Ieremia
INO RAHI TO TE ATI IUDA I TO RATOU MAU METUA RA.
16 Te parau a Iehova i tae mai ia ˈu ra, na ô maira, 2 Eiaha oe e faaipoipo i te vahine, eiaha ta oe ei tamarii tamaroa e te tamarii tamahine i teie nei vahi. 3 Te na ô maira hoi Iehova i te mau tamaroa e te mau tamahine ia fanau i teie nei vahi; e to ratou mau metua vahine i fanau mai ai ratou ra, e to ratou mau metua tane i fanau ai ratou i teie nei fenua; 4 E pohe ratou i te mau maˈi pohe ra; e ore ratou e otohia, e ore hoi e tanuhia; e riro ratou ei para i nia i te fenua nei; e pau ratou i te pohe i te ˈoˈe e te poia; e riro to ratou mau tino ei maa na te mau manu o te raˈi, e na te mau taehae o te fenua.
5 Te na ô maira Iehova, Eiaha te fare otohaa e tomohia, eiaha e haere e oto e e aroha ia ratou; ua faaore hoi au i tau hau i teie nei feia, i te aroha hamani maitai ra e te faaherehere, te na reira maira Iehova. 6 E hope ratou i te pohe i teie nei fenua, te feia rarahi e te taata rii; e ore ratou e tanuhia, e ore e otohia; e ore roa te hoê e ooti ia ˈna iho ia ratou, e ore hoi te hoê e paoti i to ˈna rouru ia ratou. 7 E ore hoi ratou e vavahi i te pane i roto ia ratou i te taata e oto, ei haamahanahana ia ˈna i tei pohe ra; e ore hoi ratou e hopoi atu i te auˈa haamahanahana ia inu ratou, no te metua tane e no te metua vahine.
8 Eiaha atoa e tomo i roto i te fare amuraa maa, a parahi atoa ˈi e ratou atoa i te amuraa e te inuraa. 9 Te na ô maira hoi Iehova sabaota ra, te Atua o Iseraela, Inaha, ua fatata vau i te faaore i teie nei, i mua i to outou nei mata, i to outou nei anotau, i te reo oaoa e te reo arearea, te reo o te tane faaipoipo apî, e te reo o te vahine faaipoipo apî.
10 E oti aˈera teie nei mau parau i te faaitehia e oe i teie nei feia; e ia parau mai ratou ia oe e, Eaha te mea i faaite hua mai ai Iehova i teie nei ino rahi no matou? eaha ta matou hara, e to matou ino i ravehia e matou i to matou Atua ia Iehova? 11 E parau atu oe ia ratou i reira, No te mea ua faarue mai to outou mau metua ia ˈu, te na reira maira Iehova, e ua pee haere i te mau atua ěê, e ua tavini ia ratou, e ua haamori ia ratou, e ua faarue mai ia ˈu nei, e aore i haapao i ta ˈu ture: 12 e ino rahi ta outou i rave i ta to outou mau metua ra; inaha hoi, o outou atoa i te pee-haere-raa i te hinaaro o to outou aau ino ra, o vau nei râ aita ïa outou i faaroo mai. 13 E teie nei, e faataa ê atu vau ia outou i teie nei fenua, i te hoê fenua aore i itea e outou e to outou mau metua atoa; ei reira outou e haamori ai i te mau atua ěê i te rui e te ao; i te vahi e ore ai au e faaherehere ia outou.
14 Te na ô maira râ Iehova, Te fatata maira te tau, e ore e parau-faahou-hia e, Te ora ra Iehova, o tei aratai mai i te tamarii a Iseraela mai te fenua maira mai Aiphiti: 15 area râ, te ora ra Iehova, o tei aratai mai i te tamarii a Iseraela mai te fenua i te pae i apatoerau ra, e mai te mau fenua mai i tiahihia ˈtu ai ratou e ana; e faahoˈi mai hoi au ia ratou i to ratou ihora fenua, i horoahia ˈtu e au no to ratou ra mau metua.
16 Inaha, e tono vau i te vea e tii i te feia ravaai e rave rahi, te na reira maira Iehova, e na ratou e ravaai ia ratou: e oti aˈera, e tono vau i te vea i te feia auau e rave rahi, e na ratou e auau ia ratou i te mau mouˈa atoa ra, e te mau aivi atoa ra, e i roto te mau apoo atoa o te mau mato ra. 17 Te hiˈo nei hoi tau mata i to ratou mau haerea; aita ratou i moe i mua i tau aro nei; aore hoi to ratou ino i moe i mua i to ˈu nei mata. 18 E mata na râ vau i te tahoo taipiti atu i to ratou ino e ta ratou hara, o ratou i haaviivii i tau fenua, e i faaî i tau tufaa i te oivi o ta ratou ra mau mea faufau e ta ratou mau mea ataata.
19 E Iehova, e tau puai e tau pare ati, e tau haapuraa i te mahana ahoaho; e tae roa mai te etene ia oe mai te hopea mai o te fenua ra, a parau mai ai e, E haavare mau ta to matou mau metua ra, e mea faufaa ore, aita e faufaa i noaa ia ratou. 20 Ei taata anei te hamani i te atua? e ere te atua ratou iho? 21 E teie nei, inaha vau, i te haapiiraa ˈtu ia ratou i teie nei, e faaite atu vau ia ratou i tau rima e tau mana; e ite hoi ratou e, o Iehova to ˈu iˈoa.