Hiˈoraa i nia i te ao nei

Hohoˈa faufau e te haavîraa puai

Ua haapapu te hoê maimiraa i ravehia e te faatereraa hau marite e haapao i te pae no te Parururaa, e o tei faaitehia hoi te parau i roto i te New York Times, e ia faarahi-roa-hia ˈtu i te haamatau i te mau hohoˈa faufau, e riro ïa i te faaino e i te aratai atu i te mau “taatiraa pae tino hamani ino”. Ua ite na melo hoê ahuru e ma hoê o te tomite e te mataitairaa ˈtu i te mau hohoˈa faufau e “aratai ïa te reira i te mau taata mataitai ia faaiti mai i te ino o te ohipa haru e te tahi atu â mau ohipa iino i te pae taatiraa, ia faaauhia i tei matauhia”. Teie râ, ua parau faahou te mau melo o taua tomite ra e, noa ˈtu te mau ohipa i itehia mai, e rave rahi ïa te mau ture no te haaparuparu i te hooraa ˈtu i te mau buka e te mau hohoˈa faufau, tei ore i maitihia. Hau atu, ta ratou ïa i parau mai, te vai ra e rave rahi mau haapapuraa teiaha mau e faaite maira e “te faaterehia nei aore ra te hiˈopoahia nei” te mau vahi hamaniraa aore ra faatupuraa hohoˈa faufau na te taatiraa e haapao i te ohipa taparahi taata.

Casque stéréo: Mea atâata roa!

E nehenehe te faaohiparaa i te hoê casque stéréo e riro ei mea atâata roa no to outou tariˈa. Te faaite maira te hoê titorotororaa i ravehia i nia i te mau taurearea e faaroo ra i te pehe ma te tamau i te mau casques stéréo, e te afaraa o ratou, ua ino to ratou tariˈa. Te parau ra te toru i nia i te maha o taua mau taurearea ra i uiuihia e, e vava noa i roto i to ratou tariˈa e toru hora i muri aˈe i to ratou faarooraa i te pehe, ia faaiti mai ratou i te puai aore ra ia haapuai roa ˈtu ratou. Te faaite maira te totaite marite oto-rhino-laryngologie e e tupu mai te fifi i te pae no te tariˈa ia hau te faito maniania i te 120 décibels, faito maniania ta te rahiraa o te mau radios e nehenehe e haru mai. No te arai i te fifi, te faaauhia maira e eiaha e haamaoro roa i te faaroo na roto i te casque stéréo e ia haamǎrûhia mai te taˈi.

Te roaraa o te oraraa o te hoê vahine

Ia au i te Times no Lonedona, te rahi noa ˈtura te tiaturiraa no te ora i Beretane e i te Pays de Galles. Te haapapu maira o Sir Cyril Clarke, faatere no te hoê pupu maimi i te fare haapiiraa teitei hui arii a te mau taote, e ua tataiiva te rahiraa o te feia hanere matahiti i roto i te area e toru ahuru matahiti. I roto râ i taua numera ra, 15 % anaˈe tane. Te faataa ra te taote Clarke e e pinepine te mau tane i te ora i te hoê oraraa e ere i te mea maitai; e fifi atura ïa to ratou oraraa no te poria e te oreraa ratou e rave i te ohipa faaetaetaraa tino. Area te mau vahine ra, mea maoro aˈe ïa to ratou oraraa, no te mea i te paeau rahi, mea rahi ta ratou ohipa e rave i te utuafare.

Te fenua Paniora “katolika”

Ua tui te roo o te fenua Paniora, tei riro hoi te aamu i te taaihia i te Ekalesia katolika, i roto i te fenua iho aore ra i roto i to ˈna mau aihuˈa raau, ei fenua katolika roa ˈˈe i te ao nei. E tae roa ˈtu i te matahiti 1978, ua riro te haapaoraa katolika ei haapaoraa na te Hau. Teie râ, te faaite maira te hoê parau i neneihia aita i maoro aˈenei e te Pû paniora e rave i te mau maimiraa sociologiques a te Ekalesia katolika e e 46 % anaˈe o te huiraatira e faariro ra ia ratou ei katolika faaohipa i taua haapaoraa ra. I nia i taua numera ra, 18 % teie e haere tamau nei i te pureraa. Ia au i te International Herald Tribune, vea neneihia i Paris, “te faaite ra te hoê afai parau no te Ekalesia no Paniora e te faatupu ra taua mau numera nei i te feaaraa i nia i te hohoˈa o te fenua Paniora ma to ˈna tiaraa fenua katolika”. Mai te matahiti 1979 mai, eita te haapiira katolika e faahepohia i roto i te mau fare haapiiraa paniora.

