Hiˈoraa i nia i te ao nei

Te taata teiaha roa ˈˈe

“Te parau ra o Albert Pernitsch, taata no Auteteria e, o ˈna te taata teiaha roa ˈˈe o te ao nei, ta te vea ïa i neneihia e te taiete manureva Japan Air Lines i faaite mai. Taata amu rahi i te maa e te inu rahi atoa hoi, mai te mea ra ïa e ua inu o Pernitsch i te hoê taime tamaaraa e 80 hapaina rarahi pia, e 7,5 litera uaina e ua amu oia 14 moa.” I te fanauraahia mai oia e 5,9 kilo to ˈna; i te 15raa o to ˈna matahiti, 180 kilo to ˈna e i teie mahana, e 29 matahiti to ˈna e 397 kilo ïa to ˈna. Ua utahia o ˈna i Tapone roa ˈtu no te “faaiteite i to ˈna rarahi i te Faaiteiteraa no Tokyo”. No te haaparahi ia ˈna i roto i te manureva, ua tatarahia ïa e ono parahiraa i roto i te vahi faahiahia roa ˈˈe e ua tuuhia ˈtu i te hoê parahiraa taa ê, te vai ra te hoê hatua paruru ia ˈna, e tano maitai i taua huru taata nei. Ua haapaarihia te tahua o te manureva e ua hamanihia te tahi vahi haumitiraa taa ê no ˈna. No te uta ia ˈna i nia i te manureva, ua faaohipahia ïa te hoê afata rarahi roa (container) e tano no te manureva e no te pahi.

Te hoê ravea apî no te paimi i te taata

Ua ohie roa ˈtura hoi i teie nei no te paimi i te mau tamarii moe aore ra tei haruhia, te mau taata paari e moe, te feia pepe, aore ra tei roohia i te maˈi i te pae no te feruriraa. E nanaˈohia te mau numera o te taata tataitahi i nia i te hoê microdisque (te hoê pehe iti nainai roa), e o te tamauhia ˈtu i nia i te hoê niho o taua taata ra. E tuuhia taua numera ra i roto i te ordinateur (matini aravihi) e tae noa ˈtu te mau parau no nia i taua taata ra e te mau parau a te taote no nia ia ˈna. E ono totaiete marite teie e haapao nei i taua huru ohipa ra. “Ia ore ia anoi noa te ohipa, te haˈa nei ïa te Taatiraa marite e haapao nei i te pae no te niho, ia ravehia i te ohipa i roto i te hoê noa iho pû”, ta te vea ra American Health ïa e haapapu maira.