Eaha te huru o to tatou palaneta i roto i te mau tau i mua nei?
I ROTO i te mau matahiti i mairi aˈenei, e rave rahi mau taata maramarama tei hiˈo i te mau tau i mua ia ratou ma te peapea. Te manaˈo nei ratou e e nehenehe te Fenua, te vahi faaearaa o te huitaata nei, e faaino-roa-hia. Te tumu o taua huru feruriraa ra, oia hoi, te haamataˈuraa ïa a te hoê ati rahi atomi.
E taa-maitai-hia teie huru haapeapearaa. Te vai ra i roto i te rima o te mau puai e raatira nei i te ao nei, e hia rahiraa miria mauhaa atomi, e e navai roa hoi te reira no te haamou i te huitaata taatoa, e e nehenehe e manaˈohia e e faaohipa mau â ratou i te reira i te hoê mahana. Ia au i te parau a te hoê raatira no te hoê fenua rarahi, noa ˈtu e e faaohipahia te mauhaa atomi aore ra eita, eita te Toru o te Tamaˈi o te ao nei e nehenehe e apehia.
Te manaˈo nei vetahi ê e, noa ˈtu e eita te hoê ati atomi e tupu mai, te haafifihia nei te maitai o te palaneta no a muri atu na roto i te viiviiraa o te fenua e te rahi-roa-raa te taata e itehia nei i roto i te ao nei. Na roto i te hoê tuatapaparaa faatiahia e te hau i ravehia no te faatereraa marite, e toru hoi matahiti te maororaa te mau maimiraa, ua itehia mai teie faahopearaa: “Te faaineine nei te huru e itehia nei i teie mahana, no te matahiti 2000, i te hoê ao taata-roa-hia ˈˈe, viivii roa ˈˈe, tei iti mai te aifaitoraa i te pae o te natura e te papu ore aˈe ia faaauhia i teie mahana.”
Ua ravehia teie tuatapaparaa e rave rahi matahiti i teie nei, e mai reira mai, ua haere noa iho â te mau ohipa ia au i te aveia ta ˈna i faaite mai.
Ua faataa mai te hoê aivanaa auteralia no nia i taua tumu parau ra e: “Te haere viivii noa ˈtura te reva teitei e haaati nei i te fenua nei, e mai te peu e eita tatou e rave i te hoê noa ˈˈe mea i roto i te mau matahiti i mua nei, e mairi roa ïa te taime.” Teie ta te Bulletin no Sydney, i Auteralia, i tapao mai: “Te faaite rii maira te maraa-taue-raa te rahiraa taata i roto i te ao nei, i te tupuraa rahi o te mau fifi i roto i te mau fenua tei î aˈena hoi i te taata.”
Ua turai teie mau tupuraa peapea mau ra i te hoê taata toroa auteralia e rave ra i te ohipa na te hau, ia parau e: “A haamanaˈo na i teie uiraa faufaa roa e: e vai noa mai anei, i roto e piti ahuru matahiti, te hoê ao no outou e ta outou mau tamarii, aore ra e riro mai anei te fenua mai te hoê poro menemene tei paapaa roa e tei ino roa, e o te ohu noa ma te peapea mau i roto i te reva teitei?” Ua faaara atoa mai te taata papai buka ra o Jonathan Schell e mai te peu e eita te mau ravea e itehia mai, hoê noa ïa huru tupuraa e toe mai, oia hoi, “eita e ite-faahou-hia mai te hoê taata i nia i te fenua nei e eita ˈtura hoê noa ˈˈe taata no te haamanaˈo e ua ora na te taata i reira i mutaa ihora”.
Ma te papu maitai, ua amui-pauroa-hia mai te mau tupuraa atoa e faaite mai e mea peapea mau te oraraa no a muri atu mai te peu e tamau noâ te huru tupuraa e itehia nei i teie nei tau. Mai te peu e eita te fenua nei e paapaa roa na roto i te hoê tamaˈi atomi, e î roa ïa oia i te taata e e viivii roa oia, a pau noa ˈi to ˈna mau faufaa natura. E maraa rahi roa te numera, tei rahi aˈena hoi, o te mau taata veve roa. E ite atoa mai te taparahiraa taata e te haavîraa puai, tei parare roa hoi ma te riaria mau i teie nei, i te hoê tupuraa rahi roa e aita i itehia aˈenei.
Na vai e faataa i te tau no a muri atu?
Mai te peu e te mau taata anaˈe o te nehenehe e faaoti i to ratou oraraa no a muri atu, mea peapea roa ïa te mau tupuraa. Teie râ, aita te rahiraa o te mau taata e taa maitai ra e, e ere na te mau taata e faaoti i te ohipa e tupu mai no te fenua nei. Ua faataa-aˈena-hia mai te reira, e ere râ na te hoê taata. Na vai ïa?
