Ia au i te Bibilia

E vahi haamauiuiraa anei te po auahi?

“E PAPAA te taata, papaa, papaa!” I roto i te hoê piha poiri, te haere noa maira te taata orero ma te toro i to ˈna rima i mua i te feia e faaroo ra ia ˈna ma te maere, i te mea e te ura noa ra to ˈna ahu oomo. Auaa râ, tau setoni noa te maoro taua faaiteiteraa ra. Na roto i te hoê taoˈa ama ohie noa, ua haaputapû roa taua faahaamanaˈoraa ra i te auahi o te po auahi, i te mau taata e faaroo ra i te taata orero.

Mai ia ˈna atoa ra, e rave rahi mau orometua faaroo — i roto iho â râ i te amuiraa faaroo kerisetiano — teie e parau nei e mai tera iho â te huru utua mure ore o ta te Atua i faataa no te feia iino. Tera râ, ua tano anei teie tiaturiraa e te Bibilia?

E haere te feia maitai e te feia iino i roto i te hoê â vahi

“E tauehia te feia hara i roto i te po auahi, e te mau nunaa atoa e haamoe i te Atua!” (Salamo 9:17 ia au i te tatararaa bibilia Le Maistre de Saci). I roto i taua irava ra, i te vahi i tuuhia te parau ra po auahi, ua tapea noa ïa te mau tatararaa apî nei (na roto i te reo farani), mai te Votre Bible e te Bible de Jérusalem, i te parau e itehia i roto i te papai hebera, oia hoi “shéol”. Eaha râ te auraa mau o teie parau “po auahi” aore ra “shéol”?

Te horoa mai nei te buka Koheleta i te mau haamaramaramaraa no te parau ra Schéol. E taio tatou e: “O tei itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari, i te apoo [Schéol] ta oe e haere na.” (Koheleta 9:10). Mai te peu e eita ta te mau taata i roto i te po auahi, aore ra Schéol, e nehenehe e manaˈo, e e ite, e e ohipa, eita atoa ïa ta ratou e nehenehe e ite i te mauiui.

Eita ïa e maerehia e ua haere atoa te mau tavini haapao maitai a te Atua i roto i te Schéol (apoo). Tera te vahi ta Iakoba i manaˈo e haere ia pohe oia; o Ioba ra, ua hinaaro ïa oia ia faataponi te Atua ia ˈna i reira, ia ore oia ia ite faahou i te mauiui (Genese 42:38; Ioba 14:13). Ua hinaaro anei teie na tavini haapao maitai e piti o te Atua e haere i roto i te hoê po auahi mauiui e te feia iino? Eita roa ïa!

Eaha te auraa o te “auahi”?

Nafea râ tatou e taa ˈi i te mau parau a Iesu i to ˈna na ôraa e e haere te feia aore i haapao i te hinaaro o te Atua i roto i “te auahi pohe ore ra”, aore ra i roto i ‘te umu auahi ra, tei reira te oto e te auauraa niho’? — Mareko 9:43-48; Mataio 13:42.

I to ˈna faahitiraa no taua vahi ra, aita Iesu i faaohipa i te parau heleni ra “Hadès” (Hade), hoê â hoi auraa e te parau hebera “Schéola”, ua faaohipa râ oia i te parau ra “Gehena”. Te faataa ra taua parau ra i te hoê vahi faarueraa pehu fatata mai ia Ierusalema o tei piihia te peho no Hinoma; e e ura noa te auahi no te tutui i te mau hairiiri atoa. E tano mau ïa teie parau no te faatupuraa i roto i te feruriraa o te feia e faaroo maira ia Iesu, eiaha te haamauiuiraa mure ore, te haamou-roa-raa râ, te haamouraa na roto i te auahi.

