Paraleipomeno buka matamua

11 I muri aˈe, haaputuputu aˈera te ati Iseraela taatoa ia Davida ra i Heberona+ e na ô maira: “E fetii matou no oe.*+ 2 I te tau o Saula te arii, na oe i aratai ia Iseraela i te tamaˈi.+ E ua parau Iehova to Atua ia oe: ‘E aupuru oe i to ˈu nunaa ia Iseraela, e e riro oe ei aratai no to ˈu nunaa o Iseraela.’”+ 3 Haere maira ïa te mau matahiapo atoa o Iseraela i te arii Davida ra i Heberona. Faaau ihora Davida i te hoê faufaa ia ratou i mua ia Iehova, e faatavai ihora ratou ia Davida ei arii i nia ia Iseraela,+ ia au i te parau a Iehova na roto ia Samuela.+

4 I muri aˈe, haere atura Davida e Iseraela taatoa i Ierusalema, oia hoi i Iebusi,+ te tuhaa fenua e parahi ai te ati Iebusi.+ 5 Faaooo aˈera to Iebusi ia Davida: “Eita roa oe e tae mai i roto i teie oire!”+ Tera râ, haru ihora Davida i te pare o Ziona,+ o tei parauhia i teie nei te Oire o Davida.+ 6 Na ô ihora ïa Davida: “E riro te taata matamua o te tairi i te ati Iebusi ei raatira* o te mau nuu.” E o Ioaba+ te tamaiti a Zeruia tei reva na mua, e riro maira oia ei raatira. 7 Faaea roa ˈtura Davida i roto i taua pare ra. No reira ratou i parau ai i taua vahi ra te Oire o Davida. 8 Haamata ihora oia i te faatia i te oire ati aˈe, mai Milo* e tae atu i te mau vahi ati aˈe, e na Ioaba i tataî i te toea o te oire. 9 Puai noa ˈtura ïa Davida,+ e tei pihai iho atoa Iehova o te mau nuu* ia ˈna.

10 Teie te mau upoo o te mau aito puai a Davida, o tei turu maitai ia ˈna i to ˈna tiaraa arii, amui atoa mai to Iseraela taatoa, no te faaarii ia ˈna ia au i te parau a Iehova no nia ia Iseraela.+ 11 Teie na aito puai roa ˈˈe e toru a Davida: Iasobeama+ te tamaiti a te hoê ati Hakemoni, te raatira o na aito e toru.+ I te hoê mahana, ua haapohe oia e 300 taata i ta ˈna omore.+ 12 I muri aˈe ia ˈna, o Eleazara+ ïa te tamaiti a Dodo te ati Ahohi.+ O ˈna hoê o na toru aito puai roa ˈˈe. 13 Tei ia Davida ra oia i Pasa-damima,+ i te vahi i haaputuputu ai te mau Philiseti no te tamaˈi. E tâpû fenua râ to reira ua î i te kerite, e ua horo ê te mau faehau no te mau Philiseti. 14 Tia ihora râ oia i ropu i te faaapu e paruru ihora i taua faaapu ra. Tairi ihora oia i te mau Philiseti e faatupu ihora Iehova i te hoê upootiaraa* rahi.+

15 Pou atura e toru no roto mai i na 30 raatira ia Davida ra i te ana o Adulama.+ Te puhapa ra ïa te hoê nuu Philiseti i te peho o te ati Repha.+ 16 Tei roto ïa Davida i to ˈna haapuraa, e tei Betelehema te hoê pǔpǔ faehau a te mau Philiseti. 17 Faaite atura Davida i to ˈna hinaaro: “Ahani ta ˈu e nehenehe e inu i te pape no ǒ mai i te apoo pape i pihai iho i te uputa o Betelehema!”+ 18 I reira, tomo ihora na aito e toru i roto i te puhapa a te mau Philiseti, huti ihora i te pape no roto mai i te apoo i pihai iho i te uputa o Betelehema e hopoi maira i te reira ia Davida ra. Aita râ Davida i farii i te inu e manii ihora oia i taua pape ra i raro i mua ia Iehova. 19 Na ô ihora oia: “Eita roa ˈtu ta ˈu e nehenehe e inu i teie pape i mua i to ˈu Atua. Mai te mea ra ïa e te inu ra vau i te toto o teie mau tane o tei faaû i te pohe.+ Ua faaû hoi ratou i te pohe no te afai mai i tera pape.” Aita ˈtura ïa oia i inu i te reira. Tera te mau ohipa ta ta ˈna e toru aito puai roa ˈˈe i rave.

