Ieremia

TE FAAHAPA NEI IEREMIA I TE ATI IUDA FAAROO ORE, NO TE FAAROO O TE ATI REKABI.

35 Te parau i tae mai ia Ieremia na ǒ ia Iehova ra, i te anotau o Iehoiakima a Iosia ra, e arii o Iuda, na ô maira,

2 Haere i te fare o te ati Rekabi, parau atu ai ia ratou, e aratai mai hoi ia ratou i roto i te fare o Iehova, i roto i te hoê piha ra, a hopoi atu ai i te uaina na ratou ia inu. 3 Ua aratai maira vau ia Iaazania, a Ieremia, a Habazinia ra, e tana mau taeae atoa, e te mau tamarii atoa na ˈna, e te utuafare ati Rekabi atoa ra; 4 i aratai mai au ia ratou i roto i te fare o Iehova, e i roto i te piha o te mau tamarii a Hanana a Igedalia, e taata no te Atua, i pihaiiho i te piha o te hui arii ra, i nia ˈˈe i te piha o Maaseia a Saluma tiai uputa ra: 5 ua tuu atura vau i te auˈa î i te uaina i mua i te aro o te mau tamarii ati Rekabi, e te auˈa rii atoa ra; e ua parau atura vau ia ratou, A inu i te uaina. 6 Ua parau maira ratou, E ore matou e inu i te uaina: o Ionadaba a Rekabi, to matou metua ra, tei aˈo mai ia matou, na ô maira, Eiaha outou e inu i te uaina, outou e ta outou mau tamarii e a muri noa ˈtu: 7 Eiaha outou e patu i te fare, eiaha e tanu i te huero, eiaha hoi ei ô vine ta outou; ei roto râ outou i te tiahapa parahi ai e hope noa ˈtu to outou pue mahana, ia maoro to outou pue mahana, ia maoro to outou parahiraa i te fenua ta outou i parahi taata ěê noa na. 8 Ua faaroo hoi matou i te reo o Ionadaba a Rekabi, to matou metua ra, e te mau parau atoa ta ˈna i poroi mai ia matou, e aitâ matou i inu i te uaina i to matou pue mahana i mairi aˈenei, o matou, e ta matou mau vahine, e ta matou mau tamarii tamaroa, e ta matou mau tamahine; 9 aore hoi matou i patu i te fare ei parahiraa no matou; aore hoi a matou e ô vine, e te aua, aore hoi e huero raau; 10 parahi noa na matou i roto i te tiahapa, e ua faaroo, e ua rave i te mau mea atoa ta to matou metua, ta Ionadaba, i faaue mai ia matou. 11 Ia tae maira te arii o Babulonia ra o Nebukanesa, e rave i teie nei fenua, ua na ô aˈera matou, Haere mai tatou e tomo i roto i Ierusalema i te nuu hoi a te Kaladaio, e te nuu atoa o Arama; e ei Ierusalema tatou e parahi ai.

12 Ua tae maira te parau a Iehova ia Ieremia ra i reira, na ô maira, 13 Te na ô maira Iehova sabaota ra, te Atua no Iseraela; E haere, e parau atu i te mau taata no Iuda, e to Ierusalema atoa ra, E ore anei outou e farii i te aˈo a faaroo mai ai i ta ˈu nei parau? te na reira maira Iehova. 14 Te parau a Ionadaba a Rekabi, ta ˈna i poroi i te mau tamarii na ˈna ra e eiaha e inu i te uaina ra, ua haapaohia ïa; aita hoi ratou i inu i te uaina e tae roa aˈenei i teie nei mahana, ua faaroo ratou i te aˈo a to ratou metua ra; o vau atoa hoi tei parau atu ia outou, ma te tia vave i te poipoi roa e te parauraa ˈtu, aita râ outou i faaroo mai ia ˈu. 15 Ua tono atu hoi au i te mau tavini atoa no ˈu ra i te mau peropheta ia outou na, i te tia-vave-raa i te poipoi e te tonoraa ˈtu, i te na ôraa ˈtu e, E fariu mai na outou, outou atoa i ta ˈna ra parau ino, e haamaitai na i ta outou e rave ra, eiaha e pee i te mau atua ěê ra, i te haamoriraa ia ratou; e parahi ai i te fenua i horoahia e au no outou, e no to outou mau metua ra; aita râ outou i fariu mai i to outou tariˈa, aita hoi i faaroo mai ia ˈu. 16 No te mea, te mau tamarii a Ionadaba a Rekabi, ua haapao i te parau a to ratou metua, ta ˈna i aˈo mai ia ratou ra, e aita teie nei feia i faaroo mai ia ˈu nei; 17 te na ô maira Iehova sabaota ra, te Atua o Iseraela; Inaha, teie au a hopoi mai i te mau ino atoa i nia ia Iuda, e i nia i to Ierusalema atoa ra, i ta ˈu i parau ia ratou ra; no te mea, ua parau vau ia ratou, e aore ratou i faaroo mai; ua tiaoro atu vau ia ratou, e aore ratou i parau mai.

18 Ua na ô atura Ieremia i te utuafare o te ati Rekabi ra; Te na ô maira Iehova sabaota ra, te Atua o Iseraela; No te mea ua faaroo outou i te aˈo a to outou metua ra a Ionadaba, e ua haapao i te mau poroi atoa na ˈna ra, e ua rave i te mau mea atoa ta ˈna i faaite mai ia outou: 19 e teie nei, te na ô maira Iehova sabaota ra, te Atua o Iseraela, Eita roa e ere i te taata i te fetii o Ionadaba a Rekabi i te tiaraa i mua ia ˈu e a muri noa ˈtu.