Paraleipomeno 1

TE FEIA I AMUI MAI IA DAVIDA I ZIKELAGA.

12 Teie na taata i haere mai i Zikelaga ia Davida ra, a pupuni ai oia ia Saula a Kisa ra; e feia aito ratou, o tei tauturu maitai mai ia ˈna i te tamaˈi. 2 To te ati Beniamina ra, i te mau taeae o Saula ra, o teie nei ïa, e fana te mauhaa, e pee hoi te ofai ia maa, e pee hoi te ohe ia teˈa, e piti rima te atau e te aui. 3 O Ahiezera, o tei hau ïa, e o Ioasa, na tamarii a Semaa i Gibea; e o Ieziela, e o Peleta, na tamarii a Azamaveta; e o Beraka, e o Iehu i Anatota; 4 e o Isemaia i Gibeona, o tei itoito ïa i roto ia ratou atoa e toru ahuru, o tei hau ïa ia ratou e toru atoa ahuru; e o Ieremia, e o Iahaziela, e o Iohanana, e o Iosabada i Gedera; 5 e o Eluzai, e o Ierimota, e o Bealia, e o Semaria, e o Sephatia i Haruphi; 6 e o Elekana, e o Iesia, e o Azareela, e o Ioezera, e o Iasobeama ati Kora; 7 e o Ioela, e o Zebadia, na tamarii a Ierohama i Gedora.

8 To te ati Gada i haere mai i nia i te pare i te medebara ia Davida ra, e feia aito ïa, e taata ïa i te tamaˈi; o tei mau ïa i te mahae e te paruru, o tei au to ratou mata i to te liona, e mai te zabi i nia i te mouˈa ra te oioi; 9 o Ezera te hoê; Obadia te toopiti; Eliaba to tootoru; 10 o Misimana te toomaha; o Ieremia te toopae; 11 o Atai te tooono; o Eliela te toohitu; 12 o Iohanana te toovau; o Elezabada te tooiva; 13 o Ieremia te tino ahuru; o Makabanai te ahuru ma hoê. 14 O na tamarii a Gada teie, e feia raatira no te nuu: o tei iti ra hoê hanere ta ˈna, e o tei rahi ra hoê a ˈna tausani. 15 O taua feia ra teie i haere i te tahi pae Ioridana i te marama matamua ra, a haono ai ra; purara ˈtura to te peho atoa ra, i te pae i te hitia o te râ e te tooa o te râ.

16 E tae maira te tahi pae i te mau tamarii a Beniamina e ta Iuda i te pare ia Davida ra; 17 ua haere atura Davida i rapae au e farerei ia ratou, e ua parau atura ia ratou, na ô atura, E tere hau to outou e tauturu mai outou ia ˈu, e au atoa to ˈu aau ia outou; i tii mai râ outou e haavare mai ia ˈu i to ˈu nei enemi, aita ra o ˈu e hamani ino, na te Atua o to tatou mau metua e hiˈo mai, e na ˈna e tahoo mai. 18 Ua roohia ihora te taata rahi i taua mau raatira ra o Amasai e te varua, e ua na ô aˈera; no oe matou nei, e Davida, no to oe ra paeau, e tena na tamaiti a Iese e: ei hau, ei hau to oe, ei hau hoi to tei turu mai ia oe ra; o to Atua hoi tei turu mai ia oe. Ua farii maira Davida ia ratou, e ua faariro ia ratou ei raatira no te mau pǔpǔ ra. 19 Ua taati maira te tahi pae o te opu o Manase ra ia Davida, ia ˈna i amui atoa i te mau Philiseti e tamaˈi atu ia Saula ra: aita râ ratou i tauturu ia ratou: i faahoˈihia maira râ oia e te mau fatu o te mau Philiseti ra, na ô aˈera, E au â oia i tana fatu ra ia Saula, o to tatou iho mau upoo te hoo. 20 Te haere noa ra oia i Zikelaga, ua haere maira no ǒ ia Manase ra o Adana, e o Iozabada, e o Iediaela, e o Mikaela, e o Iozabada, e o Elihu, e o Zilitai, e raatira anaˈe no nia i te mau tausani i ǒ Manase ra. 21 Ua tauturu ratou ia Davida i taua pǔpǔ ati Amaleka ra, e feia aito anaˈe hoi ratou, e hui raatira no te nuu ra. 22 Te haere noa maira ratou i tera mahana, i tera mahana, e tauturu ia Davida, e riro noa ˈtura tana ei nuu rahi mai te nuu a te Atua ra.

