Ezekiela

E OTORAA IA AIPHITI I TE PAURAA I TE ˈOˈE O BABULONIA.

32 E tae aˈera hoi i te matahiti hoê ahuru e ma piti, i te ahuru ma piti hoi o te marama, e te mahana hoê i taua marama ra, i tae mai ai te parau a Iehova ia ˈu nei, na ô maira, 2 E te tamaiti a te taata na, a rave oe i te parau oto i te arii o Aiphiti ra ia Pharao, e na ô atu ia ˈna, E au oe i te liona i roto i te mau fenua nei, e mai te teni oe i raro i te tai ra: ua haapuahea oe i raro i to mau pape, e ua faatiarepu oe i te pape i to avae, e ua reru to ratou pape tahe ra. 3 Te na ô maira te Fatu ra o Iehova; E hohora vau i tau upeˈa i nia ia oe ra, i ropu i te amuiraa o te taata atoa e rave rahi; e na ratou oe e ume mai i nia i roto i tau upeˈa ra. 4 E vaiiho vau ia oe i nia i te fenua; e huri au ia oe i nia i te vahi atea ra, e na ˈu e faatau i te mau manu atoa o te reva i nia ia oe, e faaî i te mau puaa o te fenua atoa nei ia oe. 5 E tuu vau i to pera i nia i te mau mouˈa, e faaî hoi i te mau peho i to oe ra teitei. 6 E faarari au i te fenua pape haono no oe i to oe ra toto, e tae noa ˈtu ïa i nia i te mouˈa, e î hoi te mau pape tahe ra ia oe. 7 E vehî au i te raˈi, ia tinai au ia oe ra, e te mau fetia ra e faaahuhia e au i te ahu ereere; e tapoˈi atoa vau i te mahana i te ata, e ore hoi te marama e anaana mai. 8 E te mau mea anaana maramarama o te raˈi ra, e faaahu vau i te ahu ereere ia oe; e tuu hoi au i te pouri i nia i to fenua, te na reira maira te Fatu ra o Iehova. 9 E faaoto atu vau i te aau o te taata e rave rahi, ia aratai au i to mau tîtî i te mau fenua ra, i roto i te mau fenua aore i itea e oe ra. 10 E rave rahi te maere ia ˈu ia oe ra, e mǎtaˈu riaria to ratou mau arii ia oe ra, ia faaiteite au i tau ˈoˈe i mua ia ratou: e rurutaina hoi ratou e ore e faaea, te taata atoa hoi i te ora no ˈna iho, i te mahana e hiˈa ˈi oe ra.

11 Te na ô maira hoi te Fatu ra o Iehova, E tae mai te ˈoˈe a te arii o Babulonia i nia ia oe. 12 I te ˈoˈe a te feia puai e hiˈa ˈi to feia rahi ra ia ˈu, te feia riariahia e te mau fenua nei, ratou atoa ra: e rave ino hoi ratou i te teoteo o Aiphiti, e to ˈna atoa ra e rave rahi, e hope ïa i te pohe. 13 E hope roa hoi ta ˈna mau puaa i te pohe ia ˈu, i pihai iho i te pape rarahi ra; e ore ïa e faareru-faahou-hia e te avae taata, e ore hoi e faareru-faahou-hia e te avae puaa. 14 E ateate ta ratou pape ia ˈu i reira, e mai te monoˈi ra ta ratou pape ia faatahe au ra i reira, te na reira maira te Fatu ra o Iehova; 15 Ia faaano atu vau i te fenua ra ia Aiphiti, e aore roa aˈera te mau mea atoa i roto ra; ia hope roa tei parahi i reira i te tairihia e au; e ite hoi ratou e, o Iehova vau. 16 Teie to ratou otoraa ia oto ratou, na te mau tamahine o te mau fenua e parau ia Aiphiti, e to ˈna atoa ra mau taata e rave rahi, ia mihi ratou, te na reira maira te Fatu ra o Iehova.