Te parau atoa ra te Apokalupo tei tuuhia mai i te aposetolo Ioane i te hoê “roto auahi e te gopheri e ama ra” i reira e taorahia ˈi te feia atoa e rave ra i te mau ohipa iino (Apokalupo 21:8). Ahiri e te vai ra te po auahi, teie paha ïa roto, inaha e haere te mau taata iino i reira. Teie râ, te faaite mai nei teie â buka o te Bibilia ia tatou e e taora-atoa-hia te pohe tei noaa mai na roto ia Adamu e o Hade i roto i taua roto auahi ra. E nehenehe anei ïa teie na mea e ere i te taata e mauiui? Eita. Area râ, i roto i teie irava, e nehenehe te auahi e faahohoˈahia, e o te reira iho â te auraa, i to raua haamouraahia, i muri aˈe i to raua ‘tuuraa mai i te feia atoa i pohe i roto ia raua’, oia hoi i muri aˈe i te tia-faahou-raa o te feia pohe. — Apokalupo 20:13, 14.

Te faaite mai nei teie mau hiˈoraa e e taipe noa te auahi no te haamouraa mure ore. Eita hoê aˈe taata e faaoromai i te mauiui i roto i te roto auahi, te Gehena, e i roto ia Hade (aore ra Schéol), i reira e haere atoa hoi te mau tavini haapao maitai o te Atua e te mau taata iino. E faahohonu anaˈe na tatou i teie tumu parau, e taa maitai ïa ia tatou e no te aha eita e nehenehe e tiaturi e no roto te haapiiraa no nia i te po auahi i te Bibilia.

Aita e tuea ra e te huru o te Atua

Eaha to outou manaˈo i te mau metua e opani ra i ta ratou mau tamarii i roto i te hoê vahi ino e rave rahi mahana, e tae roa ˈtu hoi i te haamauiuiraa ia ratou? E riri roa paha ïa outou i teie huru raveraa. Eita anei outou e riri atoa i te hoê atua e haamauiui i ta ˈna mau tamarii i roto i te auahi e a muri noa ˈtu?

Mea taa ê roa ïa te Atua mau; te haapapuraa i te reira, ua aˈo atu oia i te mau Iseraela i to ratou ‘tutuiraa i ta ratou mau tamaroa e mau tamahine i te auahi’. Ua haapapu maitai mai Iehova e e ohipa teie ‘o tei ore i faauehia e ana ra, no te mea aore roa i tia ia ˈna te reira’. (Ieremia 7:31.) I te mea hoi e aita roa ˈtu te Atua i manaˈo noa ˈˈe mai te reira te huru, nafea ïa e nehenehe ai e manaˈo e ua hamani oia i te hoê po auahi ura no te mau mea ta ˈna i poieteb? E, mai te peu e e riri roa tatou i te ohipa ino e te haamauiuiraa, e riri atoa paha ïa te Atua i te reira, i te mea e e Atua aroha oia! — Ioane 1, 4:8.

Aita atoa te haapiiraa no nia i te po auahi e tuea ra e te parau-tia. I roto i ta ˈna rata i to Roma, ua faataa te aposetolo Paulo e: “E utua te pohe no te hara.” (Roma 6:23). Te parau faahou ra oia e: “O te taata hoi i pohe ra, ua matara ïa oia i te ino nei.” No reira, mai te peu e e faaore roa te pohe i te utua a te hoê taata, no te aha ïa o ˈna e mauiui noa ˈi e a muri noa ˈtu no te mea noa ïa e ua rave oia i te hara i roto i to ˈna oraraa poto? — Roma 6:7.

No reira, te faaite nei te Bibilia e te po auahi, ia au i tei matauhia, aita ïa oia e vai ra. Ia ite tatou i taua parau mau ra, e nehenehe ïa tatou e taai e te Atua i te mau auraa niuhia i nia i te here, eiaha râ i nia i te riaria. Te titau atu nei matou ia outou ia tamau â i te hiˈopoa i te Bibilia e i te haapii e eaha te tia ia rave ia auhia mai tatou e te Atua e ia ite atu tatou i te mahana faahiahia i reira e haamou-roa-hia ˈi o Hade (aore ra Schéol), te apoo tanuraa o te mau taata atoa. — Ioane 1, 4:16-18.

[Nota i raro i te api]

[Parau iti faaôhia i te api 14]

Eaha to outou manaˈo i te mau metua e haamauiui ra i ta ratou mau tamarii?

[Hohoˈa i te api 15]

Teie anei te po auahi ta te Bibilia e parau ra?