i te hoê noa ˈˈe hohoˈa aamu ta ˈna e au roa, e patahia mai na roto i te afata teata, e i muri iho, e mutamuta ïa oia no te mea, ua iti roa mai to ˈna taime no te mau ohipa atoa o te utuafare. I roto i teie na tupuraa e piti, te fifi, no roto mai anei i te ereraa i te taime, aore ra, i te mea e aita i faaohipa-maitai-hia te taime?

No te faaohipa maitai i to ˈna taime, e tia ia pee atu i te parau tumu i faataahia mai i roto i te Bibilia, i roto i te Philipi 1:10, oia hoi, ‘e au atu i te mau mea i hau i te maitai ra [faufaa roa ˈˈe]’.

E, a faataa na mua ˈˈe, eaha mau na ta outou mau ohipa faufaa roa ˈˈe. No reira, mai te peu e tia mau â ia faaore outou i te hoê mea, o te hoê ïa ohipa e faufaa iti haihai to ˈna. A tamata na i te faatia i te hoê tabura no te mau ohipa atoa e tia ia ravehia, i te mau hebedoma atoa, e a faataa ê na i te reira i roto e piti tuhaa: 1) te mau ohipa e tia mau iho â ia outou ia rave, e 2) ta outou e hinaaro e rave.

I roto i te tuhaa matamua, te vai ra ïa te ohipa, te mau mea e tia ia hoo mai, te atuaturaa i te fare, e tae noa ˈtu i te taime no te amui atu i roto i te utuafare taatoa. E horoa atoa te kerisetiano mau i te hoê parahiraa faufaa roa i te haere-tamau-raa ˈtu i te mau putuputuraa a te amuiraa, i te ohipa no te faaiteraa ˈtu i to ˈna faaroo ia vetahi ê, e i te tuatapaparaa i te Bibilia. — Mataio 6:33.

Mai te peu e te manaˈo ra outou e mea teimaha roa teie tuhaa o te tabura, a ani na ia outou iho mai te peu e mea faufaa mau iho â te tahi mau ohipa ta outou i hiˈo na e mea faufaa roa. Aore ra, a tamata na i te amui te tahi e te tahi ohipa taa ê. Ei hiˈoraa, mai te peu e mea rahi roa ta outou ohipa i roto i te fare, no te aha outou e ore ai e haapii i ta outou mau tamarii ia rave i te tahi o taua mau ohipa ra? E haamâmâ mai ïa ta ratou tauturu ia outou, e e oaoa atoa outou i te amui atu i roto ia ratou no te tahi maa taime faufaa mau.

Eaha ˈtura ïa no te tabura no te mau mea ta outou “e hinaaro e rave”? E nehenehe te reira e faaroa-roa-hia ma te hopea ore. Tera râ, mea papu mau â e, eita ta outou e nehenehe e rave i te mau mea atoa. A numera na râ i te faufaa o taua mau ohipa atoa ra (Luka 14:28). E faaiti mai anei — aore ra e faarahi mai anei — te reira i to outou iria? E faarahi anei te reira i te tuhaa moni e haamauˈahia e te utuafare? E rave mai anei te reira i nia i te tuhaa o te mau mea e tia mau ia ravehia?

Eiaha outou e topa i roto i te marei o te faateimaha-roa-raa i ta outou tabura ohipa — oia hoi, te hinaaroraa e rave e hia rahiraa ohipa e, i muri aˈe, aita outou e taa faahou e nafea râ. A faanavai maitai i te taime ia nehenehe outou e faaoti i ta outou mau ohipa. I te hoê mahana, ua horoa te hoê tamuta tei faaea i ta ˈna ohipa, i te hoê aˈoraa paari mau i te hoê taurearea ta ˈna i titau manihini e haere e inu maa taofe. Ua pahono mai teie taurearea ia ˈna e eiaha, e ua na ô mai oia e: “E tia ia ˈu ia tae atu i te oire i te 50 minuti mairi i te hora 4.”