23 Teie te huru o taua mau pǔpǔ i haere mai, ma te mauhaa tamaˈi atoa, ia Davida i Heberona ra, e ruri i te basileia o Saula ia Davida, ta Iehova hoi i parau maira. 24 To te mau tamarii a Iuda ra, e ono ïa tausani, e vau hanere, ma te maehae e te paruru, ma te mauhaa tamaˈi atoa. 25 To te mau tamarii a Simeona, e feia aito e au i te tamaˈi, e hitu ïa tausani hoê hanere. 26 To te mau tamarii a Levi ra, e maha ïa tausani, e ono hanere. 27 O Iehoiada te aratai i te ati Aarona, e toru a ˈna tausani e hitu hanere; 28 e o Zadoka, e taata apî e te mǎtaˈu ore, e na raatira e piti ahuru, e piti tiahapa, no te utuafare o tana metua tane. 29 To te mau tamarii a Beniamina, te mau taeae o Saula ra, e toru ïa tausani; te ati ra hoi te rahi o ratou i te utuafare o Saula ra. 30 To te mau tamarii a Epheraima ra, hoê taau ïa tausani, e vau hanere, e feia aito anaˈe e te tuiroo i te utuafare o to ratou mau metua ra. 31 To te opu vaehaa o Manase ra, hoê ïa ahuru ma vau i te tausani, o tei haapaohia ïa, o tei faahitihia te iˈoa, e e haere mai e faaarii ia Davida. 32 To te mau tamarii a Isakara ra, to ratou feia rarahi ra, e piti ïa hanere, e feia ite, e te haapao maitai, o tei ite i te ravea e au ai ia Iseraela i taua anotau ra; e faaroohia mai hoi ratou e to ratou mau taeae atoa ra. 33 To te mau tamarii a Zebuluna, o tei tae i te tamaˈi ra, e o tei ite i te rave i te mau mauhaa tamaˈi atoa ra, e pae ïa ahuru i te tausani tei haere mai e tauturu ia ˈna, e ere ïa i te feia aau piti. 34 To te mau tamarii a Naphatali ra, hoê tausani ïa feia raatira, e toru ahuru ma hitu i te tausani i te taata, ma te paruru e te maehae. 35 To te ati Dana ra, e feia itoito i te tamaˈi, e piti ahuru e ma vau i te tausani, e ono hoi hanere. 36 To te mau tamarii a Asera ra, o tei tae i te tamaˈi ra, e tei itoito atoa ia aro ra, e maha ïa ahururaa i te tausani. 37 E to te ati Reubena, e te ati Gada, e te opu vaehaa o Manase i te tahi pae pape Ioridana ra, e ma te mau mauhaa tamaˈi atoa ia aro ra, hoê ïa hanere, e piti ahuru i te tausani. 38 O taua feia tamaˈi atoa nei, o tei haapao maite i te nanai ra, tei haere atoa mai ïa ma te aau maitai i Heberona, e faaarii ia Davida ei arii no Iseraela atoa ra; hoê atoa ïa aau to Iseraela atoa ra e faaarii â ia Davida. 39 I reira ratou ia Davida ra, e a toru aˈera mahana, i te amuraa e te inuraa, e mea faanahonahohia hoi e to ratou mau taeae na ratou. 40 E te feia i fatata mai hoi, o Isakara, e o Zebuluna, e o Naphatali, tei faahoro mai i te maa na nia i te asini, e te kamela, e te pheradi, e te puaatoro; e te maa, e te faraoa, e te suke, e te huero vine, e te uaina, e te hinu olive, e te puaatoro, e te mamoe e rave rahi. Ua oaoa hoi Iseraela.