Te mau ati mea hinaarohia anei te reira e te Atua?

I TE RURURAA te fenua i raro aˈe i to ratou avae, ua manaˈo te tahi mau taata o te tau tahito e te hauti ra te hoê mea ora i raro aˈe i te fenua. E rave rahi atoa tei manaˈo e te patiri, te uira e te vero o te mau tapao ïa e te tupu ra te tamaˈi i rotopu i to ratou iho mau atua.

No te tamata i te paruru ia ratou i te mau ati, ua faaohipa ïa taua mau taata ra i te mau haapaoraa no te tamǎrûraa i to ratou mau atua. Teie te nehenehe e taiohia no taua tumu parau ra i roto i te buka Ati! Ia tahoo anaˈe te natura (beretane): “I roto i te tuhaa rahi o te Tuatapaparaa, ua tamata te taata i te faataa i te mau ati natura ta ˈna e farerei na (...) na roto i te mau peu a te mau nunaa tataitahi, te aai e te haapaoraa.”

I to tatou nei tau, i roto i te mau fenua reo beretane, e parau-pinepine-hia e “e ohipa na te Atua” te mau ati, ia au i te mau parau no te hoê haavaraa. Teie râ, ua parau te hoê taata aravihi no te pae o te ture no te XIXraa o te senekele e: “Te manaˈo nei au e aita roa ˈtu teie parau e faataa ra i te hoê ohipa a te Atua ia au i te Bibilia (...). Te faataa ra râ i te hoê tupuraa maere o te ore e nehenehe e itehia na mua ˈˈe a tupu ai e o te ore hoi tatou e nehenehe e rave i te tahi mau ravea no te paruru mai ia tatou.”

Te mau ohipa mau a te Atua

Ia ore tatou ia feaa no nia i te mau ohipa a te Atua, e tia ia tatou ia ite na mua roa e eaha te mau tapao faaite e na te Atua e faatupu ra i tera aore ra tera ati.

Te faaite papu mai nei te Bibilia e e Mana-hope te Atua (Exodo 6:3). Te parau atoa ra râ oia e: “O tei tia roa ta ˈna ohipa ra; o tei au atoa to ˈna ra mau haerea; e Atua parau mau, e te ino ore ra; e parau-tia ta ˈna e te titiaifaro!” — Deuteronomi 32:4.

I te mea hoi e ua ite tatou e e Atua parau-tia Iehova, e te tia e te haapao maitai i to ˈna iho mau haerea, e ohie noa ïa ia tatou i te faataa i te mau tapao faaite e no ô mai taua ati ra i te Atua. Teie te tahi mau tapao faufaa: 1) E tano noa taua ohipa ra i te opuaraa a te Atua; 2) e faaara te Atua na mua ˈˈe oia e ohipa mai ai; 3) e horoa oia i te mau faaueraa i te mau taata e auraro ia ˈna ia ora mai ratou.

Ia vai noa te reira i roto i to tatou feruriraa, e hiˈo anaˈe na tatou e piti tupuraa i reira te Atua e faatupu ai i te ati. A tahi, i te tau o Noa, ua hau atu i te 4300 matahiti i teie nei.

Te hoê ohipa o te Atua iho te tumu

Eaha te itehia ra i nia i te fenua i te tau o Noa? “E ino rahi to te taata o te ao nei, e ua ino anaˈe (...) te mau opuaraa atoa o te aau i te mau mahana atoa ra. Ua ino roa ra te fenua i mua i te aro o te Atua, ua î te fenua i te parau-tia ore.” — Genese 6:5, 11.

Ua opua ihora te Atua i te tamâ i te fenua i te mau taata iino na roto i te faatupuraa i te hoê ati rahi roa. I te mea hoi e o ˈna te “fatu” o te palaneta, e tia iho â i te Poiete ia na reira ia hiˈo-anaˈe-hia te hairiiri o te taata.

Tera râ, ua ite maira te Atua i te haapao maitai o Noa e to ˈna utuafare. Ua tapu oia ia ratou e e faaora o ˈna ia ratou i roto i te ati e fatata maira mai te peu e e auraro ratou i ta ˈna mau faaueraa (Genese 6:13-21). Ua auraro anei o Noa e to ˈna utuafare? Te faaite maira te Bibilia e: “Ua na reira hoi Noa i te mau mea atoa ta te Atua i faaue mai ia ˈna ra, o ta ˈna ïa i rave maite.” — Genese 6:22.