“Mea ê roa ïa teie huru hora farereiraa ta oe! ta te tamuta ïa i parau atu. Mea maitai aˈe no oe mai te peu e faataa oe i ta oe mau taime farereiraa i te mau hora tia, ahiri e eita oe e na reira, eita e maoro oe i te rohirohi roa.”

No te aha e mea fifi ia faataere mai i te tereraa

Peneiaˈe e faufaahia outou i teie mau manaˈo, teie râ, a haamanaˈo e e tapao mau te huru iria e te ru-noa-raa no te tau “ati rahi” ta tatou e ora nei (Timoteo 2, 3:1-5). Te ora mau nei te ao nei i roto i te hoê huru aehuehu roa. Teie râ, i te mea e te haere noa nei te mau auraa i rotopu i te mau taata i te inoraa e te rahi noa nei te mau fifi o te ao nei, te faaite maira ïa te reira e, aita e faufaa to teie arepurepuraa taatoa.

I te mea mau, te ora nei te ao nei i to ˈna mau mahana hopea, no te mea, mai ta te Bibilia e faaara mai nei ia tatou, “te poto nei te taime”. (Korinetia 1, 7:29.) Ua faaite taa ê mai o Iesu no nia i to tatou nei tau. Ia au i ta ˈna mau parau tohu, ua riro te ati e itehia nei i teie mahana i roto i te ao atoa nei, ei haapapuraa e, ua fatata roa mai to ˈna Basileia (Luka 21:10, 11, 28-31). No reira, “e riri rahi hoi to [te Diabolo ra o Satani], no te mea ua ite oia e maa taime poto to ˈna e toe nei”. (Apokalupo 12:12.) Ma te oioi mau, te haere tia ˈtu nei te taatoaraa o te faanahonahoraa o te mau mea atoa o te ao nei, ta ˈna hoi e raatira nei, i te haamouraa, e eita roa ˈtu te mau tutavaraa atoa ta ˈna e faaohipa nei no te ape i teie haamouraa e manuïa noa ˈˈe!

Parau mau, eita ta outou e nehenehe e taui noa ˈˈe i te aveiˈa i ravehia e te ao nei. Teie râ, e nehenehe ta outou iho e rave ia itehia mai ia outou ra, te hau e te haapeapea ore no outou iho. Te ravea, e ere ïa te raveraa i te mau raau tamǎrû, e e ere atoa ïa te mau huru raveraa atoa no te faatia i te hoê tabura ohipa maitai, e mea faahiahia roa i roto i te mau tupuraa atoa. Te mea faufaa roa ˈˈe, oia hoi, ia iteahia mai te ite e te maramarama o te Bibilia. O te Bibilia?

Oia mau, no te mea te aˈo nei te Bibilia i te mau kerisetiano, “ia parahi hauti-ore-hia (...) ma te hau, ma te paieti, e te tura”. (Timoteo 1, 2:2.) E nehenehe mau anei te reira e tupu? Oia mau. Noa ˈtu â ïa e eita o ˈna e paruru taatoa ia outou i te mau fifi teimaha e itehia ra e outou i roto i teie “anotau hopea nei” e te ati rahi hoi, e nehenehe râ te Bibilia e taururu ia outou ia faahotu i te hoê hiˈoraa apî no nia i te oraraa.

Ei hiˈoraa, e rave anaˈe na i ta outou ohipa. Mai te peu e e ora outou ma te “paieti e te tura”, maoti i te haamau i to outou oraraa i nia i te haaputuraa i te mau taoˈa materia, aita ïa outou e faarohirohi roa ia outou no te haapue i te mau mea eita hoi ta outou e nehenehe e hoo mai. I te mea e ua ite outou e “o te nounou moni hoi te tumu o te mau ino atoa nei”, e mauruuru ïa outou no te mea “e maa ta [outou], e te ahu”. (Timoteo 1, 6:8, 10.) Hau atu, no te mea e tei te piti o te parahiraa ta outou ohipa i roto i to outou oraraa, peneiaˈe e itehia mai e outou i te taime no te faafaaea e no te tamǎrû ia outou. “E maitai rahi te rima hoê ia î i te maa ma te hau, i na rima atoa e piti ia î, ma te peapea e te amu i te mataˈi ra.” — Koheleta 4:6.

