Ezekiela

TO IERUSALEMA FAARUERAAHIA I ITEA I TE AU ORE O TE AMAA VINE I TE OHIPA.

15 Ua tae maira hoi te parau a Iehova ia ˈu nei, na ô maira, 2 E te tamaiti a te taata na, Eaha te maitai o te raau nei o te vine i te mau raau atoa nei, i te mau amaa te raau i te uru raau ra? 3 E roaa anei te raau i te reira ei raau e oti ai te ohipa? e rave anei te taata i te reira ei tǐtǐ ei faautaraa taoˈa rii? 4 Inaha, e titirihia hoi i nia i te auahi ei vahie; e pau aˈera te tahi hiti e te tahi hiti i te auahi, e ama ˈtura hoi te maa ropu. Eaha te ohipa e oti ai i te reira? 5 Inaha hoi i te vai-taatoa-raa ra, aita e ohipa e oti i te reira: a tae atu ai hoi ia pau i te auahi ra, e ama ˈtura, e riro anei i te ravehia ei ohipa?

6 E teie nei, te na ô maira te Fatu ra o Iehova; Mai te raau ra e vine i roto i te mau raau atoa i te vahi uru raau ra, i horoahia e au no te auahi ei vahie ra, na reira atoa vau i te horoa i to Ierusalema. 7 E fariu hoi au i tau mata i nia ia ratou; e faarue ratou i te tahi auahi, e pau ihora ratou i te tahi auahi; e ite hoi outou e, o Iehova vau, ia fariu vau i tau mata i nia ia ratou e rave. 8 E faaano vau i teie nei fenua, no te mea ua rahi roa ta ratou hara, te parau maira te Fatu ra o Iehova.