Salamo

TE PURE RA DAVIDA IA SOLOMONA.

Salamo na Solomona.

72 A ho mai na, e te Atua, i te mau parau au na oe ra na te arii, e te parau-tia na oe ra na te tamaiti a te arii. 2 E haava oia i to mau taata ma te parau-tia, e to oe ra mau taata haehaa ma te parau au: 3 e hopoi mai te mau mouˈa i te hau i te mau taata, e te mau aivi hoi ma te parau-tia. 4 Na ˈna e faaau i te parau i te haehaa i ǒ te mau taata ra; e te tamarii a tei ati i te veve ra na ˈna e faaora; e e haavî ofatifati roa oia i tei hamani ino ra. 5 E mǎtaˈu ratou ia oe mai te mahana e te marama e vai nei i te mau ui atoa ra. 6 E riro oia mai te ûa i nia i te aihere motu apî ra; e mai te tuâ ûa e faararirari i te fenua nei. 7 I to ˈna ra tau e tupu roa ˈi te parau-tia; e rahi roa hoi te hau, oi vai aˈe te marama. 8 E riro oia ei arii mai te tahi miti e tae noa ˈtu i te tahi miti, e mai te pape ra e tae noa ˈtu i te hopea o te fenua. 9 To te medebara ra, e piˈo ïa i raro ia ˈna, e mitimiti to ˈna mau enemi i te vari. 10 E aufau mai te mau arii no Taresisa e to te mau fenua rii i te taoˈa; te mau arii o Seheba e to Seba te hopoi mai i te ô; 11 e hope roa te mau arii i te tahopu i mua ia ˈna. E hope roa te mau fenua i te auraro ia ˈna. 12 O tei veve ra e ua tiaoro maira, na ˈna ïa e faaora; e tei ati ra e aita o ˈna e tauturu. 13 E faaherehere oia i tei paruparu ra e tei veve, e faaora hoi oia i te feia taoˈa ore ra. 14 E faaora oia ia ratou i te haavare e te rave ino ra, e to ratou toto e riro ei mea taoˈa na ˈna. 15 E tia oia i te oraraa, e horoahia mai te auro o Seheba ra na ˈna; e pure tamau hoi te taata ia ˈna, e haamaitai hoi ratou ia ˈna, eita e mahana e tuua.

16 E riro hoi e maa sitona tei te fenua i nia i te tupuai o te mau mouˈa ra, e tei tupu ra, e ahehe ïa mai te mau raau e tupu i Lebanona ra; e ruperupe to te oire ra mai te raau o te fenua nei.

17 E vai â to ˈna iˈoa e a muri noa ˈtu! e vai â to ˈna iˈoa mai te mahana ra! e maitai te taata atoa ia ˈna, e e hope te mau fetii atoa o te fenua nei i te haamaitai ia ˈna.

18 Ia haamaitaihia te Atua, te Atua o Iseraela, o Iehova, oia anaˈe ra tei rave i te mau mea taa ê ra; 19 ia haamaitaihia hoi to ˈna iˈoa hanahana e a muri noa ˈtu: ia faaîhia hoi te mau fenua atoa i to ˈna hanahana; Amene, e Amene. 20 Te mau pure a te tamaiti a Iese ra a Davida, ua hope ïa.