E nehenehe ta vetahi pae e faaiti mai i ta ratou ohipa. Te haamanaˈo ra te hoê faatere tahito no te hoê fare raveraa ohipa rarahi e: “E 23 matahiti to ˈu raveraa i te ohipa, e inaha, e moni maitai roa ïa ta ˈu, e faahoˈihia mai te tino moni taatoa ta ˈu e aufau no te rapaauraa, mea papu maitai ta ˈu moni ia hope ta ˈu tau ohipa, e te vai atu â. Teie râ, ia noaa mai teie mau mea atoa, e tia ïa ia horoa hau atu â i te taime e te puai no ta ˈna ohipa. I te pae hopea, aita faahou ïa to oe e taime no oe iho. I te mau taime atoa e manaˈo ai oe e rave i te hoê mea taa ê atu i ta oe ohipa, teie ïa ta oe e parau: ‘Auê, mea rahi roa hoi ta ˈu ohipa.’” No reira, ua faarue teie taata i to ˈna toroa teitei. Oia mau, ua turai te reira ia ˈna ia rave mai i te hoê huru oraraa haihai aˈe, e inaha, ua rahi mai râ to ˈna taime no te atuatu i to ˈna utuafare e no te amui atu i roto i te mau ohipa kerisetiano.

A haamau na i te hoê tabura maitai no te mau mea faufaa roa ˈˈe

I te mea e te ora nei tatou i te anotau fifi rahi, eita te hoê kerisetiano e nehenehe e faaohipa i te hoê huru haapeapea ore no nia i te mau ohipa pae varua. E rave anaˈe na i te hiˈoraa o Zakaio, te hoê taata ta te Bibilia e faaite mai nei mai te hoê taata taoˈa e te telona rahi. Ua hinaaro oia e ite hau atu â no nia ia Iesu. I te hoê mahana, te haere ra hoi o Iesu na roto i te oire, ua paiuma ˈtura o Zakaio i nia i te hoê tumu raau no te ite maitai atu ia Iesu. Te na ô ra te faatiaraa e: “E tae maira Iesu i taua vahi ra, ua hiˈo aˈera oia i nia, ite atura ia ˈna, e ua parau atura ia ˈna, E Zakaio, a pou mai i tena na, ei to fare ra hoi au parahi ai auanei. Ua pou oioi maira oia i raro, ite maitai maira ia ˈna ma te oaoa.” — Luka 19:2-6.

A feruri na i nia i te mau haamaitairaa ta Zakaio i noaa mai na roto i te farereiraa e o Iesu, inaha, ua nehenehe raua e tauaparau no nia i te mau tumu parau pae varua! Ua tauturu Iesu ia ˈna ia haamau i te hoê tabura maitai no te mau mea faufaa roa ˈˈe, e no reira ˈtura, ua faaea oia i te horoa te parahiraa matamua no te mau mea materia. Ua parau oia ia Iesu e: “Inaha, e te Fatu, e horoa vau i te afa i ta ˈu nei taoˈa na te taata rii, e i hamani ino na vau i te tahi taata ˈtu i te hoê mea iti aˈe, ia taimaha ïa ta ˈu e faahoˈi atu na ˈna.” — Luka 19:8.

I to tatou atoa mau mahana, te faaohipa nei te mau kerisetiano mau i te mau tupuraa atoa e itehia mai e ratou ra, no te tauaparau no nia i te mau tumu parau pae varua. To ratou haapeapearaa matamua, e ere faahou ïa te haapueraa i te mau taoˈa materia. Ia tae mai te mau buka e te mau vea kerisetiano tei neneihia no te tauturu ia ratou ia haapii hau atu â no nia i te Atua e ta ˈna mau opuaraa, e riro mai ïa te taioraa i taua mau mea nei, ei ohipa faufaa roa. E, e ohipa mau â ratou ia ore ratou ia mairi i te hoê noa ˈˈe minuti o te mau putuputuraa i reira ratou e haapiihia ˈi e e oaoa ˈi i te amuiraa ˈtu i roto i te tahi atu mau kerisetiano itoito mau.