Te rohirohi o te mata

I nia i te pae taata e rave ra i te ohipa i nia i te ordinateur (matini aravihi), e maha teie e fifihia nei “i te rohirohi o te mata, i te ahu e te maero i roto i te mata”, ta te vea no Lonedona ïa The Times, e faataa ra. Nafea ïa tatou ia arai i te reira? Te faaara mai nei o Janet Silver, te hoê taote mata no te fare maˈi no Moorfields, i Lonedona, i te feia e rave nei i te ohipa i nia i te ordinateur e ia faaea i ta ratou ohipa e 5 e tae atu i te 10 minuti i te mau hora atoa e ia rave i te tahi atu ohipa. Te faaau-atoa-hia ˈtu nei e ia tamǎrû i te anaana e ia faaau maitai i te hiˈo ia ore to tatou mata ia ino. Taa ê atu i te reira, te faaara mai nei taua taote ra i te feia e haamata i te rave i te ohipa i nia i te ordinateur e ia haere ratou i te taote mata e hiˈopoa i to ratou mata e i muri iho, ia haere atu i te mau piti matahiti atoa e hiˈopoa i to ratou mata.

Te mau parahiraa teitei no te mau tamarii

Mea papu maitai anei te mau parahiraa teitei no te mau tamarii? Ia au i te vea ra Metua (beretane), i roto noa i te matahiti 1984, 8 000 aiû e mau tamarii i raro mai i te pae matahiti tei afai-ru-hia i te fare maˈi no te mea ua topa mai ratou na nia i te mau parahiraa teitei. Ia au i te tomite marite e haapao i te pae no te maitairaa te mau taoˈa e hoohia mai, e nehenehe te hoê tamarii e pepe ino roa mai te peu e eita o ˈna e haapao-maitai-hia aore ra mai te peu aita o ˈna i taamu-maitai-hia i nia i te parahiraa. Teie te mau tumu e pepe pinepine ai: e topa te aiû na nia mai i te parahiraa, e pirihia o ˈna; e taueue te parahiraa e e topa ˈtu ai te tamarii. No te ape i te mau ati e tupu mai, te faaau mai nei te tomite e ia taamuhia te tamarii, noa ˈtu eaha te mau huru taamuraa e faataahia, e ia haapao maitai ia ˈna ia faaea o ˈna i nia i to ˈna parahiraa.

Te rahi nei te SIDA i Afirita

I roto i te oire pû no Ouganda, te tapaohia ra i te fare maˈi no Mulago “te hoê taata tei roohia i te SIDA i te mahana hoê mai te avae novema i mairi aˈenei”, ta te Sunday Times ïa o te 20 no eperera 1986 e faataa maira. Te faaite maira taua vea ra e ua riro te SIDA “ei haapohe rahi roa ˈˈe i te taata i roto i te mau fare maˈi”. I Ouganda noâ, ua itea i te mau taote e hoê taata i nia i te ahuru, tei hiˈopoahia, te vai ra to ˈna maˈi SIDA. Taa ê atu i te rooraahia i teie maˈi na roto i te mau taatiraa pae tino tane e tane aore ra vahine e vahine, ua faahiti-atoa-hia te mau taatiraa i rotopu i te mau tane e te vahine e te tahi taime e te mahu e tae noa ˈtu te mau pâmuraa toto, ei mau tumu e faarahi i taua maˈi pohe ra. I te mea hoi e i roto i taua fenua ra eita te toto e faaohipahia no te mau pâmuraa toto e hiˈopoahia, te manaˈo ra te mau taote e “e nehenehe na pâmuraa e 20 e ravehia i te mau mahana atoa (...) e faatupu mai e piti atu â huru SIDA apî i te mahana hoê”!

Te opaniraa i te ohipa faaiteite no te avaava

Ua faaite te Taatiraa marite e paruru i te cancer (matauhia i te parau mariri ai taata) e e rave rahi mau taatiraa e haapao i te pae no te vai-mâ-raa i te fenua Marite tei titau e “ia faaore-roa-hia te mau faaiteiteraa atoa no nia i te avaava e te tahi atu â mau huru avaava”. Ua haapapu mai te taote Le Maistre, peretiteni no te Taatiraa, i te hopoia riaria a te avaava i roto i te mau maˈi, te mau ati auahi, te mau ati purumu. Ia au i taua taata ra, te faatupu nei te avaava “i te mau matahiti atoa hau atu i te taata pohe ia faaauhia i te taatoaraa o te feia marite i pohe i roto i na tamaˈi rahi matamua e piti e te mau tamaˈi no Korea e no Viêt-nam” e “hau atu i te hitu taime feia pohe i te mau matahiti atoa ia faaauhia i te taatoaraa o te feia i pohe i roto i te mau ati purumu i te fenua Marite”.

