Paraleipomeno 1
O DAVIDA I TE FAAARIIRAAHIA I HEBERONA RA.
11 Ua haaputuputu maira to Iseraela ia Davida ra i Heberona, na ô maira, Inaha, o to oe ra ivi o matou ïa e to oe ra iˈo. 2 Ia mutaaihora hoi a arii ai Saula ra, o oe tei aratai ia Iseraela i rapae e na oe hoi i faahoˈi mai: e ua parau mai hoi te Atua ra o Iehova ia oe, Na oe e tiai i to ˈu mau taata ia Iseraela; mai te tiai mamoe ra, e ei tavana hoi oe i to ˈu ra mau taata ia Iseraela. 3 Ua haere anaˈe maira te feia paari atoa o Iseraela i te arii ra i Heberona; ua faaau ihora Davida i te faufaa ia ratou i Heberona i mua i te aro o Iehova, ua faatavai ihora ratou ia Davida, ei arii no Iseraela, i te parau hoi a Iehova ia Samuela ra.
4 Ua haere ihora Davida e Iseraela atoa i Ierusalema, tei parau-atoa-hia o Iebusi; tei reira te ati Iebusi, te feia fenua i te parahiraa. 5 Ua parau maira to Iebusi ia Davida, Eita oe e ô mai i ǒ nei. Pau ihora râ te pare o Ziona, oia hoi te oire ra o Davida. 6 Ua na ô aˈera Davida, O tei pau ia ˈna te ati e ei raatira. E o Ioaba a Zeruia tei reva na i nia, e ua faarirohia ei raatira rahi. 7 Ua parahi ihora Davida i roto i taua pare ra; mairihia ihora ia ratou i te oire o Davida. 8 Ua patu faahou aˈera oire i taua oire ra e ati noa ˈˈe, mai ia Milo mai â; o te toea ra o taua oire ra ua tiahia ïa e Ioaba. 9 Te tupu ra hoi to Davida mana, e rahi noa ˈtura: no te mea, o Iehova sabaota tei pihaiiho ia ˈna.
10 Teie hoi na taata aito i ǒ Davida ra, o tei tauturu mai ia ˈna, ratou e to Iseraela atoa hoi ia noaa te basileia ia ˈna, i te faaariiraa ˈtu ia ˈna i ta Iehova hoi i parau mai ia Iseraela ra. 11 Teie hoi te taioraa i taua feia aito i ǒ Davida ra. O Iasobeama ati Hakemoni, o tei hau ïa i na raatira ra: ua aa ihora i ta ˈna maehaa, puta ˈtura na taata e toru hanere i te pauraa hoê. 12 E muri aˈe ia ˈna, o te hoê i taua na taata aito tootoru ra, o Eleazara a Dodo, e ati Ahohi. 13 I pihaiiho oia ia Davida i Pasa-damima, a putuputu ai te Philiseti i te tamaˈi ra, tei reira te hoê aua i î i te kerite, horo anaˈe atura te taata i te aro o te Philiseti. 14 Parahi ihora ratou i taua vahi ra, e ua faaora ˈtura, pau ihora te Philiseti, ora roa ˈtura ratou ia Iehova, e pau rahi atura ta Iehova i rave.
15 Haere atura na taata rahi tootoru, no taua pǔpǔ e toru ahuru ra, e tae atura i raro ia Davida ra i taua mato ra, i te ana a Adulama; te patiahia ra te nuu Philiseti i te peho ra o Rephaima. 16 Te parahi ra Davida i taua ana ra, e tei Bete-lehema te Philiseti i te tiairaa; 17 ua hiaai aˈera Davida i te pape, e ua na ô aˈera, Na vai râ e horoa mai i te hoê maa pape i te apoo pape i Bete-lehema, i te pae uputa ra? 18 Ua tii noa ˈtura taua na taata aito tootoru ra na roto noa ˈtura i te nuu Philiseti ra, ua huti ihora i te pape i taua apoo pape i Bete-lehema i te pae uputa ra, ua rave maira ua hopoi maira ia Davida ra; aita aˈera râ Davida i inu, ua rave aˈera râ, ua ninii ihora ei tusia inu na Iehova. 19 Ua na ô aˈera oia, Eiaha roa vau, e tau Atua, ia na reira, e inu anei hoi au i te toto o teie nei mau taata, o tei faaû noa i to ratou pohe? Ua faaaau noa hoi ratou i to ratou pohe i te hopoiraa mai. Aita aˈera oia i inu. Ua na reira hoi taua na taata aito tootoru ra.
