Ieremia
16 Tae faahou maira te parau a Iehova ia ˈu e na ô ra: 2 “Eiaha oe e rave i te tahi vahine faaipoipo na oe, e eiaha ei tamaiti e ei tamahine ta oe i teie fenua. 3 Teie hoi ta Iehova e parau ra no te mau tamaiti e tamahine o te fanauhia i ǒ nei e no to ratou mau metua vahine e to ratou mau metua tane o te fanau mai ia ratou i teie fenua: 4 ‘E pohe ratou i te maˈi pohe,+ aita râ e taata e oto aore ra e huna ia ratou. E riro ratou mai te pera i nia i te repo.+ E pohe ratou i te ˈoˈe e te oˈe,+ e e riro to ratou tino pohe ei maa na te mau manu o te raˈi e na te mau animara o te fenua.’
5 Teie hoi ta Iehova e parau ra:
‘Eiaha e tomo i roto i te tahi fare e tamaaraa hunaraa to reira,
E eiaha e haere atu no te auê aore ra no te horoa ˈtu i te tapao aroha.’+
‘Ua faaore hoi au i ta ˈu hau i rotopu i teie nunaa,’ te parau ra Iehova,
‘Oia atoa to ˈu here taiva ore e to ˈu aroha hamani maitai.+
6 O te feia tiaraa teitei e te feia haihai atoa te pohe i teie fenua.
Eita ratou e hunahia,
Aita e taata e oto ia ratou,
Aita atoa e taata o te otioti ia ratou aore ra o te hahu i to ratou upoo, no ratou.*
7 E aita e taata e horoa i te maa na te feia e oto ra,
No te tamahanahana ia ratou o te oto ra i to ratou feia pohe.
Aita atoa e taata e horoa ˈtu i te auˈa o te tamahanahanaraa
Ia inu ratou o te oto ra i to ratou metua tane aore ra metua vahine tei pohe.
8 E eiaha e tomo i roto i te tahi fare tamaaraa
No te parahi e o ratou no te tamaa e no te inu.’
9 “Teie hoi ta Iehova o te mau nuu,* te Atua o Iseraela, e parau ra: ‘I ǒ nei i teie fenua, i to outou mau mahana e i mua maitai i to outou mata, e faaore au i te umere e te oaoa, te reo o te tane faaipoipo-apî-hia e te reo o te vahine faaipoipo-apî-hia.’+
10 “Ia faaite oe i teie mau parau atoa i teie nunaa, e ui ratou ia oe: ‘Eaha Iehova i faautua ˈi ia matou i teie ati rahi atoa? Eaha ta matou hape e eaha ta matou hara i rave ia Iehova to tatou Atua?’+ 11 E pahono oe ia ratou: ‘“No te mea ua faarue to outou mau tupuna ia ˈu,”+ te parau ra Iehova, “e ua tamau noa ratou i te pee i te tahi atu mau atua, i te tavini ia ratou e i te piˈo i mua ia ratou.+ O vau râ, ua faarue ïa ratou ia ˈu, e ta ˈu ture, aita ïa ratou i haapao.+ 12 E mea ino aˈe to outou haerea i to to outou mau tupuna,+ e te pee ra outou tataitahi i te etaeta o to outou aau ino, aita râ e faaroo ra ia ˈu.+ 13 No reira, e huri au ia outou i rapae i teie fenua i te tahi fenua aita outou e aita atoa to outou mau tupuna, i matau,+ e i reira e haamori iho â outou i te tahi atu mau atua i te ao e te po,+ no te mea eita vau e hamani maitai ia outou.”’
14 “‘Tera râ,’ te parau ra Iehova, ‘te tae mai ra te mau mahana e ore ai ratou e parau faahou: “Te horeo nei matou i te ora o Iehova, o tei aratai i te nunaa o Iseraela i rapae i te fenua o Aiphiti!”+ 15 E parau râ ratou: “Te horeo nei matou i te ora o Iehova, o tei aratai i te nunaa o Iseraela mai te fenua i apatoerau mai e mai te mau fenua atoa i haapurara ˈi oia ia ratou!” E e faahoˈi mai au ia ratou i to ratou fenua, ta ˈu i horoa no to ratou mau tupuna.’+
16 ‘Teie au e titau nei e rave rahi taata ravaai,’ te parau ra Iehova,
‘O te ravaai ia ratou.
I muri iho, e titau vau e rave rahi taata aˈuaˈu,
O te aˈuaˈu ia ratou na nia i te mau mouˈa atoa e te mau aivi atoa
E na roto i te mau afâ mato.
17 To nia iho hoi to ˈu mata i ta ratou mau mea atoa e rave ra.*
Eita ta ratou e nehenehe e huna i te reira ia ˈu,
Eita atoa ta ratou e nehenehe e huna i ta ratou hape i to ˈu mata.
18 Na mua, e faautua hope roa vau ia ratou no ta ratou hape e ta ratou hara,+
Ua haaviivii hoi ratou i to ˈu fenua i te mau tii ora ore* o ta ratou mau idolo faufau
E ua faaî ratou i ta ˈu tuhaa i ta ratou mau mea hairiiri.’”+
19 E Iehova, to ˈu puai e to ˈu pare,
Te vahi e horo ai au ia roohia vau i te ati,+
Ia oe e haere mai ai te mau nunaa na te hopea mai o te fenua,
E e parau ratou: “E haavare mau tei tutuuhia i to matou mau tupuna,
E mea faufaa ore e e mau mea aita e apî.”+
21 “No reira, e faaite au ia ratou,
I teie taime, e faaite au ia ratou i to ˈu puai e to ˈu mana,
E ia ite ratou o Iehova to ˈu iˈoa.”