Ieremia

34 Te aro ra Nebukanesa te arii o Babulonia, ta ˈna nuu taatoa, te mau faatereraa arii atoa o te fenua nei ta ˈna e faatere ra e te mau nunaa atoa ia Ierusalema e te mau oire atoa ati aˈe,+ i tae mai ai te parau a Iehova ia Ieremia e na ô ra:

2 “Teie ta Iehova te Atua o Iseraela e parau ra: ‘A haere e paraparau ia Zedekia+ te arii o Iuda e a na ô atu: “Teie ta Iehova e parau ra: ‘E tuu vau i teie oire i te rima o te arii o Babulonia, e e tanina oia i te reira.+ 3 Eita oe e ora ˈtu i to ˈna rima, inaha e haru-mau-â-hia oe e e tuuhia ˈtu oe ia ˈna ra.+ E ite oe i te arii o Babulonia e mata e mata, e e paraparau oia ia oe e aro e aro, e e haere oe i Babulonia.’+ 4 A faaroo mai râ i te parau a Iehova, e Zedekia te arii o Iuda: ‘Teie ta Iehova e parau ra no nia ia oe: “Eita oe e pohe i te ˈoˈe. 5 Ma te hau oe e pohe ai,+ e e tutuihia te mea noˈanoˈa i to oe hunaraa mai tei ravehia na no to oe mau metua, te mau arii tei faatere na mua ˈˈe ia oe, e e otohia oe a parauhia ˈi: ‘Auê, e fatu e!’ Inaha, ‘tera ta ˈu i parau,’ te parau ra Iehova.”’”’”

6 Faaite atura ïa Ieremia te peropheta i teie mau parau atoa ia Zedekia te arii o Iuda i Ierusalema, 7 te aro ra ïa te mau nuu a te arii o Babulonia ia Ierusalema e i te mau oire atoa o Iuda e toe ra,+ oia hoi Lakisa+ e Azeka,+ tera anaˈe hoi na oire auahia i te patu o Iuda e toe ra.

8 Tae maira te parau a Iehova ia Ieremia i muri iho i to te arii Zedekia faaauraa i te faufaa i to Ierusalema atoa e faatiamâ i to ratou mau tîtî,+ 9 oia hoi ia faatiamâ te taata tataitahi i to ˈna mau tîtî Hebera, te tane e te vahine, ia ore hoi hoê noa ˈˈe e tapea i to ˈna taata tupu ati Iuda ei tîtî no ˈna. 10 Faaroo aˈera ïa pauroa te huiarii e pauroa te taata i taua parau ra. I fafau na ratou tataitahi na roto i taua faufaa ra e faatiamâ i to ratou mau tîtî tane e tîtî vahine e eiaha e tapea maoro atu â ia ratou ei tîtî. Ua faaroo ratou e ua tuu i te mau tîtî ia haere. 11 I muri aˈe râ, faahoˈi maira ratou i te mau tîtî tane e tîtî vahine ta ratou i faatiamâ, e faariro faahou aˈera ia ratou ei tîtî. 12 Tae maira ïa te parau a Iehova ia Ieremia no ǒ mai ia Iehova ra e na ô ra:

13 “Teie ta Iehova te Atua o Iseraela e parau ra: ‘Ua faaau vau i te tahi faufaa i to outou mau tupuna+ i te mahana i aratai ai au ia ratou i rapae i te fenua o Aiphiti, te fenua o te faatîtîraa,+ a na ô ai: 14 “Ua hope anaˈe e hitu matahiti, e faatiamâ outou tataitahi i to outou taeae Hebera tei hoohia ˈtu ia outou e tei tavini ia outou e ono matahiti. E faatiamâ outou ia ˈna.”+ Aita râ to outou mau tupuna i faaroo mai ia ˈu aore ra i fariu mai i to ratou tariˈa. 15 Outou râ, ua taui ïa i to outou haerea aita i maoro aˈenei* e ua rave i te mea tia i to ˈu aro ma te faatiamâ i to outou mau taata tupu e ua faaau outou i te tahi faufaa i mua ia ˈu i roto i te fare tei mairihia i to ˈu iˈoa. 16 I muri iho râ, ua taui to outou manaˈo e ua haafaufaa ore outou i to ˈu iˈoa+ ma te faahoˈi mai i to outou mau tîtî tane e tîtî vahine ta outou i tuu ia haere i te mau vahi atoa ta ratou e hinaaro, e ua faariro faahou outou ia ratou ei tîtî.’

17 “Teie ïa ta Iehova e parau ra: ‘Aita outou i faaroo mai ia ˈu i to outou fafauraa e faatiamâ outou tataitahi i to outou taeae e to outou taata tupu.+ No reira, e fafau vau i teie nei e tuu noa ’tu vau ia outou,’ te parau ra Iehova, ‘i te ˈoˈe, te maˈi pee* e te oˈe,+ e e faariro vau ia outou ei riariaraa no te mau faatereraa arii atoa o te fenua nei.+ 18 E teie te tupu i nia i te feia o tei ofati i ta ˈu faufaa ma te ore e haapao i te mau parau o te faufaa ta ratou i faaau i mua ia ˈu i to ratou tâpûraa na ropu i te fanauˈa puaatoro e to ratou haereraa na ropu i na apaapa e piti,+ 19 oia hoi te huiarii o Iuda, te huiarii o Ierusalema, te mau tia mana, te mau tahuˈa e pauroa to teie fenua o tei haere na ropu i na apaapa fanauˈa puaatoro: 20 E tuu vau ia ratou i to ratou mau enemi e i te feia e imi ra i te rave i to ratou ora, e e riro to ratou tino pohe ei maa na te mau manu o te raˈi e na te mau animara o te fenua.+ 21 E e tuu vau ia Zedekia te arii o Iuda e to ˈna huiarii i te rima o to ratou mau enemi, o te feia e imi ra i te rave i to ratou ora, e o te mau nuu a te arii o Babulonia,+ o te faarue mai ia outou.’+

22 “‘E horoa vau i te tahi faaueraa,’ te parau ra Iehova, ‘e e faahoˈi mai au ia ratou i teie oire. E aro, e haru e e tanina ratou i teie oire.+ E e faariro vau i te mau oire o Iuda ei vahi ano, aita faahou e taata i roto.’”+