20 O Abisai, e taeae no Ioaba, o tei hau ïa i na taata tootoru ra. Ua maraa aˈera ta ˈna maehae, pohe atura na taata e toru hanere, noaa ihora ia ˈna te iˈoa o na taata tootoru i muri iho nei. 21 O te taata ïa i hau i taua na taata tootoru ra; riro atura oia ei taata hau; aita râ i taea ia ˈna taua na taata tootoru i mutaaihora. 22 E i muri aˈe ia ˈna, o Benaia a Iehoiada; e tamaiti na te hoê taata taoˈa i Kabezeela, ua hau atoa ta ˈna ravea; e toopiti atoa a ˈna pue taata i taparahi i Moabi, mai te liona raua te huru: e ua pou oia i raro e ua taparahi â i te hoê liona i roto i te apoo i te anotau hiona. 23 Ua taparahi hoi oia i te hoê taata Aiphiti, e taata roa, e pae kubiti te roa; e maehae â hoi tei te rima a to Aiphiti mai te raau a te raraa ahu ra; ua haere atura oia ia ˈna ma te turutootoo, ua haru ihora i taua maehae ra i te rima o to Aiphiti ra, ua taparahi atura ia ˈna i te maehae na ˈna iho. 24 I na reira taua taata ra o Benaia a Iehoiada; i noaa ˈi to ˈna iˈoa i na taata aito tootoru i muri iho nei. 25 Inaha, ua hau â oia i na taata e toru ahuru ra, aita râ i taea ia ˈna na taata tootoru i mutaaihora. Tuuhia aˈera oia e Davida no nia iho i to ˈna ra pǔpǔ faehau.
26 O Asahela te hoê i taua feia aito no te nuu ra, e taeae no Ioaba, o Elehana a Dodo i Bete-lehema ra; 27 o Sama i Harori; e o Eleza i Peloni; 28 o Ira a Ikesa i Tekoa ra; o Abiezera i Anatota; 29 Sibekai ati Husa; o Ilai ati Ahohi, 30 e o Maharai ati Netopha; o Heleda a Baana e ati Netopha; 31 Itai a Ribai, no ǒ i Gibea ra no te mau tamarii a Beniamina; o Benaia i Piratoni; 32 o Hurai i Nahala-gaasa; o Abiela i Araba; 33 e o Azamaveta i Baharumi; o Eliaba i Salaboni; 34 te mau tamarii na Hasema i Gezoni; o Ionatana a Sago i Harari; 35 o Ahiama a Sakara i Harari ra; o Elephala a Ura i Maka; 36 o Hephera i Mekera, o Ahia i Peloni, 37 o Hezero i Karemela; e o Narai a Ezebai i Araba ra; 38 o Ioela te taeae o Natana i Zoba; o Mibahara a Hageri; 39 o Zeleka e ati Amona; o Naharai i Beroti, e hopoi mauhaa tamaˈi na Ioaba a Zeruia ra, 40 o Ira i Ituri; e o Gareba i Ituri; 41 o Uria ati Heta te hoê i taua feia aito i ǒ Davida ra; e o Zabada a Ahalai; 42 o Adina a Siza, e ati Reubena, te hoê ïa raatira o te ati Reubena, e na taata atoa hoi e toru ahuru, 43 e o Hanana a Maaka; e o Iosaphata i Mitini; 44 e o Uzia i Asetera; o Sama, e o Iehiela, na tamarii a Hotana i Aroera; 45 o Iediaela a Simeri; e tana taeae o Ioha i Tizi; 46 e o Eliela i Mahavi; e o Ierebai, e o Iosavia, na tamarii a Elenaama, e o Itema ati Moabi; 47 e o Eliela, e o Obeda, e o Iasiela i Mesoba.