Ieremia

33 To roto â Ieremia i te Aua tiairaa+ i te tapearaahia, tae maira te parau a Iehova ia Ieremia no te piti o te taime, e na ô ra: 2 “Teie te parau a Iehova Tei poiete i te fenua, o Iehova o tei hamani e tei haamau papu i te reira, o Iehova to ˈna iˈoa: 3 ‘A pii mai ia ˈu, e e pahono atu vau ia oe e e faaite atu iho â vau ia oe i te mau mea faahiahia e te taa ore aita oe i ite.’”+

4 “Teie hoi ta Iehova te Atua o Iseraela e parau ra no nia i te mau fare o teie oire e te mau fare o te mau arii o Iuda o te vavahihia ei paruru i mua i te eˈa paumaraa no te haru i te oire e i mua i te ˈoˈe,+ 5 e no nia i te feia o te haere mai e aro i te mau Kaladaio, a î ai teie mau vahi i te tino pohe o te feia ta ˈu i haapohe i roto i to ˈu riri e to ˈu riri rahi tahoo, te feia ta ˈu i huna i to ˈu aro i teie oire no ta ratou ohipa ino: 6 ‘E afaro mai oia e e oraora maitai faahou mai oia ia ˈu,+ e e faaora vau i to ratou maˈi e e horoa vau no ratou i te hau rahi e te parau mau.+ 7 E faahoˈi mai au i te mau tîtî o Iuda e te mau tîtî o Iseraela,+ e e patu vau ia ratou mai ta ˈu i rave i te omuaraa.+ 8 E tamâ vau ia ratou i ta ratou hapa atoa no ta ratou mau hara ia ˈu,+ e e faaore au i ta ratou hapa atoa no ta ratou mau hara e ta ratou mau hapa ia ˈu.+ 9 E oaoa vau no te roo maitai o teie oire, e e riro oia ei tumu e aruehia ˈi e e faahanahanahia ˈi au e te mau nunaa atoa o te fenua nei o te faaroo i te maitai atoa ta ˈu e rave no ratou.+ E e mǎtaˈu e e rûrû ratou+ no te maitai atoa ta ˈu e rave no ˈna e te hau atoa ta ˈu e horoa ˈtu.’”+

10 “Teie ta Iehova e parau ra: ‘I teie vahi ta outou e parau e vahi ano, aita e taata e aita e animara, i roto i te mau oire o Iuda e na te mau aroâ ano o Ierusalema, aita e ratere, aita e taata e parahi ra i reira e aita e animara, e faaroo-faahou-hia 11 te tutuô o te popou e o te oaoa,+ te reo o te tane faaipoipo-apî-hia, te reo o te vahine faaipoipo-apî-hia, te reo o te feia e parau ra: “A haamauruuru ia Iehova o te mau nuu,* e Atua maitai hoi Iehova.+ E vai â to ˈna here taiva ore e a muri noa ˈtu!”’+

“‘E hopoi mai ratou i te mau tusia haamauruururaa i roto i te fare o Iehova,+ e faahoˈi mai hoi au i to teie fenua tei hopoi-tîtî-hia, a riro atu ai ratou mai i te omuaraa,’ te parau ra Iehova.”

12 “Teie ta Iehova o te mau nuu e parau ra: ‘I teie fenua ano, aita e taata e aita e animara, e i roto i to ˈna mau oire atoa, e ite-faahou-hia te mau vahi aihere e nehenehe ai te mau tiai e vaiiho i ta ratou mau nǎnǎ ia faafaaea.’+

13 “‘I roto i te mau oire o te tuhaa fenua mouˈa, i roto i te mau oire o te faa, i roto i te mau oire no apatoa, i te fenua o Beniamina, i te mau vahi ati aˈe ia Ierusalema,+ e i roto i te mau oire o Iuda,+ e haere faahou te mau nǎnǎ na raro aˈe i te rima o te taata o te taio ia ratou,’ te parau ra Iehova.”

14 “‘Inaha,’ te parau ra Iehova, ‘te tae mai ra te mau mahana e faatupu ai au i te parau fafau oaoa ta ˈu i faahiti no nia i te nunaa o Iseraela e te nunaa o Iuda.+ 15 I taua mau mahana ra e i taua taime ra, e faatupu vau i te tahi ohi* parau-tia no Davida,+ e o te mea afaro e te parau-tia ta ˈna e faatupu i teie fenua.+ 16 I taua mau mahana ra, e faaorahia Iuda+ e e parahi Ierusalema ma te taiâ ore.+ E teie te iˈoa ia piihia oia: O Iehova to tatou parau-tia.’”+

17 “Teie hoi ta Iehova e parau ra: ‘E vai â te huaai o Davida e o te parahi i nia i te terono o Iseraela,+ 18 e ei taata noa iho â to rotopu i te mau tahuˈa ati Levi o te tia mai i mua ia ˈu no te pûpû i te mau tusia taauahi taatoa e te tahi atu mau tusia e no te tutui i te mau tusia huero maa.’”

19 E tae faahou maira te parau a Iehova ia Ieremia e na ô ra: 20 “Teie ta Iehova e parau ra: ‘Te mahana noa ˈtu e nehenehe ai ta outou e faaore i ta ˈu faufaa no nia i te ao e ta ˈu faufaa no nia i te po, ia ore te ao e te po ia tae mai i to raua taime faataahia,+ 21 i reira noa ïa te faufaa ta ˈu i faaau ia Davida ta ˈu tavini e nehenehe ai e faaorehia,+ a ore atu ai e noaa mai ta ˈna tamaiti o te faatere ei arii i nia i to ˈna terono,+ oia atoa ïa te faufaa ta ˈu i faaau i te mau tahuˈa ati Levi, ta ˈu mau tavini.+ 22 Mai te nuu o te raˈi eita e nehenehe e taiohia e te one o te miti eita e nehenehe e faitohia, mai tera atoa ia faarahi au i te huaai o ta ˈu tavini o Davida e te ati Levi e tavini ra ia ˈu.’”

23 E tae faahou maira te parau a Iehova ia Ieremia e na ô ra: 24 “Aita anei oe i tapao i ta teie nunaa e parau ra: ‘E faarue Iehova i na fetii e piti ta ˈna i maiti’? E aita ratou e faatura ra i to ˈu nunaa e aita e hiˈo faahou ra ia ratou mai te hoê nunaa.

25 “Teie ta Iehova e parau ra: ‘Mai ia ˈu iho â i haamau i ta ˈu faufaa no nia i te ao e te po,+ te mau ture* o te raˈi e o te fenua,+ 26 e ore roa atoa ïa vau e faarue i te huaai o Iakoba e o Davida ta ˈu tavini, aita e mea e tapea ia ˈu ia rave i te taata i rotopu i to ˈna huaai no te faatere i te huaai o Aberahama, o Isaaka e o Iakoba. E haaputuputu hoi au i to ratou mau tîtî+ e e aroha vau ia ratou.’”+