Ezekiela

TO IERUSALEMA HURU I ITEA, I TE ARUARU ITI, E TO TE ATUA AROHA IA ˈNA.

16 E ua tae atoa maira te parau a Iehova ia ˈu nei, na ô maira, 2 E te tamaiti a te taata na, e faaite atu oe ia Ierusalema i ta ˈna ra mau parau faufau ra, 3 e na ô atu, Te na ô maira te Fatu ra o Iehova ia Ierusalema; To oe ra tumu e to oe ra fanauraa, no te fenua ra ïa no Kanaana; e ati Amori to metua tane, e ati Heta to metua vahine. 4 Area to oe ra fanauraa, i te mahana i fanau mai ai oe ra, aore i ootihia to oe pito e aore hoi oe i horoihia i te pape ia mâ oe; aore hoi i haamitihia, aore hoi i tuuhia i nia i te pahii. 5 Aore roa e mata i aroha mai ia oe, a na reira mai ai ia oe ra, e te hamani-maitai-raa mai ia oe ra; i faarue-noa-hia ra oe i rapae i te vahi atea ra, ia vahavahahia oe, i te mahana i fanau mai ai oe ra. 6 E ia ˈu hoi i haere na pihai iho ia oe ra, e ite atura ia oe i te viiviiraa i roto i to oe iho toto, ua parau atura vau ia oe i roto i to oe iho toto ra, Ia ora; oia â ïa, o vau tei parau atu ia oe i roto i to oe iho toto, Ia ora. 7 E ua tupu oe ia ˈu mai to nia i te fenua e tupu nei, e ua tupu ihora oe, e ua rahi, e riro atura oe i te maitai rahi; ua huru û hoi te û, e ua tupu to rouru, e ahu ore hoi to oe e te vaiiho tahaa noa. 8 O vau ra tei haere na pihai iho ia oe, e ua ite au ia oe, e inaha, to oe na anotau te anotau o te hinaaro; e ua hohora hoi au i tau hiti ahu i nia ia oe, e ua tapoˈi atura ia oe: e ua tǎpǔ atura vau ia oe ra, e ua faaau ihora vau i te tahi faufaa ia oe ra, te parau maira te Fatu ra o Iehova, riro maira hoi oe no ˈu. 9 Ua horoi ihora vau ia oe i te pape; e mâ roa aˈera to toto ra ia ˈu, e ua faatavai atura ia oe i te monoˈi; 10 e ua faaahu ia oe i te ahu nehenehe, e ua faatamaa ia oe i te iri tekesa, e ua vehî hoi ia oe i te vavai hua, e ua tapoˈi ia oe i te tirita, 11 e ua faanehenehe ia oe i te taoˈa unauna, e ua tuu i te tapea i nia i to rima, e te fifi i nia i to aˈî. 12 E ua oomo aˈera i te poe i roto i to ihu, e na tapea i roto i to tariˈa, e te tahi korona nehenehe i nia i to upoo. 13 Unauna aˈera oe i te auro e te ario; e ahu hua hoi to ahu, e te tirita, e te ahu nehenehe; e te faraoa hua, e te meli, e te hinu olive, o ta oe ïa maa: e nehenehe rahi hoi to oe, e riro atura oe ei arii. 14 Reva ˈtura to oe roo i te mau fenua i te nehenehe: e nehenehe faahope hoi no te maitai ta ˈu i tuu i nia ia oe ra, te parau maira te Fatu ra o Iehova.

