Ezekiela
31 I te 11 o te matahiti, i te mahana matamua o te toru o te avaˈe, tae faahou maira te parau a Iehova ia ˈu, a na ô ai: 2 “Tamaiti a te taata, a parau ia Pharao arii o Aiphiti e to ˈna nahoa taata:+
‘O vai mai ia oe te rahi?
3 Te vai ra te tahi taata Asura, e tumu arezi no Lebanona.
E amaa raau marumaru nehenehe to ˈna mai to te tumu raau haehaa amaamaa, e mea teitei roa.
Tei roto to ˈna tupuai i te ata.
4 No te pape i rahi ai oia, no te mau pape pihaa hohonu i teitei ai oia.
E tahora anaˈe na pihai iho i te vahi i tanuhia ˈi oia.
Na to ratou mau anavai rii i faararirari i te mau tumu raau atoa o te fenua.
5 No reira oia i teitei aˈe i te tahi atu mau tumu raau atoa o te fenua.
Ua amaamaahia oia, e ua roahia to ˈna mau amaa
No te rahi o te pape i roto i ta ˈna mau tahora.
6 Pauroa te manu o te raˈi tei ofaa na roto i te mau amaa,
Pauroa te animara oviri o te fenua tei fanau i raro aˈe i to ˈna mau amaa,
E pauroa te nunaa rahi tei parahi i raro aˈe i to ˈna marumaru.
7 Rahi roa ˈtura oia i te nehenehe e te roa o to ˈna mau amaa,
Ua toro roa hoi to ˈna mau aˈa i raro i te mau vahi pape roa.
8 Aita ˈtu e tumu arezi i roto i te ô a te Atua+ e nehenehe e faaauhia ia ˈna.
Aita to te tumu berusi e amaa mai to ˈna.
E aita to te tumu oramuna e amaa mai to ˈna.
Aita ˈtu e tumu raau i roto i te ô a te Atua mea nehenehe mai ia ˈna.
9 Ua hamani au ia ˈna ma te nehenehe, ma te amaa e te rauere e rave rahi,
E pauroa te tahi atu tumu raau o Edene, te ô a te Atua mau, tei pohehae ia ˈna.’
10 “No reira, teie ta te Arii hau ê e Fatu ra o Iehova e parau ra: ‘No te mea ua rahi roa mai oia,* ua faateitei oia i to ˈna tupuai i roto i te ata, e ua teoteohia to ˈna aau no to ˈna teitei, 11 e tuu vau ia ˈna i te rima o te raatira puai o te mau nunaa.+ E faautua mau â oia ia ˈna, e e faarue au ia ˈna no to ˈna ino. 12 E e tâpû te feia ěê, te mea taehae roa ˈˈe o te mau nunaa, ia ˈna e e faarue ratou ia ˈna i nia i te mau mouˈa, e topa to ˈna mau rauere i te mau peho atoa, e e apǎpǎ noa to ˈna mau amaa tei ofatifatihia i roto i te mau tahora atoa o te fenua.+ Pauroa te nunaa o te fenua te haere mai raro aˈe mai i to ˈna marumaru e te faarue ia ˈna. 13 Pauroa te manu o te raˈi te ora i nia i to ˈna tumu tei tâpûhia, e pauroa te animara oviri o te fenua i nia i to ˈna mau amaa.+ 14 Ua na reirahia ia ore te tahi tumu raau i pihai iho i te mau pape ia teitei roa aore ra ia faateitei i to ˈna tupuai i roto i te mau ata e ia ore ia raea i te tahi tumu raau faararirari-maitai-hia i te pape te teitei o te ata. E tuuhia hoi ratou pauroa i te pohe, te fenua no raro, e te mau tamarii a te huitaata, o te pou ra i te apoo.’*
15 “Teie ta te Arii hau ê e Fatu ra o Iehova e parau ra: ‘I te mahana e pou ai oia i te Apoo,* e faatupu vau i te tahi oto. E tapoˈi au i te mau pape hohonu e e tapea vau i to ratou mau anavai rii ia mau te pape e rave rahi. E haapoiri au ia Lebanona no ˈna aˈe, e e mǎrô pauroa te tumu raau o te fenua. 16 I te haruru o to ˈna toparaa, e rûrû te mau nunaa ia ˈu ua haapou anaˈe au ia ˈna i te Apoo* e te feia atoa e pou ra i te apoo,* e e tamahanahanahia pauroa te tumu raau o Edene,+ te mea nehenehe roa ˈˈe e te mea maitai roa ˈˈe o Lebanona, pauroa tei faararirari-maitai-hia i te pape, i te fenua no raro. 17 Ua pou ratou i te Apoo* na muri ia ˈna, i te feia tei haapohehia i te ˈoˈe,+ ratou to ˈna mau tauturu* tei ora i raro aˈe i to ˈna marumaru i rotopu i te mau nunaa.’+
18 “‘Teihea tumu raau o Edene mai ia oe te hanahana e te rahi?+ Tera râ, e haapouhia mau â oe na muri i te mau tumu raau o Edene i te fenua no raro. E tarava oe i rotopu i te feia peritome-ore-hia, e te feia tei haapohehia i te ˈoˈe. Tera ta Pharao e to ˈna nahoa taata atoa e faaruru,’ te parau ra te Arii hau ê e Fatu ra o Iehova.”