Ua haamaitaihia anei o Noa no to ˈna auraro-maitai-raa? E; te faataa maira te aposetolo Petero e “faaora ihora râ [te Atua] ia Noa i te taata i aˈo i te parau-tia ra, o te toovau ïa i te feia i faaorahia ra, a hopoi mai ai oia i te diluvi i teie nei ao paieti ore ra”. (Petero 2, 2:5.) Ma te papu maitai, e aupuru maitai te Atua i to ˈna mau tavini, e faatae mai oia i te parau ia ratou e e haapao maite oia ia ora mai ratou ia faatupu anaˈe oia i ta ˈna ohipa. Te parau ra hoi te Bibilia e: “Aita te Fatu ra a Iehova e peu i rave, maori ra ia faaite i ta ˈna parau i moe i tana ra mau tavini i te mau peropheta.” — Amosa 3:7.

Te tahi â ohipa ta te Atua

Ua ohipa faahou mai â te Atua e rave rahi senekele i muri aˈe i te diluvi. Ua haamou te Atua i te mau oire o Sodoma e o Gomora no te haerea taiata faufau o to raua mau taata. Aita i itehia aˈe hoê ahuru taata parau-tia! E toru anaˈe iho râ: o Lota e ta ˈna na tamahine toopiti.

Eaha râ te huru o te mau taata o taua na oire ra? Ei hiˈoraa, a hiˈo na i te huru o te mau tane momoa a na tamahine a Lota i to ˈna parauraa ˈtu e e faarue i te oire no te mea fatata te Atua i te faatupu i ta ˈna haamouraa: “Mai te tahoata ra râ oia i taua na hunoa no ˈna ra.” — Genese 19:14.

Na mua ˈˈe, tei roto te mau tia vea o te Atua i te fare o Lota, “ua haere paatoa maira te taata atoa o taua oire ra, te mau taata no Sodoma, o te taata apî e te ruhiruhia, ua haaati maira i taua fare ra”. Eaha ta ratou e hinaaro ra? Ua pii onoono noa maira ratou ia Lota i te na ôraa e: “Tei hea na taata i haere tia mai ia oe nei i teie nei rui? A aratai mai i rapae ia matou nei, ia ite [taoto] matou ia raua.” Te hinaaro ra ratou e rave i ta ratou mau peu mahu faufau i nia i te mau melahi tonohia mai e te Atua! No te mau peu tiaa a teie mau taata i haamou roa ˈi te Atua i teie na oire. — Genese 19:4, 5, 23-25.

Na te Atua iho â teie ohipa i rave, ia au i teie mau parau e: ‘Na roto i te faariroraa i na oire ra o Sodoma e o Gomora ei rehu auahi, ua faautua ˈtura te Atua ia ratou, faariro atura ei hiˈoraa na te feia e mau i te paieti ore a muri atura; e faaora ˈtura ia Lota parau-tia ra, o tei mauiui i te parau viivii a te feia parau iino ra.’ — Petero 2, 2:6, 7; Jude 7 . WD3.3,

Te mau ati o ta te Atua i ore i hinaaro

Te hoê hiˈopoa-maite-raa i te mau ati o ta te tahi pae e parau nei e e mau ohipa na te Atua o te faaite papu mai ïa e e rave rahi te mau ati na te taata iho i faatupu. Te vai atoa râ te tahi mau ati i faatupuhia e te puai natura, mai te mau aueueraa fenua e te mau mataˈi rorofai.

Noa ˈtu â ïa e ua faaite te Bibilia e e rave rahi te mau ati na te taata i faatupu aore ra na te puai o te natura, e mau tapao anaˈe hoi no te mau “mahana hopea” o ta tatou e ratere nei, aita râ oia e horoa ra i te mau faataaraa papu ia nehenehe tatou ia paruruhia no teie taime (Timoteo 2, 3:1-5; Mataio 24:3-12). Te tumu e ere na te Atua i hinaaro teie mau ati. Tera râ, te faataa ra te Bibilia e no te aha te mau taata maitai e te mau taata ino atoa e farerei ai i taua mau ati ra.

