Tesalonia 2

Te Episetole piti i to Tesalonia ra

TE FAAITE NEI PAULO I TO ˈNA MANAˈO MAITAI I TO RATOU FAAROO, E TE AROHA, E TE FAAOROMAI.

1 Paulo, e o Siluano, e o Timoteo, i te ekalesia i roto i te Atua ra i to tatou Metua, e te Fatu ra hoi ia Iesu Mesia i Tesalonia na; 2 ei ia outou te aroha mau e te hau no ǒ mai i te Atua i to tatou ra metua, e no ǒ hoi i te Fatu ra ia Iesu Mesia.

3 E mea tia ia matou ia haamaitai i te Atua ia outou, e te mau taeae, eiaha e faaea, e au ïa no te mea te tupu roa ra to outou faaroo, e to outou aroha ia outou iho e ati noa ˈˈe ua rahi roa ïa; 4 o matou iho hoi te arue ia outou i te mau ekalesia o te Atua, i to outou faaoromai, e te faaroo, i to outou hamani-ino-raahia mai, e te mau pohe atoa ta outou na; 5 ei faaiteraa i te faahapa tia a te Atua, e ia parauhia outou e feia au i te basileia o te Atua, no reira outou i pohe ai ra. 6 E mea tia hoi i te Atua ia faautua i te feia i pohe ai outou na i te pohe; 7 area ia outou i tei hamani-ino-hia ra, o te ora ïa ta ˈna e tuu mai no tatou atoa nei, ia fa mai te Fatu ra o Iesu mai te raˈi mai, ma tana mau melahi mana atoa ra, 8 ma te auahi ura ra, i te tuuraa mai i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu Mesia ra: 9 o te utuahia mai ïa i te pohe mure ore, mai te aro atu o te Fatu ra, mai te anaana o to ˈna ra mana; 10 ia tae i te mahana e tae mai ai oia ra, ia faateiteihia oia e to ˈna ra feia moˈa, e ia umerehia e te feia atoa i faaroo ra. (Mai ia outou, ua faaroohia hoi ta matou parau i roto ia outou na.) 11 I pure ai hoi matou ia outou aore i faaea, ia faaau to tatou Atua ia outou i taua parauraa nei, e ia faatupu hua oia i te hamani maitai o to ˈna ra maitai, e te ohipa ra o te faaroo ma te puai; 12 ia haamaitaihia te iˈoa o to tatou Fatu ra o Iesu Mesia ia outou, e o outou hoi ia haamaitaihia ia ˈna, i te aroha mau o to tatou Atua, o te Fatu ra o Iesu Mesia.