Oia hoi, na vai i poiete mai i te fenua ia riro mai oia ei faaearaa no te taata nei? Te vai ra i roto i te Bibilia, te buka tei faauruahia mai e te Atua, te riro ei aratai no te huitaata, te pahonoraa mau i taua uiraa ra. Te parau nei oia no te “Atua [mau] ra, o Iehova”, “o tei hamani i te mau raˈi, e na ˈna hoi i haamanina; o tei hohora hoi i te fenua e tei tupu i nia ihora; o tei horoa mai i te aho no te mau taata i nia ihora”. — Isaia 42:5; Timoteo 2, 3:16, 17.
Te faaite maira anei te Bibilia e te vai ra ta te Atua ra o Iehova i te hoê opuaraa no te fenua nei e no te mau taata e ora ra i nia iho? Oia mau. Ia hiˈohia te tumu parau matamua a te Bibilia, e opuaraa iho â ta te Atua no te fenua nei e e faatupu mau â oia i te reira, e aita e itehia ra i roto i ta ˈna opuaraa, ia riro mai te fenua ei haapueraa rehu taero, aore ra ia faaino-roa-hia oia e te viiviiraa e te rahiraa o te taata.
Maori te reira, eita roa ïa te mau ohipa e tupu mai te nehenehe e manaˈohia, ia hiˈohia te viiviiraa e te rahiraa o te taata i nia i te palaneta, e tae noa ˈtu i te mea e nehenehe e tupu mai oia hoi te haapoheraa te huitaata ia ˈna iho na roto i te hoê tamaˈi atomi. Ua faaite tahaa roa mai te Atua e, to ˈna hinaaro oia hoi, “[e haamou oia i te feia e faaino nei i te fenua nei]”. (Apokalupo 11:18.) Hau atu â, te faaite nei te Parau a te Atua e e tatarahia mai te faatereraa mai roto mai i te rima o te taata nei e e tuuhia ˈtu i roto i te rima o te Poiete, tei ia ˈna ra te mana teitei roa ˈˈe. — Daniela 2:44.
Te horoa mai nei oia i te haapapuraa e eita roa ˈtu te fenua, to tatou nohoraa, e roohia ˈtu i te hoê tupuraa riaria mau mai te hoê haamouraa aore ra te hoê ino-roa-raa. Na roto i te arai o te peropheta ra o Isaia, te faaite maira te Atua ia tatou e ‘aita oia i hamani mai [i te fenua] ia vaiiho-taata-ore-noa-hia, ua hamani râ oia ia taatahia’. — Isaia 45:18.
E hiˈo anaˈe na i te oraraa i mua nei ma te oaoa
Teie te mea oaoa, oia hoi te horoa mai nei te Bibilia Moˈa i te hoê hiˈoraa maitai roa no nia i te oraraa i mua nei. E ora mau â te mau taata i nia i te fenua i roto e piti ahuru matahiti, toru ahuru matahiti e a muri noa ˈtu. Eita roa ˈtu te fenua nei e riro mai ei “poro menemene tei paapaa roa e tei ino roa”, mai ta te taata toroa auteralia rave ohipa na te hau ra, tei faahitihia i nia nei, e mataˈu ra. E, e nehenehe tatou e tiaturi i te parau tapu a te Poiete o te fenua nei, oia hoi, e ora mai to tatou palaneta e te utuafare fetii taata nei; no te mea e ere tei te taata ra, tei te Poiete Mana-Hope râ te mana teitei roa ˈˈe.
No reira, noa ˈtu e e rave rahi mau taata, i teie nei senekele XX, teie e riaria nei ia riro mai ratou ei tumu no to ratou iho haamouraa aore ra ia faaino roa ratou i te fenua nei na roto i te viiviiraa e te rahi-roa-raa te mau taata, eita ïa ratou e faatiahia ia na reira. I roto i ta ˈna Parau, te tamahanahana nei te Atua iho ia tatou na roto i teie mau parau e: “E rave rahi te manaˈo i roto i te aau o te taata; o te parau râ a Iehova te mau.” — Maseli 19:21; hiˈo Isaia 46:10; 55:11.
Teie nei râ, mai te peu e mea papu maitai e eita te fenua nei e haamouhia aore ra e faaino-roa-hia, eaha ïa te auraa o te parau ra “te hopea o teie nei ao” e itehia nei i roto i te mau tatararaa huru rau o te Bibilia, i roto i te Mataio 24:3? Eaha mau na taua ao ra e parauhia nei e fatata roa i te mou? Anafea te reira e tupu mai ai? E ora mai anei te tahi mau taata? Mai te peu e te hinaaro mau ra outou e ite i te pahonoraa i teie mau uiraa hohonu, te titau nei matou ia outou ia tuatapapa i te tumu parau i muri nei.