Salamo
E PURE E TE HAAMAITAIRAA A DAVIDA.
71 Te tiaturi nei au ia oe, e Iehova; eiaha roa vau ia roohia e te haama. 2 E faaora oe ia ˈu i te parau-tia na oe ia ora; e fariu mai oe i to tariˈa, ia ora vau. 3 E pare ati oe no ˈu, ia horo tamau â vau i reira. Ua faaue oe ia faaorahia vau; o tau pare e tau haapuraa hoi oe. 4 E faaora oe ia ˈu, e tau Atua, i te rima o te paieti ore; i te rima o te taata parau-tia ore e te hamani ino: 5 o oe hoi to ˈu manaˈoraa, e tau Fatu; tau tiaturiraa, e Iehova, mai tau apîraa mai â. 6 I mauhia na vau e oe mai te opu mai â; e o oe tei rave mai ia ˈu mai roto mai i te opu o tau metua vahine ra; e tamau â vau i te haamaitai ia oe. 7 Ua riro vau ei maereraa na te taata atoa: o tau haapuraa etaeta râ oe. 8 Ia î hoi tau vaha i te haamaitai ia oe, e te faahanahana ia oe eiaha ia faaea. 9 Eiaha e taiva ia ˈu i te ruhiruhiaraa ra; e ia paruparu vau ra, eiaha e faarue ia ˈu. 10 Te parau nei hoi tau mau enemi ia ˈu; e te feruri nei te feia i titau mai ia ˈu ia pohe. 11 Te parau ra ratou, Ua faaruehia oia e te Atua: a auau, a rave, aore hoi e tia.
12 E te Atua e, eiaha oe e faaatea ê atu ia ˈu; e tau Atua, ia peepee i te tauturu mai ia ˈu. 13 Te mau enemi e titau mai i to ˈu nei pohe, ia haama ˈtu ïa; ia maheahea, e ia vehîhia i te haama e te ino, tei imi i to ˈu nei pohe.
14 E tiaturi â vau ia oe e ore e faaea, e haamaitai â vau ia oe na nia iho e na nia iho. 15 na tau vaha e faaite i te parau-tia na oe, e te ora na oe, eiaha ia faaea: eita râ e tia ia ˈu ia taio i te rahi. 16 E tamau â vau i te haere i te etaeta na te Fatu ra, na Iehova: e faaite au i ta oe parau-tia, ta oe anaˈe ra. 17 Na oe, e tau Atua, i haapii mai ia ˈu mai to ˈu apîraa mai â; e ua faaite au i ta oe ra mau ohipa umerehia e tae roa aˈenei i teie nei; 18 ia ruhiruhia vau e ia hinahinahia tau upoo, e te Atua e, eiaha oe e faarue mai ia ˈu, ia faaite râ vau i to mana i teie nei ui; e to puai, i te taata atoa ia haere mai. 19 Ua teitei te parau-tia na oe, e te Atua; e te Atua, o tei rave i teie nei mau ohipa rahi, o vai te au ia oe? 20 I faaite noa mai â oe ia ˈu i te ati e rave rahi e te ahoaho, e faaanaanaea mai â hoi oe ia ˈu, e ua faatia faahou mai â oe mai raro roa i te fenua ra. 21 E riro oe i te faarahi mai â i taua rahi no ˈu nei, e e haamahanahana mai â oe ia ˈu e ati noa ˈˈe. 22 E haamaitai â vau i te parau mau na oe ma te nabala; e himene au ia oe, e tau Atua, ma te kinura, e Tei Moˈa i Iseraela nei. 23 E oaoa tau vaha ia himene au ia oe ra, e tau varua i faaorahia e oe ra. 24 E parau tau vaha i te parau-tia na oe e rui noa ˈtu: e riro hoi i te haama, e riro i te maheahea, te feia i imi i to ˈu nei pohe.