Te pororaa i tera e tera fare

Ua tatara te vea ra Christianity Today e: “Te itehia ra i roto i te mau Ekalesia marite te hoê anaanataeraa rahi no te pororaa”. No te hia râ huru pororaa?

Aita i maoro aˈenei, ua faaitoito e rave rahi mau Ekalesia porotetani i “te pororaa i te feia matauhia”, oia hoi te pororaa ˈtu i to ˈna mau hoa, to ˈna mau hoa tapiri e i te mau melo o to ˈna fetii. Te parau nei te hoê Ekalesia e mea maitai aˈe teie huru pororaa i te haere atu e farerei i te mau taata matau-ore-hia e te huti nei oia i te ara-maite-raa i nia i te mau hopea o te hoê titorotororaa ravehia i nia e 14 000 o to ˈna mau melo. “75 e 90 i nia i te hanere i rotopu ia ratou o tei faaite e ua noaa mai ia ratou te faaroo kerisetiano maoti i te paraparauraa a te hoê hoa aore ra a te hoê fetii.” Te haapapu atoa ra te titorotororaa e ia au i te paeau rahi o te mau Ekalesia, e ere i te mea faahiahia i te pororaa i tera e tera fare. Hau atu, “eita roa ˈtu te rahiraa o te mau kerisetiano e au i te reira huru pororaa”.

E nehenehe mau anei râ e haapapu e ere i te mea maitai te pororaa i tera e tera fare? Te haapapu mai nei te mau Papai e aita te mau kerisetiano matamua i poro noa i to ratou mau metua e hoa, teie râ, ua noaa atoa mai ia ratou te mau tapao faahiahia na roto i te pororaa i tera e tera oire e tera e tera fare. — Luka 8:1; Ohipa 2:41; 4:4; 5:14, 42; 20:20, 21.

I to tatou nei mahana, te faaohipa nei te mau Ite a Iehova hoê â huru ravea e ta te mau aposetolo. Ua hiˈopoa te hoê sociologue beretane, o Bryan Wilson, i te maraaraa a te mau Ite a Iehova i Tapone e teie ta ˈna faaotiraa: “Te rahiraa [58,3 i nia i te hanere] o te mau taata o tei riro mai e mau Ite o tei faaite e ua anaanatae mai ratou na roto i te mau farereiraa i tera e tera fare.” Oia mau, te haapapu mai nei te mau tupuraa e mea maitai iho â te taviniraa i tera e tera fare, noa ˈtu e te faahuru ê ra oia i te “rahiraa o te mau kerisetiano”.