Ezekiela

TO AIPHITI I TE PAU-ROA-RAA, E TO TEI TURU MAI IA ˈNA RA.

30 Tae maira hoi te parau a Iehova ia ˈu nei, na ô maira, 2 E te tamaiti a te taata na, a tohu, a na ô atu ai, Te na ô maira te Fatu ra o Iehova; A auê outou, auê i teie nei mahana e! 3 No te mea ua fatata taua mahana nei, ua fatata: te mahana o Iehova ra, e mahana ata ïa, e anotau ïa no te mau fenua. 4 E tae mai te ˈoˈe i nia ia Aiphiti, e mauiui rahi tei Kusa, ia hiˈa tei pohe i Aiphiti, e rave-ê-hia e ratou to ˈna taata ma te rahi atoa, e taihitumuhia hoi oia. 5 O Kusa, e o Phuta, e o Luda, e o te mau taata anoihia ra, e o Kuba, e te taata atoa no te mau fenua atoa i faaau maira, e hiˈa ïa e ratou atoa ra i te ˈoˈe.

6 Te na ô maira Iehova; Te feia e tauturu ia Aiphiti ra, e hiˈa ïa; e te puai teoteo no ˈna ra, e tuuhia ïa i raro: mai Migadola e Siene ratou i te hiˈaraa i te ˈoˈe i roto ia ˈna ra, te na reira maira te Fatu ra o Iehova. 7 E pau hoi ratou i roto i taua mau fenua i pau ra, e to ˈna mau oire, ei roto atoa i te mau oire i faaanohia ra. 8 E ite hoi ratou e, o Iehova vau, ia tuu vau i te auahi i roto ia Aiphiti, e ia pau to ˈna mau tauturu i te pohe. 9 Ia tae i te reira mahana e reva ˈi te mau vea na nia i te mau pahi, ia haamǎtaˈuhia Kusa mǎtaˈu ore ra, e roohia mai ratou e te mauiui rahi i to Aiphiti ra mahana; inaha hoi, te fatata maira.

10 Te na ô maira te Fatu ra o Iehova; E faaore au i te rahi o te taata i Aiphiti i te rima o te arii o Babulonia, o Nebukanesa. 11 O oia e to ˈna atoa ra mau taata, o tei riariahia e te mau fenua ra, o te arataihia mai ïa ei faaano i taua fenua ra: e unuhi ratou i to ratou ˈoˈe ia Aiphiti, e faaî hoi i te fenua i te taata pohe. 12 E tamǎrô hoi au i te mau pape, a hoo atu ai i te fenua i te rima o te rave ino ra; e faaano vau i taua fenua ra, e to roto atoa ra, i te rima o te feia ěê ra: o vau teie o Iehova e parau nei.

13 Te na ô maira te Fatu ra o Iehova; E haamou vau i te mau idolo, e faaore au i te mau tii i Nopha ra; e aita ˈtura e ariihia to Aiphiti; e faatupu vau i te mǎtaˈu i te fenua ra i Aiphiti. 14 E haapau vau ia Patarota, e tuu vau i te auahi i Zoana, e faautua ˈtu vau ia No. 15 E ninii atu vau i tau riri i nia ia Sini, te puai o Aiphiti ra; e tâpû ê atu vau i te rahi atoa i No ra. 16 E tuu vau i te auahi i roto ia Aiphiti: e mauiui rahi hoi to Sini, e parari hoi No, e apǐapǐ hoi Nopha i te ao. 17 Te mau taata apî i Auna, e to Pi-beseta, o te hiˈa ïa i te ˈoˈe: e te mau oire, e hopoihia ïa ei tîtî. 18 E haapourihia hoi te ao i Taphanesa ia ofati au i te zugo o Aiphiti i reira: e to ˈna ra puai teoteo ra, e faaorehia ïa ia ˈna ra: area oia, e tapoˈihia ïa e te ata, e reva ta ˈna mau tamahine ei tîtî. 19 E na reira vau i te tuuraa i te utua i nia ia Aiphiti: e ite hoi ratou e, o Iehova vau.

20 E tae aˈera i te matahiti hoê ahuru ma hoê ra, e te marama matamua ra, e te mahana hitu i taua marama ra, i tae mai ai te parau a Iehova ia ˈu nei, na ô maira, 21 E te tamaiti a te taata na, ua ofati au i te rima o te arii o Aiphiti ra o Pharao; e inaha, e ore ïa e vehîhia, e ia taatihia te raau ra; e ore hoi e taai-noa-hia e te hoê taai ra, ei faaetaeta e mau ai te ˈoˈe ra. 22 E teie nei, te na ô maira te Fatu ra o Iehova; Inaha, e ore au e faatia i te arii o Aiphiti ra o Pharao, e ofati au i o ˈna pue rima, i tei etaeta e tei haaparuparu-atoa-hia ra; e mairi hoi ia ˈu te ˈoˈe i tana rima. 23 E haapurara vau i to Aiphiti i te mau fenua, e haapuehu vau ia ratou i te mau mataeinaa ra. 24 E faaetaeta vau i te rima o te arii o Babulonia, e tuu vau i tau ˈoˈe i roto i tana rima: e ofati râ vau i te rima o Pharao, e autâ noa oia i mua ia ˈna i te autâ o te taata puta pohe ra. 25 E faaetaeta vau i te rima o te arii o Babulonia, e topa râ te rima o Pharao i raro; e ite ratou ia ˈu e, o Iehova vau, ia tuu au i tau ˈoˈe i te rima o te arii o Babulonia, e ia faatorohia i nia i te fenua ra ia Aiphiti. 26 E haapurara vau i to Aiphiti i roto i te mau fenua ra, e haapuehu vau ia ratou i te mau mataeinaa ra; e ite hoi ratou e, o Iehova vau.