15 Ua tiaturi râ oe i to oe nehenehe, e ua taiata oe no to oe roo, e ua horoa noa ˈtu oe ia oe iho i te taiata i te feia atoa i haere na reira, no ratou atura ïa. 16 Ua rave hoi oe i to oe ahu e ua faaahu i te mau vahi teitei i te ahu e rave rahi te huru, e ua taiata oe i nia iho, e ore hoi e na reirahia, e ore hoi ïa e tupu. 17 Ua rave hoi oe i ta oe ra taoˈa maitai, i tau auro e tau ario, ta ˈu i horoa ˈtu no oe, e ua hamani oe i te hohoˈa taata no oe iho, e ua haapeu taiata ia ratou; 18 e ua rave oe i to oe ahu faanehenehehia, e ua tapoˈi ia ratou; e ua tuu atu oe i tau monoˈi e tau mea noˈanoˈa i mua ia ratou. 19 E tau maa hoi ta ˈu i ho atu ia oe ra, i te faraoa, e te hinu olive, e te meli, ta ˈu i faaamu atu ia oe ra, ua tuu atoa oe i te reira i mua ia ratou ei faanoˈanoˈa, e ua tupu hoi te reira, te parau maira te Fatu ra o Iehova. 20 E ua rave oe i to mau tamaroa e to mau tamahine, i ta oe i fanau ia ˈu nei, e ua faatusia oe ia ratou ia pau roa. E iti anei taua mau taiata na oe nei, 21 i taparahi ai oe i tau mau tamarii ra; e ua tuu oe ia ratou ia haere na roto i te auahi ia ratou ra? 22 Aita hoi oe i manaˈo i te raveraa i ta oe mau peu faufau ra, e to mau taiataraa ra, i te anotau i to apîraa ra, ia oe i vai tahaa noa ra e aore e ahu, e te vai viivii noa ra i roto i to oe iho toto. 23 E i muri aˈe i ta oe ra mau parau ino, (e pohe, e pohe to oe! te na reira maira te Fatu ra o Iehova;) 24 ua patu iho nei hoi oe i te hoê vahi teitei, e ua rave oe i te vahi teitei i roto i te mau aroâ atoa ra. 25 Ua patu oe i ta oe ra vahi teitei i te hopea o te mau eˈa ra, e na oe i haatupu i te faafaufau i taua nehenehe no oe ra, e ua tuu noa mai oe i te mau taata haere atoa ra ia rave noa mai ia oe ra, e ua faarahi oe i to taiata. 26 Ua taiata hoi oe i to Aiphiti, i to mau taata-tupu taata rahi ra; e ua faarahi i to taiata ra, ei faaooo mai ia ˈu ra. 27 E teie nei, inaha, ua faatoro atu vau i tau rima i nia ia oe na, e ua faaiti i ta oe ra tufaa i haapaohia ra, e ua tuu atu vau ia oe i te hinaaro o te feia aore i au mai ia oe ra, i te mau tamahine a te Philiseti, o tei haama i ta oe ra parau ino. 28 Ua taiata atoa hoi oe i to Asura ra, e aore oe i fiu: oia â ïa, ua taiata oe ia ratou, e aita oe i fiu. 29 Ua faarahi hoi oe i to taiataraa i te fenua ra i Kanaana, e ua tae roa i to te Kaladaio; e aore â hoi oe i fiu. 30 Te itoito ore o to aau e, te parau maira te Fatu ra o Iehova, oe i rave i taua mau mea nei, i te ohipa a te vahine taiata, e te faahepo: 31 o oe hoi i patu i to vahi teitei i te hopea mai o te mau eˈa atoa ra, e ua rave i to vahi teitei i roto i te mau aroâ atoa ra; e ere hoi oe mai te vahine faaturi ra, oe i vahavaha i te tarahu; 32 mai te vahine mau e faaturi noa ra, o tei rave i te taata ěê ra, aore te tane mau ra! 33 E tarahu ta te taata nei e hopoi na te faaturi; o oe râ tei horoa i ta oe taoˈa i te feia i hinaaro mai ia oe, ei tarahuraa ˈtu ia ratou, ia haere mai ratou ia oe e ati noa ˈˈe i ta oe taiataraa. 34 Aore hoi oe i au i ta oe taiataraa i te mau vahine atoa, aore roa hoi te hoê i au ia oe i te taiataraa; o oe i horoa i te tarahu, e aore hoi oe i tarahuhia mai; i ore ai oe i au ai.

35 E teie nei, e tera ra faaturi, e faaroo mai i te parau a Iehova: 36 Te na ô maira te Fatu ra o Iehova; No te mea ua horoa oe ia oe iho no te parau faufau, e ua itea to oe vai-tahaa-noa-raa i ta oe ra taiataraa i te feia hinaaro mai ia oe ra, e i te mau idolo faufau atoa no oe ra, e i te toto o to mau tamarii ta oe i horoa no ratou: 37 e teie nei, inaha, e haaputuputu vau i te feia atoa i hinaaro ia oe ra, tei mauruuru ia oe ra, e te feia atoa ta oe i hinaaro ra, e te feia atoa aore i auhia e oe ra; e haaputuputu mai au ia ratou ia oe ra e ati noa ˈˈe, e heheu vau ia oe ia ratou, e ia ite ratou ia oe i te vai-tahaa-noa-raa. 38 E faautua ˈtu vau ia oe i te utua a te vahine faaturi, e tei haamanii i te toto ra; e horoa ˈtu vau ia oe i te toto tahoo e te hae. 39 E tuu atu hoi au ia oe i to ratou rima, e na ratou e haaparari i to oe ra vahi teitei, e huri hoi i to mau vahi teitei i raro ra: e na ratou e taratara i to mau ahu ra, a rave ai i to mau taoˈa maitatai ra, a faarue noa ˈtu ai ia oe ma te vai-tahaa-noa aore e tapoˈi. 40 E na ratou e aratai mai i te tahi pǔpǔ taata ei rave ia oe, e na ratou e pehi ia oe i te ofai, e vahi noa hoi ia oe na ropu i to ratou mau ˈoˈe. 41 E na ratou e tutui i to mau fare i te auahi, a tahoo atu ai ia oe i mua atoa i te aro o te mau vahine atoa e rave rahi; e na ˈu e faaore i ta oe taiataraa, e ore hoi oe e hopoi faahou i te tarahu. 42 A faaoti ai au i te tahoo na ˈu ia oe ra, a faarue atu ai i te hae no ˈu ia oe ra, a parahi noa ˈi au, e ore au e riri faahou. 43 No te mea aore oe i haamanaˈo i to apîraa ra, ua faariri maira oe ia ˈu i taua mau mea atoa nei: inaha, i teie nei, e tahoo atu vau i ta oe parau i nia i to upoo na, te parau maira i nia i to upoo na, te parau maira te Fatu ra o Iehova, ia ore oe ia rave faahou i teie nei mau parau ino i ta oe ra mau parau faufau atoa ra.