I to na taata matamua oreraa i auraro i te mau faaueraa papu maitai ta te Atua i horoa ia raua, ua iriti ïa raua i te uputa no te mau ati. Ua faaara mai hoi te Atua i te taata i te na ôraa e: “E pohe ïa oe.” (Genese 2:17). Ua faatupu mai ta ˈna orureraa i te mau faahopearaa ino mau, mai ta te aposetolo Paulo e faataa ra i te na ôraa e: “No te taata hoê ra (...) ua taea-atoa-hia te taata atoa i te pohe.” — Roma 5:12.

E ere râ te reira anaˈe. Na roto i te faaroo-ore-raa i te Atua, ua patoi te taata matamua e te vahine matamua i ta ˈna faatereraa e ta ˈna paruru. Eita raua e hinaaro faahou ia faatere mai oia ia raua e to raua vahi faaearaa, te palaneta Fenua. I te mea hoi e ua faarue raua i ta ˈna faatereraa, ua faaea atoa ïa te Atua i te paruru mai ia raua i te mau ati.

Eaha ïa te auraa teie mau mea no tatou? E “e tau râ e te tiaia noa” ta tatou paatoa e farerei e eita ta tatou e nehenehe e ite na mua roa i te mau ati e tae mai i nia ia tatou. Mai te mau iˈa i noaa i roto i te upeˈa ra, e te mau manu i noaa i te marei ra, “o to te taata ïa fifiraa i te anotau ino ra”, ei hiˈoraa “ia uˈana noa mai te pohe i nia ia ratou”. — Koheleta 9:11, 12.

Tera râ, noa ˈtu â ïa e i roto i te tahi mau fenua e nehenehe e faarirohia te mau ati ei mau ohipa na te Atua ia au i te hiˈoraa a te haava, e ere roa ˈtura na te Atua i faatupu taua mau ati ra.

Fatata roa te Atua i te ohipa faahou mai

Ma te faataa mai i te tupuraa rahi roa ˈˈe o te mau mahana hopea o te faanahoraa o te mau mea o ta tatou e ora nei mai te matahiti 1914 mai, ua faaite o Iesu i teie faaararaa e: “E ati rahi hoi tei te reira tau, aitâ ïa ati mai te matamua mai o teie nei ao (...), e e ore roa hoi a muri atu.” (Mataio 24:21). E haamou roa taua ati ra i teie faanahoraa ino. E tae atu oia i nia i “te tamaˈi i te mahana rahi o te Atua Puai Hope”, i Aramagedo, o te faatupu atu i te hoê ati no te feia e tamau roa ra ‘i te ora e teie nei ao’. — Apokalupo 16:14, 16; Ioane 17:14; Petero 2, 3:3-13.

Eaha ïa teie huru haavaraa? O te hoê ïa haavaraa maitihia. O te “feia aore [e hinaaro] i te ite i te Atua e (...) tei ore i faaroo i te evanelia o to tatou Fatu o Iesu Mesia ra” e haamouhia ïa ratou (Tesalonia 2, 1:8-10). Eita taua ati ra e hauti noa ˈtu i te feia tei faaroo i te faaararaa e te mau faaueraa a te Atua, mai ia Noa e to ˈna utuafare fetii. E ohipa mau te reira na te Atua, no te mea e paruru oia i to ˈna mau tavini. No reira e mea taa ê roa oia i te tahi mau ati o te haapohe nei i te feia maitai e te feia ino atoa. — Hiˈo i te Isaia 28:21.

No te aha tatou e papu maitai ai e te “ati rahi” e fatata mai nei e ohipa mau ïa te reira na te Atua? No te mea e pahono taua ati ra i te mau ohipa i faaitehia i nia nei:

1) E tano maitai oia e te opuaraa i faaitehia e te Atua: te haamouraa i te faanahoraa o te mau mea ino e vai nei. — Ieremia 25:31-33; Zephania 3:8; Apokalupo 16:14, 16; 19:11-21.

