Eaha te she’ohlʹ e te haiʹdes?

I ROTO i na reo tumu, te faaohipa ra te Bibilia i te taˈo Hebera she’ohlʹ e te taˈo tuea Heleni haiʹdes hau atu i te 70 taime. Ua taaihia na taˈo e piti i te pohe. E huri te tahi mau Bibilia i na taˈo ei “menema,” “po” aore ra “apoo.” I roto râ i te rahiraa o te mau reo, aita e taˈo e horoa ra i te auraa taa maitai o teie na taˈo Hebera e Heleni. No reira te Huriraa o te ao apî e faaohipa ˈi i na taˈo she’ohlʹ e haiʹdes i roto i te mau nota i raro i te api. Eaha te auraa mau o teie na taˈo? E tapao na tatou e nafea te reira e faaohipahia ˈi i roto i te tahi mau irava Bibilia.

Te na ô ra te Koheleta 9:10 e: “Aore hoi e ohipa, aore e imiraa, aore hoi e ite, aore hoi e paari, i te apoo [she’ohlʹ] ta oe e haere na.” Te auraa anei e te she’ohlʹ, o te hoê ïa menema, i reira paha te hoê taata herehia i te hunaraahia? Eita. Ia faahiti te Bibilia i te hoê vahi hunaraa, aore ra menema, o te tahi atu ïa taˈo Hebera e Heleni te faaohipahia ra, e ere râ she’ohlʹ e haiʹdes. (Genese 23:7-9; Mataio 28:1) Aita atoa te Bibilia e faaohipa ra i te taˈo she’ohlʹ no te hoê menema i reira e hunahia ˈi e rave rahi taata, mai te hoê menema fetii e aore ra te hoê apoo haapueraa tino pohe.—Genese 49:30, 31.

Te faataa ra ïa te she’ohlʹ i teihea vahi? Ia au i te Parau a te Atua, e ere noa te she’ohlʹ aore ra haiʹdes i te hoê menema iti rahi no te taata e rave rahi. Ei hiˈoraa, te tapao ra te Isaia 5:14 e mea “rahi” te apoo, aore ra she’ohlʹ, “e ua hamǎmǎ hua i to ˈna vaha, aore e faito.” Noa ˈtu e ei auraa parau, ua horomii ê na te apoo, aore ra she’ohlʹ, ehia rahiraa taata pohe, e au noa ra e e hiaai rahi â to ˈna. (Maseli 30:15, 16) Taa ê roa i te mau vahi hunaraa mau atoa o te nehenehe e farii i te tahi noa numera taata pohe, “aore roa e fiuraa” to “hade [she’ohlʹ].” (Maseli 27:20) Te auraa, eita roa ˈtu te apoo, aore ra she’ohlʹ, e î. Aita to ˈna e taotiaraa. No reira, e ere te haiʹdes, aore ra she’ohlʹ, i te hoê vahi e vai mau ra. O te apoo râ o te taata pohe taatoa, te vahi taipe i reira te rahiraa o te taata e taoto ai i roto i te pohe.

E tauturu te haapiiraa Bibilia o te tia-faahou-raa ia tatou ia taa ˈtu â i te auraa o te she’ohlʹ e haiʹdes. Te taai ra te Parau a te Atua i te she’ohlʹ e te haiʹdes i te huru pohe te vai ra te tia-faahou-raa.a (Ioba 14:13; Ohipa 2:31; Apokalupo 20:13) Te faaite atoa ra te Parau a te Atua e i roto i te she’ohlʹ, aore ra haiʹdes, te vai ra te feia i tavini ia Iehova e e rave rahi atoa aita i tavini ia ˈna. (Genese 37:35; Salamo 55:15) No reira, te haapii ra te Bibilia e “e tia-faahou-raa to tei pohe, te feia parau-tia e te feia parau-tia ore.”—Ohipa 24:15.