Samueri Wokutanga
6 Areka ya Djehovha yakagara ku nharaunda ye Afiristiya kemwedzi inokwana minomwe. 2 Afiristiya akadainza apristi no afemberi uye akaabvunzisa kuti: “Cinyi catinodikana kuita no Areka ya Djehovha? Tibvunzei mushobo watinodikana kuitumira kuti ihwirire ku mbuto kayo.” 3 Awona akadaira kuti: “Kana mukatumira Areka yo Citenderano ya Djehovha Mwari we Israeri, musaitumire meciihwirinza pasina mupiro. Zvezvirokwazvo imwimwi munodikana kuitumira no mupiro we ndaa. Kana mukadaro, imwimwi mucaporeswa, uye mucaziya kuti ngei moko wake wainga usikabudi pamuri.” 4 Hino Afiristiya akabvunzisa kuti: “Mupiro upi we ndaa watinodikana kutumira?” Awona akadaira kuti: “Mapundu* mashanu e oro uye mbeya shanu dze oro maererano no numero yo atongi e Afiristiya, ngokuti umwe na umwe wenyu uye atongi enyu akabathwa no dambudziko rimwero. 5 Itai mifanikiso ye mapundu* uye mifanikiso ye mbeya dziri kutsakatisa nyika yenyu, uye kudzai Mwari we Israeri. Pamweni angaita kuti moko wake usamutambudzei, usatambudze mwari wenyu uye nyika yenyu. 6 Ngei mecidikana kuomesa mwoyo hinga zvakaita Aedjipitu na Faraoo? Mwari paakaatambudza, awona akasiya Aisraeri kuti aende, zvekuti awona akaenda. 7 Parizvino gadzirirai ngoro ipsva uye n’ombe dze kadzi mbiri dziri kuamwisa, dzisati dzakambosungirhwa pa djoki. Hino sungirai n’ombe dzekadzidzo pa ngoro, asi torai zviana zvadzo mozvihwirinza mu danga, kure na mai azvo. 8 Kandai Areka ya Djehovha mu ngoroyo, uye kandai zviro zve oro zvamunoda kutumira hingana mupiro we ndaa mu bhokisi pa muceto pe Areka. Pedzepo zvitumirei 9 uye ringirai zvicaitika: Kana iyona ikakwidza ku gwanza rinoenda ku Bheti-semesi, ku nharaunda yayo kamare, hino ndiye wakaita zviro izvi zvakashata. Asi kana ikatama kukwidza, ticaziya kuti andiepi akaita kuti tibatane no dambudziko iri; uye kuti zvakaitika katiri zvakandoitikawo hazvo.”
10 Hino anarumewo akaita izvona. Akatora n’ombe mbiri dzainga dzabva kubara, akadzisungira pa ngoro uye akatora zviana zvadzo ozvikanda mu danga. 11 Pedzepo akakanda Areka ya Djehovha mu ngoro, akakandawo bhokisi rainga rino mbeya dze oro uye mifanikiso ye mapundu* awo. 12 Uye n’ombedzo dzakaenda dzeciteera gwanza rinoenda ku Bheti-semesi. Dzakarumbwa dziri mu gwanza rimwerimwero dzecirira; adzizi kupauka kuenda ku moko kwawo kana ku moko boshwe. Pa nguwa iyona, atongi e Afiristiya aihamba sure kadzo uye akaenda dakara mu mugano we nharaunda ye Bheti-semesi. 13 Anhu e ku Bheti-semesi ainga ecikorora trigu mu bani. Paakaringira oona Areka, akapfara maningi. 14 Ngoroyo yakapinda mu munda wa Djoshuwa mu Bheti-semesi uye yakaima imona padhuze no pa buwe guru. Hino awona akagura matabwa e ngoroyo, uye akapira n’ombedzo hinga cibairo cinopiswa kuna Djehovha.
15 Arevhi akabvisa Areka ya Djehovha uye bhokisi rainga riri pa muceto payo, rekuti rainga rino zviro zve oro, uye akazvikanda pamusoro pe buwe guru. Anarume e ku Bheti-semesi akaita mipiro inopiswa uye akapasa zvibairo kuna Djehovha pa zuwa irona.
16 Atongi ashanu e Afiristiya paakaona izvona, akahwirira ku Ekroni pa zuwa irona kamare. 17 Mapundu* e oro akatumirhwa no Afiristiya kuna Djehovha hinga mupiro we ndaa, ainga ari aya: Rimwe kuitira Ashidhodhi, rimwe kuitira Gaza, rimwe kuitira Askeroni, rimwe kuitira Gati, uye rimwe kuitira Ekroni. 18 Numero ye mbeya dze oro yaienderana maererano no numero ye mathaundi ese e Afiristiya ainga ecitongwa no atongi ashanu, kutobatanidzawo mathaundi akabamba no mitanha ye ku munda.
Uye buwe guru rakagadzikirhwa Areka ya Djehovha riciri ku munda wa Djoshuwa, mu Bheti-semesi hinga upupuri dakara nyamasi. 19 Asi Mwari akauraya anarume e ku Bheti-semesi, ngokuti ainga aringira Areka ya Djehovha. Akauraya pakati pe anhu anarume anokwana 50 070,* uye anhu akatanga kucema ngokuti Djehovha ainga auraya anhu akawanda. 20 Hino anarume e ku Bheti-semesi akabvunzisa eciti: “Ndiani ungakwanisa kurumbwa akaima pamberi pa Djehovha, Mwari uu mucena? Uye acaenda kuna ani kana akabva katiri?” 21 Hino akatumira masoko ku agari e ku Kiriyati-jearimu, eciti: “Afiristiya ahwirinza Areka ya Djehovha. Uyai muitore.”