2) Ua na-mua-hia mai ia ˈna te hoê faaararaa: Fatata i te hitu ahuru matahiti i teie nei, to te mau Ite a Iehova faaara-maramarama-noa-raa i to ratou taata-tupu e te fatata maira te hopea o te faanahoraa o te mau mea e vai nei e te poro nei ratou i te parau apî maitai o te Basileia o te Atua. Ua maraa rahi roa ta ratou ohipa e ua tapaohia i teie nei hau atu i te toru mirioni Ite i te ao atoa nei (Mataio 24:14; Ohipa 20:20). Te faaitoito atu nei matou ia outou ia faaroo atu i ta ratou mau parau ia haere faahou atu ratou i ô outou. Eiaha e pee i te mau taata o te tau o Noa, mai ta Iesu i parau e, “aore roa i ite” e pohe atura ratou i roto i te diluvi. — Mataio 24:37-39.

3) Ua horoahia te mau faaueraa i te feia atoa e hinaaro i te ora ˈtu: E itehia teie mau faaueraa i roto i te Bibilia: “O te Atua te mataˈu atu, e haapao hoi i ta ˈna parau.” (Koheleta 12:13). Te taviri no te ora mai o te iteraa ïa e eaha te mau faaueraa a te Atua e ia pee atu i te reira. Ua faaite papu mai o Iesu e: “Teie hoi te ora mure ore, ia ite ratou ia oe i te Atua mau ra, e ia Iesu te Mesia i ta oe i tono mai.” (Ioane 17:3). E oaoa roa te mau Ite a Iehova ia faaite atu ia outou i te mau faaueraa atoa a te Atua.

Tei roto atoa i te Parau a te Atua teie parau tapu e: “E tiai atu ia Iehova, a haapao maite ai i to ˈna eˈa (...). E ite atoa oe i te pohe o te paieti ore ra.” (Salamo 37:34). E nehenehe outou e faaite e te tiaturi ra outou ia Iehova na roto i te faarooraa ˈtu i teie nei iho â i ta ˈna mau faaueraa e na roto atoa i te peeraa ˈtu i te reira. Te faaite ra ïa outou i te Atua e i te mau taata atoa e te faaitoito ra outou i te haapao i te hinaaro o te Atua, e te hinaaro mau ra outou e ora. “E te mou nei hoi teie nei ao (...), o tei haapao râ i to te Atua ra hinaaro, e tia ïa i te oraraa e a muri noa ˈtu.” — Ioane 1, 2:15-17; Mataio 28:19, 20.

E mea anaanatae mau te oraraa no a muri atu no te feia e paimi nei no nia i te ohipa o ta te Atua e fatata nei i te rave e o te faaitoito nei no te imiraa i to ratou ora. Inaha, e faaôhia ˈtu hoi ratou i roto i te hoê tau apî, i raro aˈe i te faatereraa o Basileia o te Atua (Mataio 6:9, 10). Teie râ, i roto i te faanahoraa apî, eaha te mau ohipa e ravehia no te parururaa i te taata i te mau ati ta te taata e faatupu aore ra ta te mau puai o te natura?

Te hoê faaararaa a te Atua i te mau ati

Ia faatere anaˈe mai te Basileia o te Atua i te fenua atoa nei, e ite atu ïa te taata atoa i te hoê anotau hau e te haamaitai-faahou-raa. E mea oaoa roa ia manaˈonaˈo i te mau haamaitairaa e noaa ia ratou na roto i te auraroraa i te faatereraa a te Arii teitei tei haamauhia e te Atua, o Iesu Mesia.

A feruri na i ta Iesu ohipa i rave i to ˈna parahiraa i te fenua nei no te haapapuraa i te ohipa mau o ta ˈna e rave ei Arii no te Basileia: ua faaora oia i te maˈi e te mau pirioi, ua faaaraara oia i te mata o te feia matapo e te tariˈa o te feia tariˈa turi, ua haamatara oia i te parau a te feia vava, e tae noa ˈtu i te faatia-faahou-raa i te feia pohe! — Mataio 15:30, 31; Luka 7:11-17.

No reira te Bibilia i horoa mau ai i te haapapuraa e i raro aˈe i te Basileia o te Atua “e horoi [te Atua] i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra”. — Apokalupo 21:4.