17 E tae aˈera i te matahiti hoê ahuru e ma piti, e te mahana hoê ahuru e ma pae i taua marama ra, i tae mai ai te parau a Iehova ia ˈu nei, na ô maira, 18 E te tamaiti a te taata na, a oto i te taata atoa o Aiphiti e rave rahi, a huri atu ai ia ratou i raro, e ia ˈna atoa ra, e te mau tamahine o te mau fenua tuiroo ra, i te vahi haehaa i te fenua nei, e te feia atoa e reva i raro i te apoo ra, ma te na ô e,

19 Ua huru ê roa ˈtu ia vai i te nehenehe? a pou mai na i raro e ia faatiraha-atoa-hia oe e te feia peritome-ore-hia. 20 E hiˈa atoa ratou i roto i te feia i pohe i te tairi i te ˈoˈe ra: ua tuuhia ˈtu oia no te ˈoˈe: a arato ê atu ia ˈna e to ˈna feia rahi atoa ra. 21 O tei itoito i taua feia puai ra te parau atu ia ˈna, e to ˈna mau tauturu atoa i rotopu i hade ra; te feia i reva i raro ra, e te vai peritome-ore-hia ra, i roto i te feia atoa i pohe i te ˈoˈe ra.

22 Tei reira Asura e to ˈna atoa ra pǔpǔ: te haaati ra to ratou mau tanuraa ia ˈna: e feia taparahihia, i hiˈa i te ˈoˈe ra: 23 o tei tuuhia to ratou tanuraa i te hiti o te apoo ra, e to ˈna atoa ra tei hiti o tana tanuraa e ati noa ˈˈe: e feia taparahi-anaˈe-hia, i hiˈa i te ˈoˈe ra, o tei faatupu i te mǎtaˈu ia ratou i roto i te feia e ora nei.

24 Tei reira Elama e te feia rarahi atoa no ˈna ra; i te haaatiraa i to ˈna ra tanuraa; e feia taparahi-anaˈe-hia, i hiˈa i te ˈoˈe ra, o tei reva i raro mai te peritome-ore-hia i te vahi haehaa i te fenua nei, o tei faatupu i te mǎtaˈu ia ratou i ǒ te feia e ora nei; ua hopoi râ ratou i to ratou haama, e te feia atoa e reva i raro i te apoo ra; 25 ua tuuhia ratou i roto i te feia taparahihia ra, tei roto i to ratou atoa ra, to ˈna roi; e ua haaati to ratou mau tanuraa ia ˈna: e feia peritome-ore-anaˈe-hia, i pohe i te ˈoˈe: faatupu noâ ratou i te mǎtaˈu ia ratou i roto i te feia ora nei, ua hopoi râ ratou i to ratou haama e te feia atoa i reva i raro i te apoo ra: ua tuuhia ratou i roto i te feia pohe atoa ra.

26 Tei reira Meseka, Tubala, e to ˈna atoa ra e rave rahi: ua haaati to ratou tanuraa ia ˈna: e feia peritome-ore-anaˈe-hia, i tairihia e te ˈoˈe, faatupu noa ˈi ratou i te mǎtaˈu ia ratou i roto i te feia e ora nei. 27 Ua taoto anaˈe ratou i raro e te feia mana atoa ra, to te peritome ore i hiˈa ra, o tei reva i raro i te apoo ma ta ratou mauhaa tamaˈi atoa ra, e ua pae i to ratou mau upoo i ta ratou mau ˈoˈe: e te vai ra te utua o ta ratou hara i nia ia ratou, mǎtaˈu-noa-hia ˈi ratou e te feia mana i te oraraa nei. 28 E e ofati-atoa-hia oe i roto i te feia peritome-ore-hia, e hoê â taoto-atoa-raa e te feia i pohe i te ˈoˈe ra.

29 Tera hoi Edoma, to ˈna mau arii, e te pǔpǔ arii atoa no ˈna, o tei tuu-atoa-hia ma to ratou puai, e te feia i pohe i te ˈoˈe ra: te taoto anaˈe ra i raro ma te feia peritome ore ra, te feia i reva i raro i te apoo ra.

30 Tei reira te mau arii no te pae i apatoerau ra, ratou atoa, e to Sidona atoa ra o tei reva i raro ma te feia i taparahihia ra, ma to ratou mǎtaˈuraahia e ma te haama i to ratou puai; e te vai peritome-ore-hia ra, e te feia atoa i pohe i te ˈoˈe ra, e ua hopoi i to ratou haama mai te feia atoa i reva i raro i te apoo ra.

31 E ite atoa Pharao ia ratou, e maitai aˈera, i te feia rahi no ˈna i pohe i te ˈoˈe ra; o Pharao e te nuu atoa no ˈna ra, te parau maira te Fatu ra o Iehova. 32 I faatupu noa vau i te mǎtaˈu ia ˈna i te feia e ora nei, e tuuhia râ oia i roto atoa i te feia peritome-ore-hia, i te feia i pohe i te ˈoˈe ra, oia Pharao e te taata atoa no ˈna ra, te parau maira te Fatu ra o Iehova.