Ezekiela
TE PARABOLE O NA AETO E PITI E TE VINE I FAAITEHIA NEI.
17 Tae maira hoi te parau a Iehova ia ˈu nei, na ô maira, 2 E te tamaiti a te taata na, a tuu na i te tahi piri, a parau na i te hoê parabole i te utuafare ra ia Iseraela; 3 a na ô atu ai, Te na ô maira te Fatu ra o Iehova; Te hoê aeto rahi e te pererau rahi, e te maoro, e te huruhuru i te roroa, e rave rahi hoi te huru, tei haere mai i Lebanona, e ua rave hoi i te amaa teitei o te arezi: 4 ua tope hoi oia i te auru o te papua rii apî ra, e ua hopoi atura i te fenua hoo ra; tuu ihora i roto i te oire o te feia hoo ra. 5 Ua rave ihora hoi i te tahi ohi no taua fenua ra, e ua tanu ihora i roto i te aua tutupu ra; ua tuu i pihai iho i te pape rahi ra, e ua tanu ihora i pihai iho i te arobe. 6 Tupu atura, riro aˈera ei vine pahaehaa toro noa i te atea ê ra, o tei toro mai te amaa i te reira, e te aa tei raro aˈe: riro atura ïa ei vine, e ua tupu te amaa, e tupu aˈera te ohi rii. 7 E te vai atura te hoê aeto rahi, ma te pererau rahi e te huruhuru rahi: e inaha, ua fariu atura te aa o taua vine ra i te reira, e toro atura to ˈna amaa i te reira, ia faararirari ïa i te reira i te mau vahi poopoo o te tanuraa ra. 8 I tanuhia i te vahi repo maitai ra i te pae o te pape rahi ra, ia toro hoi te amaa, e ia hotu hoi te maa ra, ia riro hoi ei vine maitai ra.
9 E parau atu oe, Te na ô maira te Fatu ra o Iehova; E tupu anei? e ore anei e taihitumuhia e te hoê, a ooti ê atu ai i te maa e oriorio atura? o te mau rau rii tupu apî ra te oriorio, e ore râ e ravehia e te rima puai, e ore hoi e faarahihia te taata ia taihitumu ra. 10 E inaha, tanu noâ, e tupu anei? e ore anei e oriorio roa, ia faatuia-noa-hia ˈi e te mataˈi i te pae i te hitia o te râ ra? i te mau vahi poopoo i reira te tupuraa e oriorio ai.
11 Ua tae maira hoi te parau a Iehova ia ˈu nei, na ô maira, 12 A parau atu i tena na utuafare tâhito ra, Aitâ outou i ite i teie nei mau parau? e parau atu ia ratou, Inaha, i ǒ nei te arii o Babulonia i Ierusalema nei, e ua riro to ˈna arii, e te pǔpǔ arii atoa, e ua aratai atoa oia ia ratou i Babulonia: 13 e ua rave aˈera i te huaai o te arii ra, e ua faaau i te faufaa ia ˈna ra, e ua fariu atu i te tǎpǔ na ˈna ra: ua rave atoa hoi oia i te feia mana o te fenua nei: 14 ia auraro haehaa taua basileia nei, ia ore ia faateitei, ia mau maite râ i te haapaoraa i te faufaa na ˈna ra. 15 Ua orure râ oia i te hau ia ˈna, i te tonoraa i tana vea i Aiphiti, ia horoa mai ratou i te puaahorofenua e te taata atoa e rave rahi no ˈna. E tupu anei ta ˈna? e ora anei oia o tei na reira ra? e faarue anei hoi oia i taua faufaa ra, e ia ora ˈtu? 16 Te na ô maira te Fatu ra o Iehova, Te ora nei au ra, ei te vahi mau i parahihia e te arii o tei faariro ia ˈna ei arii ra, na ˈna te tǎpǔ i vahavahahia e ana ra, e na ˈna te faufaa i faaruehia e ana ra, ei ropu ia Babulonia oia e pohe ai. 17 E ore hoi oia e manuïa i te tamaˈi ia Pharao e tana nuu puai e te taata rahi, ia ohuhia te ohu, e ia patuhia te pare, ia pau te taata e rave rahi ra: 18 no te mea ua vahavaha oia i te tǎpǔ i te faarueraa i te faufaa, e inaha, ua horoa oia i tana rima, e ua rave hoi oia i taua mau mea nei, e ore hoi oia e ora. 19 E teie nei, te na ô maira te Fatu ra o Iehova; Te ora nei au, taua tǎpǔ na ˈu ta ˈna i vahavaha ra, e tau faufaa ta ˈna i faarue ra, e tahoo atu ïa vau i nia i to ˈna ihora upoo. 20 E titiri au i tau upeˈa i nia ia ˈna, e fifi oia i roto i tau marei, e na ˈu oia e aratai i Babulonia, e ei reira vau e parau atu ai ia ˈna i ta ˈna hara i rave ia ˈu nei. 21 E te feia amaha atoa no ˈna ra, e te mau pǔpǔ atoa no ˈna ra, e hiˈa anaˈe ïa i te ˈoˈe; e te feia i toe ra, e haapurarahia ïa i na mataˈi atoa e maha ra: e ite hoi outou e, o vau teie o Iehova e parau nei.
22 Te na ô maira te Fatu ra o Iehova; E rave atoa vau i tei nia i te amaa teitei i te arezi teitei ra, a tanu ai; e tope hoi au i te auru o te raau rii apî i te hoê mea iti apî ra, e na ˈu e tanu i nia i te mouˈa teitei e te teniteni ra: 23 i nia i te hoê mouˈa teitei i Iseraela nei au e tanu ai: e tupu te amaa, e hotu hoi te maa i nia iho, e riro hoi ei arezi maitai: e parahi hoi te mau manu pererau te mau huru atoa i raro aˈe; ei roto i te maru o te mau amaa parahi ai. 24 E ite atoa te mau raau atoa o te aru ra, e na ˈu, na Iehova, i tuu haehaa i te raau teitei, e ua faatia i te raau haehaa, e ua haamǎrô i te raau ota, e ua faaruperupe i te raau mǎrô. O vau teie o Iehova e parau nei, e na ˈu e rave.