20 Riro maira Abisai+ te taeae o Ioaba+ ei raatira i nia e toru aito puai ê atu. Ua haapohe oia e 300 taata i ta ˈna omore. Tui atura to ˈna roo mai to na aito puai roa ˈˈe e toru.+ 21 I roto ia ratou e toru, o ˈna te mea matau-roa-hia i te tahi atu e piti, e o ˈna to ratou raatira. Aita râ oia i tapae i te faito o na aito puai roa ˈˈe e toru a Davida.

22 E tane itoito* o Benaia+ te tamaiti a Iehoiada, mea rahi te ohipa ta ˈna i rave i Kabezeela.+ Ua taparahi oia i na tamaiti e piti a Ariela no Moabi. Ua pou atoa oia i roto i te hoê apoo pape i te hoê mahana hiona no te taparahi i te hoê liona.+ 23 Ua taparahi atoa oia i te hoê tiapai taata Aiphiti, e pae kubiti* te roa.+ Ua aro Benaia ia ˈna i te hoê raau, area ta taua taata Aiphiti ra, e omore ïa mai te raau a te feia raraa.+ Haru maira oia i te omore i te rima o te taata Aiphiti e haapohe ihora ia ˈna i tera omore.+ 24 Tera te mau ohipa ta Benaia te tamaiti a Iehoiada i rave. Tui atura to ˈna roo mai to na aito puai roa ˈˈe e toru. 25 Noa ˈtu mea matauhia oia hau aˈe i na 30 taata, aita oia i tapae i te faito o na aito puai roa ˈˈe e toru.+ Tera râ, ua faatoroa Davida ia ˈna ei raatira no to ˈna feia tiai.

26 Na aito puai o te mau nuu faehau, o Asahela+ te taeae o Ioaba, Elehanana te tamaiti a Dodo no Betelehema,+ 27 Samota no Harori, Heleza no Peloni, 28 Ira+ te tamaiti a Ikesa no Tekoa, Abi-ezera+ no Anatota, 29 Sibekai+ ati Husa, Ilai ati Ahohi, 30 Maharai+ no Netopha, Heleda+ te tamaiti a Baanaha no Netopha, 31 Îtai te tamaiti a Ribai no Gibea a te ati Beniamina,+ Benaia no Piratona, 32 Hurai no te mau tahora i Gaasa,+ Abiela no Bete-araba, 33 Azamaveta no Bahurima, Eliahaba no Saalabima, 34 na tamaiti a Hasema no Gezoni, Ionatana te tamaiti a Sage ati Harari, 35 Ahiama te tamaiti a Sakara ati Harari, Elephala te tamaiti a Ura, 36 Hepheri no Mekera, Ahia no Peloni, 37 Hezero no Karemela, Naarai te tamaiti a Ezebai, 38 Ioela te taeae o Natana, Mibahara te tamaiti a Hageri, 39 Zeleka ati Amona, Naharai no Berota, te amo mauhaa a Ioaba te tamaiti a Zeruia, 40 Ira ati Ituri, Gareba ati Ituri, 41 Uria+ ati Heta, Zabada te tamaiti a Ahelai, 42 Adina te tamaiti a Siza ati Reubena, e upoo no te ati Reubena, e e 30 na muri ia ˈna, 43 Hanana te tamaiti a Maaka, Iosaphata te Mitini, 44 Utia no Asetarota, Sâma e Ieiela, na tamaiti a Hotama no Aroera, 45 Iediaela te tamaiti a Simiri e Ioha to ˈna taeae no Tizi, 46 Eliela te Mahavi, Ieribai e Iosavia na tamaiti a Elenaama, e Itema ati Moabi, 47 Eliela, Obeda e Iaasiela te Mesoba.