Ezekiela
32 E i te 12 o te matahiti, i te mahana matamua o te 12 o te avaˈe, tae faahou maira te parau a Iehova ia ˈu, a na ô ai: 2 “Tamaiti a te taata, a himene i te tahi himene oto no Pharao arii o Aiphiti, e a parau ia ˈna:
‘Mai te hoê liona apî puai o te mau nunaa oe na mua ˈˈe,
Ua haamamûhia râ oe.
Mai te hoê animara rahi o te miti+ oe na mua ˈˈe, a hautiuti noa ˈi i roto i to oe mau anavai,
A faareru ai i te mau pape i to oe avae e a taataahi ai i te* mau anavai.’
3 Teie ta te Arii hau ê e Fatu ra o Iehova e parau ra:
‘Na roto e rave rahi amuiraa nunaa e taora ˈi au i ta ˈu upeˈa i nia ia oe,
E na ratou e ume mai ia oe i roto i ta ˈu upeˈa.
4 E faarue au ia oe i nia i te fenua.
E taora vau ia oe i te peho.
E faatau vau i nia ia oe pauroa te manu o te raˈi,
E horoa vau ia oe ei maa na te mau animara oviri o te fenua taatoa+ e ia paia noa ˈtu ratou.
6 E tapuru vau i te fenua i to oe toto tei pahi e tae roa i nia i te mau mouˈa,
E e î te mau taheraa pape i te reira.’*
7 ‘E ia pohe oe, e tapoˈi au i te raˈi e e haapoiri au i to ratou mau fetia.
E tapoˈi au i te mahana i te ata,
E eita te avaˈe e horoa mai i to ˈna maramarama.+
8 E haapoiri au i te mau tiarama anaana atoa i roto i te raˈi no oe aˈe,
E e tapoˈi au i to oe fenua i te poiri,’ te parau ra te Arii hau ê e Fatu ra o Iehova.
9 ‘E faahepohepo vau i te aau o te nunaa e rave rahi ia hopoi au i ta oe mau tîtî i te tahi atu mau nunaa ra,
I te tahi mau fenua aita oe i ite.+
10 E haamaere au e rave rahi nunaa,
E e rûrû to ratou mau arii no te mehameha no ta oe e faaruru ia faaiteite au i ta ˈu ˈoˈe i mua ia ratou.
E rûrû noa ratou, te taata tataitahi e mǎtaˈu ra no to ˈna ora,
I te mahana o to oe toparaa.’
11 Teie hoi ta te Arii hau ê e Fatu ra o Iehova e parau ra:
‘E tae te ˈoˈe a te arii o Babulonia i nia ia oe.+
12 E haapohe au i to oe nahoa taata i te ˈoˈe a te mau aito puai,
Te mea taehae roa ˈˈe o te mau nunaa, pauroa ratou.+
E faahaehaa ratou i te teoteo o Aiphiti, e pauroa to ˈna nahoa taata te haamouhia.+
13 E haamou vau pauroa ta ˈna animara na pihai iho i to ˈna pape e rave rahi,+
E eita to te taata avae e to te animara e faareru faahou i te reira.’+
14 ‘I tera taime, e tamâ roa vau i to ratou mau pape,
E e faatahe au i to ratou mau anavai mai te hinu,’ te parau ra te Arii hau ê e Fatu ra o Iehova.
15 ‘Ia faariro vau ia Aiphiti ei fenua taata ore e te vai ano, ei fenua tei faaorehia te mau mea atoa i nia iho,+
Ia tairi au pauroa te taata e parahi ra i reira,
E ite ïa ratou o vau o Iehova.+
16 E himene oto tera, e e himene mau â te taata i te reira.
E himene te mau tamahine o te mau nunaa i te reira.
E himene ratou i te reira no nia ia Aiphiti e pauroa to ˈna nahoa taata,’ te parau ra te Arii hau ê e Fatu ra o Iehova.”
17 E i te 12 o te matahiti, i te 15 o te mahana o te avaˈe, tae maira te parau a Iehova ia ˈu, a na ô ai: 18 “Tamaiti a te taata, a tuô i te nahoa taata o Aiphiti e a haapou ia ˈna i te fenua no raro, o ˈna e te mau tamahine o te mau nunaa puai, e te feia e pou ra i te apoo.*
19 “‘Ia vai oe i hau aˈe i te haviti? A pou, e a tarava e te feia peritome-ore-hia!’
