Te piti o te rata i to Tesalonia
2 Taeae ma, no nia râ i te tau o te hoˈiraa mai* o to tatou Fatu ra o Iesu Mesia+ e ia amuihia tatou ia ˈna ra,+ te ani atu nei matou 2 eiaha to outou feruriraa ia oioi i te feaa e ia horuhoru i te hoê parau faauruhia*+ aore ra i te hoê poroi aore ra i te hoê rata mai te mea ra e no ǒ atu ia matou e ua tae mai te mahana o Iehova.*+
3 Eiaha roa ei taata e faahahi ê* ia outou, no te mea eita taua mahana ra e tae mai hou a itehia ˈi na mua te taiva+ e te taata ofati ture,+ te tamaiti o te haamouraa ïa.+ 4 E enemi oia e e faateitei oia ia ˈna iho i nia i te mau mea atoa e parauhia e e atua aore ra o ta te taata e haamori,* a parahi atu ai oia i roto i te hiero o te Atua ia itehia mai oia e te taata atoa mai te mea ra e e atua. 5 Ua moˈe anei ia outou e i faahiti noa na vau i teie mau parau a parahi noa ˈi au i ǒ outou?
6 E teie nei, ua ite outou o vai te tapea ra i tera taata ofati ture, ia itehia mai hoi oia i te taime tano. 7 Oia mau, teie ohipa ofati ture, e parau huna hoi, ua ohipa ê na ïa,+ e e vai huna noa teie parau e tae roa i te taime aita faahou te taata e tapea ra i te reira. 8 I reira ïa te taata ofati ture e faaitehia ˈi, ta te Fatu ra hoi o Iesu e haamou i te puai ohipa o to ˈna vaha,+ e ta ˈna e faaore roa i te tau e ite-maitai-hia ˈi+ e ua hoˈi mai oia. 9 Tera râ, te ohiparaa mai taua taata ofati ture ra, mea na roto ïa i te ravea a Satani+ ma te ohipa mana atoa e te tapao e te ohipa faahiahia mau*+ haavare 10 e ma te parau-tia ore e te haavare atoa+ no te feia e pohe ra, ei faautuaraa ïa no te mea aita ratou i farii e i hinaaro i te parau mau ia ora mai ratou. 11 No reira te Atua i vaiiho ai ia vare ratou i te puai ume o te haavare a tiaturi atu ai i te parau haavare,+ 12 ia haavahia ratou paatoa no te mea aita ratou i tiaturi i te parau mau, ua navenave râ i te parau-tia ore.
13 Tera râ, taeae ma herehia e Iehova,* ia haamauruuru noa matou i te Atua no outou e tia ˈi, no te mea mai te haamataraa ua maiti te Atua ia outou+ no te faaoraraa na roto i te haamoˈaraa ia outou+ i to ˈna varua e na roto i to outou tiaturiraa i te parau mau. 14 Ua titau manihini oia ia outou no te faaoraraa maoti te parau apî oaoa ta matou e faaite haere ra, ia noaa hoi ia outou te hanahana o to tatou Fatu ra o Iesu Mesia.+ 15 Taeae ma, a mau papu+ ïa e a tapea i te mau parau i haapiihia ia outou,+ na roto anei i te hoê poroi aore ra i te hoê rata ta matou e faatae atu. 16 Hau atu â, to tatou Fatu ra o Iesu Mesia iho e to tatou Atua e Metua tei here ia tatou+ e tei horoa mai i te tamahanahanaraa mure ore e te hoê tiaturiraa faahiahia+ na roto i te hamani maitai rahi, 17 ia tamahanahana raua i to outou aau e ia haapuai* ia outou, ia parau e ia rave noa i te mea maitai.