Samueri Wokutanga

7 Ngokudaro, anarume e ku Kiriyati-jearimu akauya uye akatora Areka ya Djehovha oenda nayo ku nyumba ka Abhinadhabhi pa dunhu. Uye awona akacenesa Ereazari mwana wake, kuti acengete Areka ya Djehovha.

2 Kubvira pa zuwa rakauya Areka mu Kiriyati-jearimu, pakadarika nguwa yakareba inokwana makore 20, uye nyumba yese ye Israeri yakatanga kupsvaka* Djehovha. 3 Hino, Samueri wakabvunza nyumba yese ye Israeri kuti: “Kana mecihwirira no mwoyo wese kuna Djehovha, tsakatisai pakati penyu anamwari e nyika dzimweni uye mifanikiso ya Astoreti; hwirirai no mwoyo wese kuna Djehovha, meciseenzera iyena basi, uye iyena acamupukunyusai mu nyara dze Afiristiya.” 4 Ngokudaro, Aisraeri akatsakatisa mifanikiso ya Bhaari no ya Astoreti uye akaseenzera Djehovha basi.

5 Hino Samueri wakati: “Unganidzai Aisraeri ese ku Mizipa, uye inini ndicaaitira munamato kuna Djehovha.” 6 Ngokudaro, awona akaungana ku Mizipa, akacera mvura uye akaidurura pamberi pa Djehovha; uyewo akatsanya pa zuwa irona. Ikona awona akati: “Tamushaishirai Djehovha.” Uye Samueri wakatanga kuseenza hinga mutongi we Aisraeri ku Mizipa.

7 Afiristiya paakaziya kuti Aisraeri ainga aungana ku Mizipa, atongi e Afiristiya akakwidza kuti arhwise Aisraeri. Aisraeri paakazwa izvona, akathya Afiristiya. 8 Ngokudaro, Aisraeri akabvunza Samueri kuti: “Musaime kudeketera kuna Djehovha Mwari wedu, kuti atibetsere uye atiponese mu nyara dze Afiristiya.” 9 Hino Samueri wakatora bira doko rainga riciri kuamwa uye wakaripasa Djehovha hinga mupiro unopiswa wemutero; uye Samueri wakadeketera kuna Djehovha ecikumbira rubetso kuitira Aisraeri, uye Djehovha akamudaira. 10 Samueri paainga aciri kuita mupiro unopiswa, Afiristiya akaenda koorhwisana no Aisraeri. Pa zuwa irona, Djehovha akatuma mheni inothyisa ku Afiristiya, zvekuti akabara woyo-woyo pakati pawo, uye awona akanyiswa no Aisraeri. 11 Ngokudaro, anarume e Israeri akabva ku Mizipa uye akateera Afiristiya, dakara ku nharaunda iri katemaidumba ke Bheti-kari eciauraya mu gwanza. 12 Hino Samueri wakatora buwe uye wakarikanda pakati pe Mizipa no Jesana uye wakaridainza kuti Ebheneza,* eciti: “Djehovha atibetsera Dakara zvino.” 13 Ngokudaro, Afiristiya akanyiswa, uye aazizve kupinda mu nharaunda ye Aisraeri; uye nyara ya Djehovha yakarumbwa yecirhwisa Afiristiya mu mazuwa ese a Samueri. 14 Kusiya izvona, mathaundi ekuti Afiristiya ainga atorera Aisraeri akahwirinzwa ku Aisraeri, kubvira ku Ekroni dakara ku Gati, uye Aisraeri akatorazve nharaunda dzawo kubva mu nyara me Afiristiya.

Uyewo pakaoneka runyararo pakati pe Aisraeri no Aamori.

15 Samueri wakarumbwa ecitonga Israeri ke upenyu wake wese. 16 Makore ese, iyena waienda ku nharaunda ye Bheteri, Jirigari, uye ku Mizipa, ecitonga Aisraeri ku mbuto dzese idzi. 17 Asi waihwirira ku Rama, ngokuti ikona ndiko kainga kuno nyumba yake, uye ikona iyena waitongawo Aisraeri. Uye iyena wakawakira Djehovha artari ku Rama.