20 “‘E topa ratou i rotopu i te feia tei haapohehia i te ˈoˈe.+ Ua tuuhia oia i te ˈoˈe. A faaatea ê atu ia ˈna e to ˈna nahoa taata atoa.
21 “‘Mai te hohonuraa mai o te Apoo,* e paraparau te mau aito puai ia ˈna e to ˈna mau tauturu. E pou iho â ratou e e tarava mai te feia peritome-ore-hia, tei haapohehia i te ˈoˈe. 22 To reira Asura e ta ˈna nuu taatoa. Ua haaatihia o ˈna i to ratou mau apoo hunaraa atoa, pauroa ratou tei pohe i te ˈoˈe.+ 23 Tei te hohonuraa o te apoo* to ˈna mau apoo hunaraa, e ua haaatihia to ˈna apoo hunaraa i ta ˈna nuu, pauroa ratou tei haapohehia i te ˈoˈe, no te mea ua faatupu ratou i te riaria i te fenua o te feia ora.
24 “‘To reira Elama+ e pauroa to ˈna nahoa taata ati aˈe i to ˈna apoo hunaraa, pauroa ratou tei pohe i te ˈoˈe. Ua pou ratou ma te peritome-ore-hia i te fenua no raro, te feia tei faatupu i te riaria i te fenua o te feia ora. I teie nei, e haama noa ratou e te feia e pou ra i te apoo.* 25 Ua hamanihia te tahi roˈi no ˈna i rotopu i tei haapohehia, e pauroa to ˈna nahoa taata tei haaati i to ˈna mau apoo hunaraa. Mea peritome-ore-hia ratou pauroa, ua haapohehia i te ˈoˈe, no te mea ua faatupu ratou i te riaria i te fenua o te feia ora. E e haama noa ratou e te feia e pou ra i te apoo.* To rotopu oia i te feia tei haapohehia.
26 “‘To reira Meteka e Tubala+ e pauroa to raua* nahoa taata. Ua haaatihia oia* e pauroa to ratou* apoo hunaraa. E feia peritome-ore-hia ratou pauroa, tei puta roa i te ˈoˈe, no te mea ua faatupu ratou i te riaria i te fenua o te feia ora. 27 Eita anei ratou e tarava e te mau aito puai peritome-ore-hia, tei pou i te Apoo* e ta ratou mau mauhaa tamaˈi? E e tuu ratou i ta ratou mau ˈoˈe i raro aˈe i to ratou upoo* e ta ratou mau hara i nia iho i to ratou mau ivi, no te mea ua faatupu taua mau aito puai ra i te riaria i te fenua o te feia ora. 28 Area râ oe, e haaperehuhia i rotopu i te feia peritome-ore-hia, e e tarava oe e te feia tei haapohehia i te ˈoˈe.
29 “‘To reira Edoma,+ ua tarava to ˈna mau arii e pauroa to ˈna raatira, tei vahavaha i to ratou puai, i rotopu i te feia tei haapohehia i te ˈoˈe. E tarava atoa ratou e te feia peritome-ore-hia+ e te feia e pou ra i te apoo.*
30 “‘To reira pauroa te huiarii* no apatoerau, e pauroa to Sidona,+ tei pou ma te haama i te feia tei haapohehia, noa ˈtu te riaria ta ratou i faatupu no to ratou puai. E tarava ratou ma te peritome-ore-hia e te feia tei haapohehia i te ˈoˈe e e haama noa ratou e te feia e pou ra i te apoo.*
31 “‘E ite Pharao ia ratou pauroa, e e tamahanahanahia oia i te mau mea atoa ta to ˈna nahoa taata i faaruru.+ E haapohehia Pharao e ta ˈna nuu taatoa i te ˈoˈe,’ te parau ra te Arii hau ê e Fatu ra o Iehova.
32 “‘No te mea ua faatupu oia i te riaria i te fenua o te feia ora, e hunahia Pharao e pauroa to ˈna nahoa taata e te feia peritome-ore-hia, e te feia tei haapohehia i te ˈoˈe,’ te parau ra te Arii hau ê e Fatu ra o Iehova.”