Ua vaiiho atoa mai o Lota i te hoê hiˈoraa maitai no tatou. Ua faaara te melahi a te Atua ia ˈna e e haamouhia te mau oire no Sodoma e no Gomora. Ma te faaite i te hoê peapea tei î i te aroha no vetahi ê, “ua parau atura [o Lota] i to ˈna ra pue hunoa o tei faaipoipo i ta ˈna ra pue tamahine, na ô atura, A tia, e haere ê outou i rapae, te rave nei hoi Iehova i teie oire e haamou.” I te mea râ e “te faatautau noa ra oia”, ua aˈo maira te melahi ia ˈna ia horo oioi atu i te vahi i reira te Atua e paruru ai ia ˈna. Ua parau atura oia ia ˈna: “Ia peepee oe i te horo i reira ia ora, ia tae hoi oe i reira e tia ˈi ta ˈu e rave nei.” — Genese 19:14, 16, 22.

I teie nei mahana, e hohoˈa roa te ao taatoa nei i na oire no Sodoma e no Gomora, e ua fatata atoa mai to ˈna haamouraa. No reira, te horoa nei te mau Ite no Iehova i te hoê parahiraa faufaa roa no te ohipa faaararaa i to ratou mau taata-tupu e te fatata roa maira taua haamouraa ra i tohuhia mai i roto i te Bibilia. E o outou iho, e horoa atoa anei outou i te hoê parahiraa faufaa roa no te tuatapapa i te mau haapapuraa e turu nei i teie faaararaa?

Ma te papu maitai, e nehenehe noa te tapapa-uˈana-raa i te mau tapao faufaa ore e horoa mai na outou i te oto e te huru iria. Mea faufaa aˈe ia haapii i te ite i te Atua e ta ˈna opuaraa, oia hoi, te haamauraa i te hoê amuiraa apî o te mau mea i reira te oraraa e ore ai e riro faahou ei hororaa maamaa! — Petero 2, 3:13; Isaia 65:17, 21-25; Salamo 37:10, 11.

Mai teie atu nei, a haapii na nafea outou e nehenehe ai e faatupu i te mau mea ma te ore e horo noa. No te pae râ o te tuatapaparaa i te opuaraa a te Atua, eiaha roa ˈtu e faataime atu i te reira! A horoa râ no taua ohipa ra, i te parahiraa faufaa roa ˈˈe i nia i te tahi mau ohipa atoa!

[Tumu parau tarenihia i te api 19]

Mau faaararaa paari mau no nia i te ru-rahi-roa-raa:

“O tei ru râ i te haaputu i ta ˈna taoˈa ia rahi eita e ore te hara.” — Maseli 28:20.

“Te imiraa o te feia faaitoito ra, tei nia ïa i te taoˈa rahi; area te imiraa o te feia ru noa ra, tei te veve ïa.” — Maseli 21:5.

“Te ite ra oe i taua taata ru noa ia parau ra? Manaˈoraa e tei te maamaa ra i tei ia ˈna.” — Maseli 29:20.

“Eiaha to vaha ia oioi, eiaha ia ru noa to aau ia parau i te parau i mua i te aro o te Atua.” — Koheleta 5:2.

[Hohoˈa i te api 18]

Mai te peu e eita to tatou taime e navai, mea pinepine e aita ta tatou tabura ohipa i nahonaho maitai aore ra mea rahi roa te mau ohipa ta tatou e hinaaro e rave.

[Hohoˈa i te api 20]

Ua tauturu Iesu ia Zakaio ia haamau i te hoê tabura maitai no te mau mea faufaa roa ˈˈe i roto i te oraraa.