Ieremia

35 Tae maira te parau a Iehova ia Ieremia i te mau mahana o te faatereraa a Iehoiakima+ te tamaiti a Iosia, te arii o Iuda, e na ô ra: 2 “A haere i ǒ te ati Rekabi,+ a paraparau ia ratou e a aratai ia ratou i te fare o Iehova, i roto hoê o na piha tamaaraa.* I reira, a horoa ˈtu i te uaina ia inu ratou.”

3 Aratai ihora ïa vau ia Iaazania te tamaiti a Ieremia te tamaiti a Habazinia, to ˈna mau taeae, ta ˈna mau tamaiti atoa, e pauroa te utuafare o te ati Rekabi 4 i roto i te fare o Iehova. Afai ihora vau ia ratou i te piha tamaaraa a te mau tamaiti a Hanana te tamaiti a Igedalia, e taata no te Atua mau. To pihai iho taua piha ra i te piha tamaaraa a te huiarii, to nia noa mai i te piha tamaaraa a Maaseia te tamaiti a Saluma te tiai opani. 5 Tuu atura vau i te hapaina î i te uaina i mua i te mau tane o te utuafare o te ati Rekabi e na ô atura ia ratou: “A inu i te uaina.”

6 Na ô maira râ ratou: “Eita matou e inu i te uaina, no te mea ua horoa mai Iehonadaba*+ te tamaiti a Rekabi to matou tupuna i teie faaueraa: ‘Eiaha roa outou e inu i te uaina e a muri noa ˈtu, outou e ta outou mau tamarii. 7 E eiaha roa outou e hamani i te fare, e ueue i te huero maa aore ra e tanu, eiaha atoa ei faaapu vine ta outou. Ia faaea noa râ outou i raro aˈe i te fare ie, a nehenehe atu ai outou e ora maoro i te fenua ta outou e parahi ra ei taata ěê.’ 8 E tamau noa ïa matou i te faaroo i te mau parau atoa ta Iehonadaba te tamaiti a to matou tupuna o Rekabi i faaue ia matou e haapao, eita roa ˈtu matou e inu i te uaina, matou, ta matou mau vahine faaipoipo, ta matou mau tamaiti e ta matou mau tamahine. 9 E eita matou e hamani i te fare no te parahi i roto, e aita atoa ta matou e faaapu vine, e faaapu aore ra e huero maa. 10 E tamau noa matou i te ora i raro aˈe i te fare ie e i te faaroo i te mau parau atoa ta Iehonadaba* to matou tupuna i faaue ia matou e haapao. 11 Tera râ, i to Nebukanesa te arii o Babulonia haereraa mai e aro i teie fenua,+ na ô aˈera matou: ‘Mai, tomo anaˈe i Ierusalema ia ora ˈtu tatou i te nuu a te mau Kaladaio e to Suria,’ e i teie nei te ora nei matou i Ierusalema.”

12 E tae maira te parau a Iehova ia Ieremia e na ô ra: 13 “Teie ta Iehova o te mau nuu,* te Atua o Iseraela, e parau ra: ‘A haere a parau i te mau taata no Iuda e te feia e parahi ra i Ierusalema: “Aita anei au i tamau noa i te taparuparu ia outou ia faaroo i ta ˈu mau parau?”+ te parau ra Iehova. 14 “Ua faaue Iehonadaba te tamaiti a Rekabi i to ˈna huaai eiaha e inu i te uaina, e ua haapao ratou i ta ˈna mau parau ma te ore e inu i te uaina tae roa mai i teie mahana, a faaroo ai i te faaueraa a to ratou tupuna.+ O vau râ, ua paraparau noa â ïa ia outou,* aita râ outou i faaroo ia ˈu.+ 15 E ua tono noa ˈtu vau i ta ˈu mau tavini atoa te mau peropheta ia outou, a tono noa â ˈi ia ratou*+ ia parau atu: ‘A fariu ê mai na outou tataitahi i to outou haerea ino,+ e a rave i te mea tia! Eiaha e pee e e tavini i te tahi atu mau atua. E nehenehe ïa outou e parahi noa i te fenua ta ˈu i horoa no outou e to outou mau tupuna.’+ Aita râ outou i fariu mai i to outou tariˈa aore ra i faaroo mai ia ˈu. 16 Ua haapao te huaai o Iehonadaba te tamaiti a Rekabi i te faaueraa a to ratou tupuna.+ Teie râ mau taata, aita ïa i faaroo mai ia ˈu.”’”

17 “Teie ïa ta Iehova, te Atua o te mau nuu, te Atua o Iseraela, e parau ra: ‘E faatae au i nia ia Iuda e i nia i te feia atoa e parahi ra i Ierusalema pauroa te ati ta ˈu i faaara ia ratou,+ ua paraparau hoi au ia ratou, aita râ ratou i hinaaro e faaroo mai, e ua pii noa vau ia ratou, aita râ ratou i hinaaro e pahono mai.’”+

18 E na ô atura Ieremia i te utuafare o te ati Rekabi: “Teie ta Iehova o te mau nuu, te Atua o Iseraela, e parau ra: ‘No te mea ua faaroo outou i te faaueraa a to outou tupuna o Iehonadaba e te tamau noa ra outou i te haapao pauroa ta ˈna faaueraa, a rave ai mai ta ˈna iho â i faaue ia outou, 19 teie ta Iehova o te mau nuu, te Atua o Iseraela, e parau ra: “Ei huaai noa iho â to Iehonadaba* te tamaiti a Rekabi no te tavini i mua i to ˈu aro.”’”