Paraleipomeno 1

PARAU NO TE ORARAA E NO TE POHERAA ATOA O SAULA RA.

10 Ua tamaˈi maira te Philiseti ia Iseraela; e ua fati ihora to Iseraela i te Philiseti, tarava noa ihora i nia i te mouˈa ra o Gilaboa, ua pohe roa. 2 Ua tipapa hua ˈtura te Philiseti ia Saula e na tamarii; pohe ihora Ionatana, e o Abinadaba, e o Maleki-sua, na tamarii ïa a Saula i te Philiseti. 3 Riro atura te tamaˈi i nia ia Saula i reira, e ua puta ihora oia i te feia teˈa, paruparu ihora oia i taua feia teˈa ra. 4 Ua parau atura Saula i te hopoi mauhaa na ˈna ra, A unuhi na i te ˈoˈe na oe ra e patia mai ia ˈu e ia pǔpû; o te roohia mai au e teie nei peritome ore o te aa mai ia ˈu. Aita râ i faatiahia ˈtu e taua hopoi mauhaa na ˈna ra; ua rahi roa hoi to ˈna mǎtaˈu. Ua rave ihora Saula i te ˈoˈe, e ua haamairi noa ihora i nia iho. 5 E ia hiˈo ihora taua hopoi mauhaa no ˈna ra e ua pohe Saula; ua haatopa noa ihora oia iho i nia i te ˈoˈe na ˈna, pohe ihora. 6 O Saula, e na tamarii tootoru, e te taata atoa no ˈna, hoê â pohe-atoa-raa. 7 Ite aˈera to Iseraela atoa i parahi i te peho ra, e ua fati to Iseraela e ua pohe Saula e na tamarii atoa, ua faarue ihora i to ratou mau oire e ua horo atoa; e ua haere maira te Philiseti, ua parahi ihora i roto.

8 E aˈo aˈera, ia haere mai te Philiseti e taratara i te ahu o te feia i pohe ra, ua itea ihora Saula e na tamarii tootoru, ua pohe i nia i te mouˈa ra o Gilaboa. 9 Ua taratara ihora ratou i to ˈna ahu e oti aˈera, ua rave ihora i te upoo, e na mauhaa na ˈna, ua hopoi haere na te fenua atoa o te Philiseti; e faaite haere na roto i te mau hiero o to ratou mau idolo ra, e te taata atoa ra. 10 Ua tuu ihora ratou i te mauhaa na ˈna ra i roto i te hoê hiero no te hoê atua no ratou ra; e ua faauta ratou i te upoo i roto i te hiero o Dagona.

11 Ite aˈera râ to Iabesa-gileada i ta te Philiseti i rave ia Saula ra, 12 Ua tia aˈera te feia aita atoa ra, ua rave maira i taua tino o Saula ra, e te mau tino atoa o te tamarii, ua hopoi maira i Iabesa; e ua tanu ihora i te ivi i raro aˈe i te ale i Iabesa; ua haapae ihora i te maa e rui hitu aˈera.

13 Pohe ihora Saula i ta ˈna hara i rave ia Iehova ra, i te haapao ore i te parau a Iehova, e te ui i te varua ino, 14 e aore i ui ia Iehova, pohe ihora oia; rurihia aˈera te hau i te tamaiti a Iese ra ia Davida.