Te O.N.U.: tiaturiraa o te hoê taata
TE ALBERTINA, o te hoê ïa manu reva DC-6B, e maha matini tei vaere roa i te uru aihere no Afirika. Mea na nia mai oia i te tahua tauraa manu reva no Ndola, i Rhodésie i te pae Apatoerau (i teie mahana o Zambie ïa). 16 horopatete i nia i taua manu reva ra, e tei roto atoa te hoê taata politita rahi faahiahia no te ao nei no taua tau ra.
E po pouri hoi to te pailati faatauraa i to ˈna manu reva. “Maa taime i muri iho, tano atura te pererau o te matini i nia i te mau tumu raau (...). Fati atura te muaraa o te pererau o te manu reva, e tau setoni i muri iho taa ê roa ˈtura te toea e rave rahi te tuhaa (...). I te tafifiraa matamua, tau hanere metera tei terehia, i muri iho û atura te toea o te pererau i nia i te hoê ofaaraa rô rahi roa. Taviriviri atura te manu reva, e huri faahou atura i te pae aui i reira te mau-roa-raa i roto i te auahi ura, ua fariu faahou â te muaraa i te vahi ta ˈna i haere mai.”
I te taeraa mai te mau taata tauturu, ua ite atu ratou 14 tino pohe tei paapaa i te auahi i roto i te manu reva. Te taata tei ora mai e pae mahana ïa te maororaa. Tau metera te atearaa i te manu reva tei parari te vai ra te tino o Dag Hammarskjöld, te papai parau rahi o te Hau amui. Aita faahou te taata rave ohipa matamua a te hau no te ao nei, oia hoi o O.N.U. tane mai ta te tahi pae ïa iˈoa e pii ra. — Te pohe huru ê o Dag Hammarskjöld, a Arthur Gavshon.
Te O.N.U. e te mau Ekalesia
Ua maere roa te ao atoa nei i te poheraa o Dag Hammarskjöld. E rave rahi mau taata te uiui nei e mea nafea te O.N.U. ia farii i te moeraa o taua taata huru ê ra e te maramarama atoa hoi tei riro ei taata faufaa roa i roto i te tuhaa no te papairaa parau rahi.
Ua faarirohia o Hammarskjöld mai te hoê taata kerisetiano faaroo mau. I roto i ta ˈna mau papairaa te manaˈohia ra e te tiaturi nei oia e ua faataa te Atua ia ˈna no te haapao i te Hau amui. Ia parau anaˈe oia i te mau Ekalesia, e anoi oia i te tiaturiraa i te Atua e te tiaturiraa i te O.N.U. I te hoê mahana ua parau oia e: “E tia i te Faanahoraa [a te mau Hau amui] e te mau Ekalesia ia turu i te mau faaitoitoraa e ravehia ra e te mau taata manaˈo maitai atoa, ma te ore e faaô mai i te parau no to ratou tiaturiraa aore ra no ta ratou haapaoraa no te faatupuraa i te hau i nia i te fenua nei.” Te haapapu atoa ra oia e: “Noa ˈtu â ïa to ratou taa-ê-raa i te pae natura e i te pae no te aravihi, hoê â opuaraa ta te mau Ekalesia e ta te mau Hau amui e hoê â vahi raveraa ohipa ta raua, i reira raua e rave amui ai i te ohipa.”
Na Dag Hammarskjöld atoa i opua ia hamanihia te piha feruriraa e vai ra i te vahi e tomo atu ai te taata o te fare a te O.N.U. Ua hamanihia taua piha ra i te moni no roto i te afata a te hoê pupu mahometa, ati iuda, katolika, e te porotetani. I ropu i taua piha ra te vai ra hoê apaapa auri haamanina-maitai-hia e tei turamahia e te hoê mori.
Eaha te auraa o taua apaapa ofai ra no Hammarskjöld? Ua papai oia e: “E nehenehe e faariro ia ˈna mai te hoê fata, te hoê fata aita hoê aˈe taoˈa i nia iho, eiaha no te mea e aita e Atua, eiaha atoa no te mea e e fata o te pûpûhia ˈtu na te hoê Atua ite-ore-hia te iˈoa, no te mea râ e pûpûhia ˈtu na te Atua ta te taata e haamori i raro aˈe e rave rahi mau huru e e rave rahi mau iˈoa taa ê te tahi i te tahi.”
Tau miria taata teie e tiaturi nei i te Atua. E rave rahi i rotopu ia ratou tei ite i te mau pâpa mai ia Ioane XXIII, Paulo VI e o Ioane-Paulo II i te amuiraa ˈtu i roto i te mau tia faaroo porotetani no te tahoê i ta ratou tururaa e ta ratou haamaitairaa i taua faanahoraa tei pûpûhia no te tapea i te hau. Te vai atoa ra ta te Vaticana te hoê taata hiˈopoa tamau i roto i te Hau amui. No taua turu a te mau haapaoraa ra i manaˈo ai te taata e e nehenehe mau te O.N.U. e riro ei mauhaa no te haamau i te hau e te ino ore i roto i te rima o te Atua. I teie mahana, te tiaturi nei ratou e te matahiti 1986 o te matahiti ïa o te haamau i te hau i roto i te ao taatoa nei na te O.N.U.
E o outou, te manaˈo ra anei outou e te O.N.U. te ravea ïa e na reira te Atua i te horoa mai i te hau no to tatou nei palaneta? Te haapapu maira anei te 40 matahiti o te aamu o taua faanahoraa ra e ua haamaitaihia oia e te Atua? Ua tahoê mau anei te O.N.U. i te mau nunaa no te haamau i te hau?
[Hohoˈa i te api 3]
Ua titau o Dag Hammarskjöld i te mau Ekalesia ia turu i te O.N.U.
[Faaiteraa i te tumu]
Hohoˈa O.N.U.