Te Parau a te Atua: te paruru faahiahia roa ˈˈe!

MAI te peu e e tamata te hoê taata i te eiâ ia oe, e nafea oe? E horoa oioi anei oe i ta oe mau taoˈa, aore ra e aro anei oe no te tapea mai i ta oe mau taoˈa? I roto i to tatou nei ao ino, e rave rahi te mau taata e manaˈo nei e e mea tano mau ia aro no te paruru i ta ratou mau taoˈa. Te manaˈo nei ratou e e riro te raveraa mai i te hoê pupuhi aore ra te haapiiraa i te hoê huru taputo ei ravea no te parururaa ia ˈna iho i te feia hamani ino. E faatupu mau anei râ te reira i te mau faahopearaa faahiahia mau? E mea pinepine roa te feia i faaohipa i te pupuhi i te tatarahapa i muri iho. Teie râ, te faaite ra te arii paari o Solomona e: “Eiaha e parau e, E tahoo atu vau i taua ino nei; e tiai maite râ ia Iehova, e na ˈna oe e faaora.” — Maseli 20:22.

No teie iho nei, teie tei tupu i nia i te hoê melo no te pû o te ao nei a te mau Ite no Iehova, e vai ra i Brooklyn, i roto i te hau no New York, i to ˈna haereraa i to ˈna mau hoa ra e faaea ra i roto i te reira tuhaa fenua. “Ua tae au i mua i te fare teitei i horo mai ai te hoê taata ahu faehau i nia ia ˈu ma te faatano mai i ta ˈna tipi e ma te parau mai e: ‘Ta oe moni, haaviti! Horoa pauroa mai ta oe moni!’

“I to ˈna iteraa e aita vau e mataˈu ra, ua na ô faahou mai oia e: ‘Haere a tomo i roto i te fare teitei! Eita vau e hinaaro ia faaroohia mai tâua. Haere, a tomo i roto!’ I te taeraa i roto, ua ani maira oia i ta ˈu pute. E 2 dala marite anaˈe ta ˈna i ite mai. A paheru noa ˈi o ˈna i te pute, ua parau atura vau ia ˈna e e Ite no Iehova vau.

“Ma te haavare tariˈa turi, ua imi tamau noa ˈtura oia i te moni. Tei roto ta ˈna tipi i te hoê rima, area te tahi ra tei roto ïa i to ˈu pute piripou. Ua noaa mai ia ˈna hoê moni parau e 20 dala marite o ta ˈu i tahuna. Te manaˈo ra oia e ite-faahou-hia mai â ia ˈna te tahi moni e ua tamau noa ˈtura oia i te maimi; ua hue oia i raro te mau ohipa atoa tei noaa mai ia ˈna no roto i to ˈu pute piripou. ‘Eaha ta oe e rave i tera moni? ta ˈu ïa i ani atu. E hoo i te raau taero?’ ‘E’, o ta ˈna ïa i pahono mai. ‘Ua ite oe, ahiri au e ere i te Ite no Iehova, ua pohe aˈena ïa oe. Ua haapii au i te karaté; mea rahi hoi te taime aita oe i haapao maitai i ta oe tipi’, ta ˈu ïa i parau atu.

“I to ˈu parauraa ˈtu ia ˈna no nia i te Bibilia, no te faataa ˈtu ia ˈna no nia i to ˈu tiaraa Ite no Iehova, ua tatara maira oia i te hoê buka iti na roto mai i to ˈna pute e ua na ô maira e: ‘A hiˈo na, e Bibilia ta ˈu!’ E Bibilia iti nainai hoi.

“‘Aita e faufaa rahi to te reira no oe, o ta ˈu ïa i parau atu. Aita hoi o oe iho e faaohipa ra.’ Ua rave maira vau i ta ˈna Bibilia e ua taio atura hoi i te Mataio 6:33 e te Ioane 17:3 ma te parau onono atu ia ˈna no nia i te faufaaraa eiaha noa ia ite i te Parau a te Atua, ia faaohipa atoa râ i te reira i roto i to ˈna oraraa.

“Ua faaite mai oia ia ˈu e a piti avae atura to ˈna matararaa mai na roto mai i te fare auri. Aita ta ˈna e ohipa, e i te mea hoi e e hinaaro oia i te moni, ua rave atura oia i te ohipa eiâ. Ua taio atura vau ia ˈna i te Korinetia 1, 6:9, 10 no te faaite atu e eita te eiâ e ô i roto i te Basileia o te Atua. ‘I te tahi aˈe pae, o ta ˈu ïa i parau faahou atu, e riro oe i te topahia i nia i te hoê taata maamaa o te aro mai no te paruru i ta ˈna moni, peneiaˈe paha ïa oe i te haapohe atu ia ˈna, aore ra na ˈna e haapohe mai ia oe; e riro atoa paha oe i te haru-faahou-hia e te mutoi e i te tuu-faahou-hia ˈtu i roto i te fare auri!’ Ua na ô maira oia ma te riaria e ‘Eiaha e parau i te reira!’ Ua faahaamanaˈo atura ïa vau ia ˈna e ‘o te rave hoi i te ˈoˈe ra e pohe ïa i te ˈoˈe’. — Mataio 26:52.

“Mai te huru ra ïa e ua putapû roa oia i ta te mau Papai e parau ra, e ua na ô maira oia e eiaha vau e inoino atu. Ia piˈo oia i to ˈna upoo i raro, ua ite atura oia i te mea o ta ˈna i hue i raro, ia ˈna i paheru i to ˈu pute. Ma te maere, ua ohi pauroa ˈtura oia i taua mau mea ra e ua horoa maira ia ˈu nei, ua tapea râ hoi oia i te moni. I to ˈna haereraa ˈtu, ua ani maira oia ia ˈu e e nehenehe anei ta ˈu e pure no ˈna. ‘E ohipa ino ta oe i rave, o ta ˈu ïa i pahono atu, e ua harahia oe ia Iehova. Te fifi ra, tei rotopu ïa ia oe e o ˈna.’

“Ia ˈna i reva ˈtu, ua ani mai oia ia ˈu e e nehenehe anei ta ˈu e rave i te tahi ohipa no ˈna. Ua toro maira oia i ta ˈna tipi e ua na ô maira e: ‘E nehenehe anei ta oe e faarue i ta ˈu tipi no ˈu? Eita vau e eiâ faahou, ua oti.’ Ua rave mai au i ta ˈna tipi e ua horoa ˈtura vau i te hoê A ara mai na!.” — Faatiahia e Ricky Hanagami.