Tchernobyl: te mau faahopearaa

Ia au i te tahi mau taata aravihi, e nehenehe te mau faahopearaa riaria mau o te hihi atomi faatupuhia e te ati i tupu i te 26 no eperera i roto i te pû atomi no Tchernobyl, e itehia i nia e rave rahi tausani taata. Te faaite ra taua mau taata aravihi ra e e riro te mau faahopearaa o te césium 137 i te faatupu 4 000 huru cancer e e haapohe fatata 2 000 taata. E te manaˈohia ra e e nehenehe e 24 000 taata e roohia i te maˈi arapoa i muri aˈe i to ratou hâˈuraa mai i te iode 131, e nehenehe â te numera i taeahia, e maraa i nia i te 120 000, ia taiohia te numera o te feia i amu i te maa e i inu i te û taero. E nehenehe te cancer o te arapoa e haapohe hau atu i te 2 000 taata. Ia au i te feia maimi, tei roto atoa te mau taata tei roohia maa taime noa i te mau hihi atomi i taua numera ra. Ia hiˈohia i te mau taata i roohia i te hihi atomi e toru aore ra e maha hebedoma, e nehenehe atura ïa e tataimahahia te numera o te mau cancers e o te mau taata pohe. Te huiraatira no te pae Hitia o te râ no Europa, no Scandinavie e no Rusia ma, tei faahitihia e peneiaˈe o ratou te mea farerei roa ˈtu i te fifi.

Te hoê ravea no te arai i te oˈe

Ua riro te hoo rahi no nia i te mau faurao e faaohipahia no te uta i te taoˈa ei fifi faufaa mau no te hopoi atu i te maa na te mau huiraatira no Afirita tei pohe i te poia, ta te vea ra Earthcan Bulletin ïa e haapapu ra. Te faaite maira te hoê taatiraa e haapao i te pae no te tauturu e ohipa ra i Afirita e ua haamauˈa oia 17 milioni dala marite (fatata 2 380 milioni farane patitifa) no te uta noa ˈtu i te maa. Ua numerahia te haamauˈaraa no te hoê tau maoro, oia hoi te hamaniraa i te mau purumu, i nia i te faito fatata e 200 milioni dala marite (2 800 milioni farane patitifa) no te tuhaa fenua nei o te Sahel. Teie râ hoi, te faaohipahia ra te tahi â huru ravea utaraa mama aˈe. No te tino moni ra 13 milioni dala marite (1 820 milioni farane patitifa), e nehenehe te hoê totaiete beretane e hamani i te hoê opupu e tere na te reva tei î te coque auri i te hélium, e uta e 27 tane taoˈa; e rere taua matini nei e 230 kilometera i te hora e e nehenehe e ohipa i nia i te hoê aanoraa e 8 000 kilometera. I te tahi aˈe pae, e nehenehe ta taua matini nei e uta e 200 taata. Te haapapu maira taua vea ra e e nehenehe mau te mau opupu e tere na te reva e tauturu rahi mai no te haamâha i te oˈe.

E piti na fetia ave

E rave rahi mau taata mataitai i te fetia ave a Halley tei ore i mauruuru no te mea aita hoi taua fetia ra i ite-maitai-hia, ia faaauhia i to ˈna tereraa mai i te matahiti 1910. Teie râ, e taime oaoa tei itehia e te feia mataitai i te pae apatoa. Ia au i te vea afirita-apatoa ra The Natal Witness, “te parau ra te tahi mau taata o te oire e, maori hoi ratou i te ore e mauruuru i te huru mohimohi o te fetia ave a Halley, ua ite ratou e piti fetia ave”. I te ropuraa o te avae eperera, ua nehenehe ratou e ite i roto i te raˈi e piti na tafetafeta mohimohi. Hoê ra, o te fetia ave iho â ïa a Halley. Area te tahi ra o te Omega Centauri ïa, tei î i te hoê milioni fetia e ohu noa i roto i te hoê noa iho pû. Taa ê atu i te fetia ave a Halley, eita te feia mataitai e tiai e 76 matahiti no te ite atu i te Omega Centauri. Teie ta te hoê taata tuatapapa i te parau no te fetia, e faataa maira: “Hoê teie haapueraa fetia rahi roa ˈˈe e, oia hoi te hoê o te mau haapueraa varavara roa i te itehia e te mata taata nei.”