Ezekiela
PHARAO I FAITOHIA I TE HOÊ AREZI MAORO I LEBANONA RA.
31 E tae aˈera i te matahiti hoê ahuru ma hoê, e te toru o te marama, e te mahana matamua o taua marama ra, i tae mai ai te parau a Iehova ia ˈu nei, na ô maira, 2 E te tamaiti a te taata na, e parau atu i te arii o Aiphiti ra ia Pharao, e te taata rahi atoa no ˈna ra; E au oe ia vai i te rahi? 3 Inaha, mai te arezi i Lebanona te ati Asura, ma te amaa nehenehe, e te marumaru, e te teitei i te tiaraa, e ua tae roa to ˈna auru i roto i te mau amaa meumeu ra. 4 Na te pape oia i faarahi, na te pape hohonu oia i hopoi i nia e teitei noa ˈˈe; ua hopoi mai i to ˈna taheraa rii i to ˈna tanuraa e ati noa ˈˈe, ua tuu maira i to ˈna pape rii matatia e tae noa ˈtura i te mau raau atoa o te ô ra. 5 I hopoi teitei-hia ˈi oia i nia e ua hau ê i te mau raau atoa o te aua ra; e ua rahi to ˈna mau amaa, e ua tupu hoi te mau amaa i te maoro, i te rahi o te pape i to ˈna tororaa ˈtu. 6 I roto i to ˈna mau amaa te mau manu o te reva atoa nei i te ofaaraa, e i raro aˈe i te mau amaa no ˈna te puaa o te aru nei i te fanauraa; e i raro aˈe i to ˈna mǎrǔ te mau nunaa rarahi atoa i te parahiraa. 7 Nehenehe aˈera oia i to ˈna rahiraa, e te maoro hoi o tana amaa; e rave rahi hoi te pape i pihai iho i to ˈna aˈa. 8 Te mau arezi i te ô a te Atua aore oia i moe ia ratou: e ore te mau berusi e au i te mau amaa no ˈna, e ore atoa e faitohia te mau oramuna i te mau amaa no ˈna; e aore roa e raau i roto i te ô a te Atua e au ia ˈna i te nehenehe. 9 Ua faanehenehe au ia ˈna i te mau amaa no ˈna i te rahi ia taio ra, e te mau raau atoa i Edene, i roto i te ô a te Atua tei feii ia ˈna.
10 E teie nei, te na ô maira te Fatu ra o Iehova; No te mea te teitei ra oe i te tiaraa, e ua tae to ˈna auru i roto i te mau amaa rarahi, e ua tae tana aau i to ˈna teiteiraa; 11 i tuu atu ai au ia ˈna, i te rima o te taata puai o te mau fenua nei; o tei faahepo mai ia ˈna ra: ua tiahi au ia ˈna i rapae i ta ˈna ra hara. 12 E na te mau taata ěê, o tei riariahia e te mau fenua nei, i tâpû ia ˈna i raro, e ua faarue atu ia ˈna; i nia i te mau mouˈa, e i raro atoa i te mau peho i te mairiraa to ˈna mau amaa, e na te mau pape tahe o te fenua i ofatifati i te mau amaa no ˈna; e reva anaˈe atura te mau taata atoa o te fenua nei i raro mai raro aˈe i to ˈna mǎrǔ, e ua vaiiho-noa-hia oia. 13 Ei nia i taua ino no ˈna ra parahi ai te mau manu atoa o te reva nei, e riro hoi te mau puaa atoa o te aru ra i nia i to ˈna mau amaa: 14 ia ore ia faateitei te mau raau atoa i te hiti pape, i to ratou ra tiaraa teitei, e eiaha atoa e faataehia to ratou auru i roto i te amaa meumeu ra, eiaha atoa te mau raau ia tia i nia i to ratou teitei, e te mau raau atoa e inu i te pape ra: ua tuu-atoa-hia hoi te reira no te pohe, i te mau vahi haehaa i te fenua nei, i ropu atoa i te mau tamarii a te taata pohe noa nei, i te feia e reva i raro i te apoo ra.
15 Te na ô maira te Fatu ra o Iehova; I te mahana i reva ˈi oia i raro i hade ra, ua faaue au i te oto, ua tapoˈi au i te moana ia ˈna, e ua tapea vau i te pape pue, e mau ihora te moana atoa ra: ua faaahu vau ia Lebanona i te ahu ereere ia ˈna, e ua oto atoa te mau raau atoa o te fenua nei ia ˈna. 16 Ua aueue te mau fenua ia ˈu i te haruru o to ˈna hiˈaraa, ia ˈu i tuu ia ˈna i raro i hade ra, e te feia atoa e pou i raro i te apoo ra: e te mau raau atoa i Edene, o tei haamaitaihia e tei maitai i Lebanona, tei inu atoa i te pape ra, maitai aˈera i te vahi haehaa i te fenua nei. 17 O ratou e oia atoa i te taeraa ˈtu i raro i hade ra, i te feia pohe i te ˈoˈe ra; e te feia tauturu ia ˈna i parahi i raro aˈe i to ˈna mǎrǔ, o tei pohe atoa ïa i roto i te mau fenua atoa ra. 18 E au oe ia vai i te nehenehe e te rahi i roto i te mau raau atoa i Edene? e tuuhia maira oe i raro e te mau raau atoa i Edene, i te vahi haehaa i te fenua nei: ei roto i te feia peritome-ore-hia ra oe vai noa ˈi, i te feia i pohe i te ˈoˈe ra. O to Pharao teie hopea, o te taata rahi atoa no ˈna ra, te na reira maira Iehova.