44 Inaha, te feia atoa e parau i te parabole, e parau atoa ratou i teie nei parabole ia oe, i te na ôraa e, Mai te metua vahine ra, oia atoa te tamahine. 45 O oe te tamahine a to metua vahine o tei taiva te aau i tana tane e ta ˈna mau tamarii; e o te teina hoi oe o to mau tuaana, tei taiva te aau i ta ratou mau tane e te mau tamarii: e ati Heta to outou metua vahine, e ati Amori to outou metua tane. 46 E o to tuaana ra, o Samaria ïa, oia e ta ˈna mau tamahine i parahi i to rima aui ra: e to teina ra, o tei parahi i to rima atau ra, o Sodoma ïa e ta ˈna mau tamahine. 47 Aita râ oe i haapao i to ratou mau haerea, e aore i rave i ta ratou mau parau faufau ra: i manaˈohia te reira e mea iti haihai, ua rahi roa râ to oe ino i to ratou i to mau haerea atoa ra.

48 Te parau maira te Fatu ra o Iehova, Te ora nei au, aore to teina ra o Sodoma i rave, oia e ta ˈna mau tamahine, mai ta oe i rave ra, e ta oe ra mau tamahine. 49 Inaha, teie te ino o to teina ra o Sodoma, o te teoteo, o te maa rahi, e te parahi maitai noa ma te hau, to ˈna, e to ˈna ra mau tamahine; aita râ oia i tauturu mai i te taata haehaa e te veve. 50 Teoteo aˈera ratou e ua rave i te mea faufau i mua ia ˈu nei; no reira vau i hopoi ê atu ai ia ratou mai ta oe hoi i ite ra.

51 Aore hoi ta Samaria mau hara i rave, e faito i te afa o ta oe ra: ua faarahi râ oe i ta oe ra mau parau faufau, e iti ta ratou, e ua faatia oe i ta to pue taeae ra i te mau mea faufau atoa ta oe i rave ra. 52 Ei nia hoi ia oe iho to oe haama, o tei faatia i to pue taeae i ta oe ra mau hara i rave ma te faufau rahi e iti to ratou ra: huru tiahia aˈe ratou ia oe ra: e teie nei, ia haama ˈtu oe e ia vai â to oe haama i nia ia oe ra, oe i faatia i ta oe ra pue tuaana.

53 E faahoˈi maira vau i to ratou tîtîraa, i te tîtîraa o Sodoma e ta ˈna mau tamahine, e te tîtîraa o Samaria e ta ˈna ra mau tamahine, e faahoˈi mai hoi au i to oe ra tîtîraa i rotopu ia ratou ra: 54 ia vai â to oe haama i nia ia oe, e ia maheahea i te mau mea atoa ta oe i rave ra, oe i haamahanahana ia ratou. 55 E to mau taeae, o Sodoma e ta ˈna mau tamahine, e hoˈi mai ïa i to ratou ra huru mau, e o Samaria atoa e ta ˈna ra mau tamahine, e hoˈi ïa i to ratou ra huru mau; e o oe hoi e to mau tamahine, e hoˈi ïa i to outou ra huru mau. 56 Aore hoi to teina o Sodoma i faahitihia e to vaha i te mahana i teoteo ai oe ra; 57 aitâ i itea to oe ra ino, i te tau i faainohia ˈi oe e te mau tamahine o Arama ra, e te feia atoa i haaati mai ia ˈna ra, te mau tamahine a te Philiseti, o tei vahavaha mai ia oe e ati noa ˈˈe. 58 Area ta oe ra mau parau ino e to oe ra mau mea faufau, ua faaoromai oe i te reira, te parau maira Iehova. 59 Te na ô maira hoi te Fatu ra o Iehova; E na reira atoa vau ia oe mai ta oe i rave ra, o tei vahavaha i te tǎpǔ i te faarueraa i te faufaa. 60 E haamanaˈo râ vau i tau faufaa ia oe i to oe ra apîraa, e na ˈu e haamau i te tahi faufaa mure ore ia oe ra. 61 Ei reira oe e manaˈo ai i ta oe ra mau parau, e maheahea oe, ia farii atu oe i to pue taeae, to tuaana e to teina; e na ˈu e horoa ˈtu ia raua ei tamahine na oe, eiaha râ i te faufaa i fafauhia ˈtu ia oe na i tena na. 62 E haamau hoi au i ta ˈu nei faufaa ia oe na; e ite hoi oe e, o Iehova vau: 63 ia manaˈo hoi oe e ia maheahea, e eiaha to vaha ia parau faahou i te haama no oe ra, ia ore tau riri ia oe i te mau mea atoa ta oe i rave ra, te parau maira te Fatu ra o Iehova.