Te mau ohipa ta Iesu i rave i nia i te fenua nei te faahohoˈahia ra ïa i te tauturu o ta ˈna e rave atu i nia i to ˈna mau taata i roto i te faanahoraa apî o te mau mea i mua nei. E paruru anei oia ia ratou i te mau ati natura? A haamanaˈo na e i te hoê mahana ua faaore o ˈna i te hoê na roto i te tamârûraa i te mataˈi. Ua maere roa ta ˈna mau pǐpǐ e ua parau ratou ratou iho e: “O vai teie o tei faaroo te mataˈi e te moana atoa ia ˈna?” (Mareko 4:37-41). I te mea hoi e e nehenehe ta ˈna e tapea i te puai o te natura, e haapao ïa te Arii puai teitei no te faanahoraa apî o te mau mea eiaha roa ˈtu te hoê aˈe ati ia haapeapea mai i te taata atoa.

Teie râ, noa ˈtu eaha te mau fifi tei taeahia e to tatou palaneta e te mau vahi e faaeahia ra e te mau animala e te mau raau tupu na roto i te mau ati ta te taata i faatupu aore ra ta te puai o te natura, ma te papu maitai, e tatai iho â te Basileia o te Atua ia ratou. Tei roto i te Bibilia taua parau tohu ra e: “E rearea te medebara e te vahi pâpâmaro ra no ratou; e oaoa hoi te fenua aihere e e ruperupe hoi mai te tiare ra: e ruperupe rahi ïa, e ouˈaouˈa noa ma te oaoa i te himene (...). E pihaa mai hoi te pape i roto i te medebara, e te mau anavai i roto i te vahi pâpâmaro ra.” — Isaia 35:1-7.

Na roto i te tabula haapiiraa no te ao atoa nei o te ravehia ˈtu i roto i te faanahoraa apî o te mau mea, e haapii pauroa ïa te mau taata atoa i te rave i te ohipa maitai e ia haapao atoa i te maitai o to ratou taata-tupu e tae noa ˈtu i te huru o te fenua iho. “Te haapii nei to te ao atoa nei i te parau-tia i reira.” (Isaia 26:9). I te mea hoi e e fanao paatoa te taata i taua haapiiraa a te Atua ra e e haapiihia ïa ratou ia tia roa ratou i te pae feruriraa e te pae tino, eita ïa te hoê hape no te tia-ore-raa o te taata e tupu faahou mai. Eita hoê aˈe taata e faatupu faahou i te ati ma te haapao ore i te huru o ta ˈna ohipa no te haapao noa i to ˈna iho mau hinaaro miimii.

I to tatou nei tau, noa ˈtu na te taata aore na te puai o te natura, e farerei pauroa tatou paatoa i te ati. Teie râ, te ati o ta tatou e haapeapea rahi, o te “ati rahi” ïa, o te hoê te reira faautuaraa na te Atua o te haamou roa i te faanahoraa o te mau mea ino o teie tau. E tatara taua ohipa a te Atua ra i te eˈa no te hoê tau apî no te parau-tia no te feia e hinaaro nei i teie nei iho â i te haapii ia ite i te parau mau. E mea papu mau e e ite atu iho â taua feia ra i te tupuraa mau o te parau ra e: “O to matou nei Atua, o te Atua ïa e ora ˈi.” (Salamo 68:20). Te feia e e faaite nei i teie nei iho â i te paari o te Atua e tomo atu ïa ratou i roto i te faanahoraa apî o te mau mea i reira ‘ratou e parahi ai ma te manaˈo ore e te mataˈu ore i te ino’. — Maseli 1:33.

[Tumu parau tarenihia i te api 6]

Te mea e faaite mai e e ohipa te reira na te Atua:

1) E tano maitai ïa i te opuaraa a te Atua.

2) E faaara mai iho â te Atua na mua ˈˈe a faatupu ai.

3) E horoa oia i te mau haamaramaramaraa atoa ia ora mai te taata.

[Hohoˈa i te api 7]

Te haamouraahia o Sodoma e o Gomora e ohipa te reira na te Atua.

[Hohoˈa i te api 9]

Ua faaite o Iesu i to ˈna mana i nia i te mau puai o te natura na roto i te tamârûraa i te hoê mataˈi puai roa.