Te piti o te rata i to Tesalonia

1 O Paulo, o Siluano* e o Timoteo,+ i te amuiraa i Tesalonia tei hoê e te Atua to tatou Metua e tei hoê e te Fatu ra o Iesu Mesia:

2 Ei ia outou te hamani maitai rahi e te hau no ǒ mai i te Atua te Metua e no ǒ mai i te Fatu ra o Iesu Mesia.

3 Taeae ma, ia haamauruuru noa matou i te Atua no outou e tia ˈi. E mea tano, no te mea ua rahi roa mai to outou faaroo e te here roa ˈtu â ra outou paatoa te tahi i te tahi.+ 4 I riro mai ai outou ei haapeuraa na matou+ i rotopu i te mau amuiraa a te Atua no to outou faaoromai tamau e to outou faaroo i roto i te mau hamani-ino-raa atoa e te mauiui* ta outou e faaruru* nei.+ 5 Ei haapapuraa ïa e e haavaraa parau-tia ta te Atua, i au ai ia outou te Faatereraa arii a* te Atua, no reira hoi outou e mauiui ai.+

6 E mea tia iho â i te Atua ia tahoo i te feia i roohia ˈi outou e te ati.+ 7 Area outou e roohia ra i te ati, e tamahanahanahia outou e o matou atoa ua faaite-anaˈe-hia mai te Fatu ra o Iesu+ mai te raˈi mai e ta ˈna mau melahi puai+ 8 ma te auahi ura, ia faautua oia i te feia aita i ite i te Atua e te feia aita e auraro ra i te parau apî oaoa no nia i to tatou Fatu ra o Iesu.+ 9 O ratou mau â te faautuahia i te haamouraa mure ore+ mai mua mai i te Fatu e i to ˈna mana hanahana, 10 i te taime e haere mai ai oia ia faahanahanahia oia e ta ˈna atoa mau tavini moˈa, e ia hiˈo-maere-hia ˈtu oia i taua mahana ra e te feia atoa i faatupu i te faaroo, no te mea ua tiaturi outou i ta matou mau parau i faaite atu.

11 No reira ïa matou e pure noa ˈi no outou, ia auhia outou e to tatou Atua tei titau manihini ia outou,+ e na roto i to ˈna ra mana ia rave faahope ïa oia i te mau mea maitatai atoa ta ˈna e au e ia rave faahope i ta outou mau ohipa faaroo atoa. 12 E ia faahanahanahia te iˈoa o to tatou Fatu ra o Iesu na roto ia outou, e ia faahanahanahia outou tei hoê e o ˈna, ia au i te hamani maitai rahi o to tatou Atua e o te Fatu ra o Iesu Mesia.